الأحد، 12 يونيو 2016

ايييييييييييييييييييييييه والله مفيش احسن من ايام المدونات .......قال فيس بوك قال ....انا هنا فى مكانى

الثلاثاء، 31 مايو 2011

الرايق رئيس الجمهوريه

والان مع برنامج مناظرات الرئاسه


المذيعه :- نحن الان نمر بمرحله عنق الزجاجه بالنسبه للحياه السياسيه المصريه ولذلك يسعدنا ان نستضيف الدكاتره عبده الرايق المرشح لرئاسه الجمهوريه اهلا وسهلا استاذ عبده الرايق


عبده الرايق :- هااااااى ايفرى بدى ...هاى مدام مظيعه ... هاااااى حسن باشا الفراش ازيك ياااااااااااا متولى


المذيعه :- استاذ عبده ارجوك احنا على الهواء


عبده الرايق :- وااااااااااات هابن ؟؟؟؟ ايه يعنى احنا على الهواء ؟؟؟؟ انا بسلم على ماى فرند اللى شايفنى دلوقتى فى التليفزيون .... متووولى يا متولى انت شايفنى ؟؟؟


المذيعه :- استاذ عبده ارجوك ابوس ايدك احنا على الهواء .... ودلوقتى اعزائى المشاهدين مع فاصل اعلانى


المخرج :- لالالالالالا ده مش اسلوب متحضر لانسان مرشح لرئاسه الجمهوريه .... مين جاب الشخص ده هنا ؟؟؟؟؟


المذيعه :- وانا اعرف منين سيادتك معد البرنامج هو اللى جابه


الرايق :- وااات هابن يا بشر ؟؟؟ انتم مش عارفين انا ميييين ؟؟ انا الدكاتره الكبير عبده باشا الرايق 22 دكتوراه و14 بكرريوس و 23 ايسانس و12 ماججسطير وان شاء الله ان الريس القادم


المخرج :- البتاع ده خلاص ظهر فى الحلقه على الهواء ومش هنقدر نلغى الهواء ارجوكى يا استاذه منال حاولى تتكلمى معاه فى اى حاجه وربنا يستر (( استغفر الله استغفر الله استغفر الله استغفر الله استغفر الله ))


الرايق :- ايه ياعمنا مالك انت بتسبح وانت ماسك ازازه كاكولا ... نو نو نو ... ياخى اختشى على دمك وامسك ازازه سفن اب ولا شويبس خليك جووود مان


المخرج :- ارجوكم ولا صوت يلا يا منال هنبداء هواء ...ثرى ..تو ...وان ..هواء


المذيعه :- اعزائى المشاهدين نكمل حوارنا مع احد المرشحين لرئاسه الجمهوريه الدكاتره عبده الرايق ... اهلا يا فندم


الرايق :- اهلا يا منال يابنتى ... كويس كده ياعم المخرج .. بص بقى انا ماليش دعوه بمتولى خااااااااالص


المذيعه :-خليك معايا يا استاذ عبده كنت عايزه اسأل حضرتك عن البرنامج الانتخابى بتاعك ؟؟


الرايق :- طيب خلى المخرج ده يبص بعيد عنى


المذيعه :- اعزائى المشاهدين الاستاذ عبده الرايق كان بيقول قبل الهواء انه بيحب الهزار واظن دى مزحه صح يا دكاتره ؟؟؟؟


الرايق :- طبعا دى فسحه وانا بس كنا عايز اقول ان البرنامج الانتخابى بتاعى معروف . وانا ان شاء الله هكسب الانتخابات بنسبه 97,88%


المذيعه :- حضرتك متفاءل جدا منين جبت النسبه دى ؟؟؟


الرايق :- ماشييين صح احنا كده ياعم المخرج ؟؟؟؟ الوووو ...انت يا عوبد


المذيعه :- استاذ عبده خليك معايا


الرايق :- بصى بقى يا مدام مذيعه فى تلات اسباب يخلونى اقول انى لازم انجح بالرئاسه وباكتسااااااااااح .... اولا -- اكتر من 35% من سكان السويس مصرييين وخصوصا عندنا فى منطقتنا حوالى 42% مصريين واكيد دول هينتخبونى طبعا


المذيعه :- 42% بس مصريين طيب والباقى يا استاذ عبده ؟


الرايق :- طبعا الباقى من دول مختلفه يعنى عندك مثلا ناس من الشرقيه ودمياط والبحيره والمنصوره واسيوط يعنى هتلاقى دول بالهبل


المذيعه :- دى مش دول يا رايق دى محافظات .


