الأحد، 20 يوليو، 2008

دروس بالعافيه ..فى التاريخ والجغرافيا


سقراطه :- اهو الفلحوس جوزك وصل

مسز رايق :- اهلا ياسى عبده حمدلله على السلامه

الرايق :- شرفتى كازينو الرايق يا سقراطه ...انتى رجلك خدت على بيتنا يعنى...ماتجيبى جوزك وعيالك وتقعدى هنا واحنا نقرفص على السلم

مسز رايق :- عيب كده ياسى عبده ...ماتزعليش منه يا نعمه ده بيهزر

سقراطه :- يهزر ولا ميهزرشى ...انا باجى هنا لبيت اختى مش لبيت الرايق

الرايق :- خليكى قاعده ياختى فى بيت اختك .....سواق لورى يكون اعمى واطرش يسلم عليكى بالدوبل

سقراطه :- بطبرطم بتقول ايه يا رايق ؟؟؟؟؟؟؟؟

الرايق :- لا ابدا ..انا داخل اصحح الكراريس.. اصل الاشاره فتحت

سقراطه :- هههههههه .....كراريس !!!!!!!.....هو انت بتعرف تصحح كراريس ؟؟...وكراريس ايه دى بقى يا فالح ؟؟

الرايق :- بصى يا سقراطه ....مساهمه منى انا الدكاتره عبده الرايق فى حل مشكله نحو الاميه ...قررت اعلم اهل الحته مجانا بدون اى ماااااانى ...واتفرج على الحلاوه حلاوه

سقراطه :- اسمها محو الاميه يا رايق ...مش نحو الاميه

الرايق :- نحو الاميه يا متخلفه ....بمعنى اننا نجرى نحو الاميه ونمسحها باستيكه

سقراطه :- نحو ولا محو ...مش مشكله ...هى فكره كويسه جدا يارايق بس ياريت تيجى من حد تانى غيرك

الرايق :- ليه كده يا سقاريطو هو انا كخه ولا ايه ؟؟؟

سقراطه :- لا انت مش كخه ..ورينى الكراريس دى

الرايق :- ياريت تغسلى ايدك بالليفه والصابونه الاول

سقراطه :- ورينى بس كده...ايه ده ...مصر دوله خليجيه !!!!!!!!!!

الرايق :- طبعا يا جاهله ....الدكاتره عبده الرايق بيصحح الجغرافيا والتاريخ ....مصر مش واقفه على خليج السويس

سقراطه :- ايوه بتطل على خليج السويس

الرايق :- تبقى دوله خليجيه ولا لأ

سقراطه :- لا ناصح من يومك ....وايه ده كمان ....الناس ايام صلاح الدين مكنوش يعرفوا الملابس

الرايق :- طبعا يا فالحه ..صلاح الدين بنى ايه ؟؟؟؟

سقراطه :- بنى القلعه

الرايق :- طيب لو كانوا يعرفوا الهدوم مش كانوا لبسوها

سقراطه :- مش بقولك ناصح ..وايه ده كمان ....اكبر بلد بتنتج الحبر هى السودان ...وايش عرفك انت ؟؟

الرايق :- طبعا انتى جاهله ....السودان فيها النيل الازرق ولا لأ ؟

سقراطه :- فيها النيل الازرق

الرايق :- خلاص خدوا منه الحبر ... انتى لازم تدخلى نحو الاميه يا سقراطه

سقراطه :- ههههههههه .....لامتشكره خالص يارايق ...اصل العلم بتاعك ده صعب على الواحده اللى زى حالاتى

الرايق :- انا ممكن احجزلك مع المعاقين ذهنيا

سقراطه :- طيب قولى يا رايق ...مين اول من نادى بحريه المرأه ؟؟؟؟

الرايق :- قنوات الدش طبعا هى دى عايزه سؤال

الأربعاء، 9 يوليو، 2008

شيكات ...نو نو نو


ترررررررن ....تررررررررررررن ...ترررررررررن

الرايق :- الو

صوت :- الو السلامه عليكم ...معايا استاذ عبده الرايق

الرايق :- وعليكم السلام ...استاذ مين ؟؟ انتى اتعميت ولا ايه ؟؟؟ مش شايفنى فى السماعه ؟؟؟ ... معاك الدكاتره عبده باشا الرايق

صوت :- انا بكلم حضرتك يا دكاتره بخصوص الشيك

الرايق :- نو نو نو انا الدكاتره عبده الرايق لايمكن اقبل ابدا شيكات ...انا عايز الجايزه كاش مانى ..وتكون فلوس مش معلمه ..انا لايمكن ارضى ابدا بالشيكات حتى لو اتلمت السويد كلها برجالتها ونسوانها وعيالها .. انا دونت موافق