الرايق :- والله ؟؟؟ سبحان من يغير ولا يتغير ... المهم ترجع تانى للسبب التانى (( متوووولى شايفنى ؟؟؟؟ ))


المذيعه :- اعزائى المشاهدين مع فاصل اعلانى ونرجعلكم تانى


المخرج :- حد يجيب لى طبنجه ... انت يازفت انت طلعت لى منين ؟؟


الرايق :- دوننت قول زفت .. احترم يووور سيلف .. انا الدكاتره الرايق وبكره هبقى الريس وهخليك تشتغل فى البرامج الاخباريه وهوديك افغانستان


المذيعه :- معلش يا استاذ على حلقه وتعدى على خير ان شاء الله


المخرج :- ياخى حرام على اهلك ابوس ايدك ماليكش دعوه لا بيا انا ولا بالزفت متولى


الرايق :- وانت متبصليش وانا بتكلم


المخرج :- ياعم وحياه رحمه ابويا ماهبصلك نهائى . بس ارجوك خليك فى الحلقه


الرايق :- خلاص اوعدك ... وعد مان تو مان


المخرج :- ثرى ..تو ..وان ..هواء


المذيعه :- رجعنا تانى ليكم .. نكمل لقاءنا مع المرشح لمنصب رئيس الجمهوريه الدكاتره عبده الرايق ..وكن بنتكلم عن السبب التانى لكى يتأكد الرايق من فوزه فى الانتخابات


الرايق :- اما بقى ذا ثاكند سبب هو ان ما فرند المثقف الكبير استاذ محمود زرزوره قالى واحنا قاعدين على شيراتون السويس ناين ستارز


المذيعه :- بس مافيش فى السويس لا شيراتون 9 نجوم ولا حتى 5 نجوم


الرايق :- نو نو نو .. احنا كنا قاعدين جنب اليافطه بتاعه الشيراتون ..المهم ..سيبك من الجاجات الصغيره دى .. المهم ان ماى فرند الحاج محمود قالى انا هرشحك للرئاسه يا رايق ... واحسبى بقى عندك .. الحاج محمود ومتولى وحسن باشا الفراش وحنين وصبرنى وهمس والرايق ابنى وسقراطه ومسس رايق والطائر وفرنسا ومفروسه ودوبه وسومه المجنونه يعنى حوالى 23 نفر من 85 مليون تبقى النسبه 97,88% زى ما قلت


المذيعه :- ازاى بقى 23 من 85 مليون تبقى النسبه 97 فى الميه


الرايق :- ههههههههههههه ... صحيح وما اتيتم من العلم الا قليلا ... بصى يا مسس مدام الحاج بتهوفن لما اكتشف نظريه النسبيه كان نايم تحت شجره وطبعا قصه التفاحه اللى كلنا عارفينها دى النظريه دى قالت ايه ؟؟؟؟؟


المذيعه :- بس النسبيه لاينشتاين اما موضوع التفاحه ده بتاع قانون الجاذبيه لنيوتن


الرايق :- سيبك انتى من الفرعيات دى ...خلينا فى المهم .. فى حاجه فى حساب المثلثات اسمها جا وجتا وظا وظتا وقا وقتا ..يعنى لو استعملنا العلم هنوصل لكل حاجه احنا فى ظهر العلم