صوت :- يا دكاتره اسمعنى ارجوك

الرايق :- نو نو نو انا مش هاسمعك ومتضيعشى وقتى مع السلامه

سقراطه :- مين ده يا رايق ؟؟؟

الرايق :- اه ..هنا بقى وتعملى نفسك قريبه فريد الاطرش ...وتعملى نفسك مش سامعه حاجه

سقراطه :- انا سمعاك بتقول شيك والجايزه والسويد ..فى ايه يارايق ؟؟؟؟

مسز رايق :- ايه يا عبده الحكايه ياخويا فى ايه ؟؟؟؟

الرايق :- الجماعه بتوع جايزه موبيل عايزين يدونى الجايزه بالشيكات ....وانا قولتلهم نو نو نو... انا لايمكن اعمل زى البشر التانيه واقبل شيكات ..لازم كاش مانى يا اما بلاش

سقراطه :- طيب ليه ؟؟؟وبأماره ايه ؟؟؟وعلشان ايه ؟؟؟

الرايق :- طول عمر لسانك طويل يا سقرووووطه ... وادى السويد كلها بتحفى ورايا علشان يدونى الجايزه وانا مش موافق ...انا داخل المكتبه بتاعتى اطالع الكتب الثقافيه ..انا مش هضيع وقتى معاكم ...ابقى زروينا بعد كام الف سنه ياسقراطه ....سلالالالالالالام

سقراطه :- هو ايه الحكايه ياختى الرايق جوزك بقى مثقف وهياخد جايزه نوبل ؟؟؟؟؟

مسز رايق :- مثقف مين يا نعمه ..انتى بتصدقى ؟؟؟ قال مثقف قال ..بلا نيله

سقراطه :- ماهو بيقول انه داخل المكتبه بتاعته

مسز رايق :- مكتبه ايه يا حسره ...ده عامل صندوق قديم مكتبه وحاطط فيه كام مجله من بتوع سمير وميكى وبطوط وكتب المدرسه بتاعه العيال وكرارسهم القديمه ...وكل شويه يقعد يقراء فيهم

سقراطه :- امال ايه حكايه الجايزه دى ؟؟؟....الكلام فعلا قدامنا اهه

مسز رايق :- والله مانا عارفه بقى ...يمكن يكونوا اتهبلوا ولا حاجه هما كمان

ترررررررررررررررن ......ترررررررررررن ...ترررررررررررررن

الرايق :- انا جاى اوعوا حد يرد ..الجماعه دول مش ناويين يجيبوها البر ....الو

صوت :- الو يا دكاتره

الرايق :- انت تانى يا بتاع الشيك ؟؟؟

صوت :- ايوه يا دكاتره ..ياريت تسمعنى ومتقفلشى السكه

الرايق :- اخر كلام عندى ...الجايزه تيجى فلوس مش متعلمه ..وميعاد التسليم الساعه واحده بالليل بعد كمين الكيلو 109 طريق القاهره - السويس وياريت متبلغوش البوليس ..مع السلامه

سقراطه :- نهارك زفت يارايق بوليس ايه ؟؟؟؟؟

الرايق :- مش هما بيقولوا كده فى الافلام ؟؟؟ انا عملت زى الافلام ...واطلعى انتى منها يا ام السقاريط

سقراطه :- طيب يا اخويا خلى المتكلم عاقل والمستمع مجنون ...انا عايزه اعرف هيدوك جايزه نوبل على ايه ؟؟؟؟

الرايق :- يا متخلفه ياللى شبه اختك مسز رايق ....هيدونى جايزه نوبل عن علمى الكبير

سقراطه :- فى ايه ؟؟؟؟؟؟؟؟ ماتخلى الطابق مستور احسن

الرايق :- بصى يا سقراطه انا اتعمل عليا 140 الف بحث عالمى واكدت اللجنه انى استحق الجايزه عن جداره

سقراطه :- ومين بشرك بقى بالخبر الحلو ده ؟؟؟؟

الرايق :- العلامه الكبير الواد حسن باشا الفراش ...وكمان قالى انهم قعدوا يصقفوا للرايق وانجازاته 4 ايام بلياليهم

سقراطه :- وانت مصدقه ؟؟؟؟؟؟؟

الرايق :- ومصدقوش ليه ؟؟؟وبعدين اديكى شايفه التليفونات بتجرى ورايا ازاى ...عارفه يا سقراطه ...انتى اول واحده هتستفاد من الجايزه . هود يكى عند اجدع دكتور تجميل فى السويس يقصلك لسانك من لغلوغه

ترررررررررررررررن .......ترررررررررررررن ....تررررررررررررررن

الرايق :- رن للصبح انا مش هارد عليك

سقراطه :- اوعى كده يا رايق ....انا هارد على التليفون ...الو

صوت :- الو ...لو سمحتى يا مدام قولى للاخ اللى عندك لو مارحشى بكره للمعلم اسامه بتاع التلاجات ودفع الشيك اللى عليه باقى قسط التلاجه هيوديه المحكمه وقد اعذر من انذر ...سلام عليكم