المذيعه :- قصدك عصر العلم


الرايق :- ياستى عصر ظهر مش مهم المهم احنا لو طبقنا اسلوب الحياه مع القوانين العامه للظتا والجتا مع نسبيه بتهوفن هنلاقى ان ال 23 نفر يمثلوا نسيبه 97,88% من 85 مليون (( اوعى تنام يا متولى ))


المذيعه :- الاستاذ عبده الرايق الوقت معاك مر بسرعه نكمل حديثنا فى حلقه تانيه ان شاء الله ...اعزائى المشاهدين الاسبوع المقبل مع ضيف جديد مرشح للرئاسه السلام عليكم


المخرج :- فررررررررررررررررررررررركش


الرايق :- ايه يا سعاده المخرج اظن انت هتنتخبنى بقى ؟


المخرج :- لا الحمد لله انا مش هغير جنسيتى ..اصلى من دوله تانيه خاااااااالص انا من الجيزه


الرايق :- ههههههههه ...... الجيزه ؟؟؟؟ ....وانا اقول شفت الخلقه دى فييييييييييييييييييييين ؟؟؟؟؟

الخميس، 10 مارس 2011

انتخبوا اخيكم الرايق رئيس الجمهوريه

معلشى هتعبكوا شويه
البوست فى الضاحكون اضغط هنا

الأربعاء، 26 يناير 2011

انفجار بركان الغضب فى مدينه السويس

السويس تغلى.. مدينه الصمود تتذكر ايام الحصار لترقص من جديد على انغام بلادى بلادى لكى حبى وفؤادى
لترقص من جديد على نفحات الحريه وتعلن اننا لن نستعبد بعد اليوم
خرجت مع الالاف امام مسجد الاربعين بشارع الجيش لنعلن اننا مازلنا احياء ولم نموت بعد ولن نموت ابدا
قوات الامن المركزى استعملت العنف المفرط فى تفريق المتظاهرين وقد شاهدت الكثيرين من الشباب الصغير يصابون بطلقات الخرطوش ومنهم اثنين يعملان معى الان يرقدان فى المستشفى من جراء كلمه حق
السويس تغلى
ومصر كلها تغلى
مصر الان على ابواب الحريه
مصر الان على ابواب الاستقلال
لكى الله يا مصر
نحن فداك يا وطنى
الى الان شهيدان من ابناء السويس وعشرات المصابين
من لنا الا الله
من لنا الا الله
لن نتراجع يا مصر
لن نتراجع يا مصر

الأحد، 22 أغسطس 2010

الكاميرا الخفيه قوووووووى

جرس الباب يرررررررن
مسز رايق :- خير اللهم اجعله خير ..مين سى عبده ؟؟؟ هو انت مش معاك مفتاح ؟؟
الرايق :- شط اب يور ماوس ..مش عايز اسمع صوت اى دبانه هنا دلوقتى
سقراطه :- اللهم انى صايمه ..بتتكلم وتبص عليا ليه ياسى زفت انت
الرايق :- مين سقراطه هنا فى بيتنا ...هو انتى يابنتى معندكيش بيت ولا جوز ..فات من رمضان 11 يوم فطرتى معانا 11 يوم انتى ايه جايه بالنيابه عن الستين مسكين كلهم
مسز رايق :- عيب ياسى عبده اختى نعمه بتتعب نفسها وسايبه بيتها وولادها وجوزها علشان انا تعبانه
الرايق :- خلاص ولا ربع كلمه تانى انا مش ناقص
مسز رايق :- خير بس يا سى عبده فيه ايه يا خويا ؟؟
سقراطه :- هههههههه خير !!!! وده برضه وش خير ابدا ... اكيد عامل عامله سوداء من عمايله
الرايق :- بس يا متخلفه انتى انا بس قعدت ساعتين فى الشمس مستنى التليفزيون ومحدش جه ..قلت اطلع اخد دش وارجع تانى
سقراطه :- تليفزيون ايه ده يا فلحوس ؟؟
الرايق :- الدكاتره الكبير عبده باشا الرايق هيطلع فى برنامج الكاميرا الخفيه يا بقر
سقراطه :- خفيه ايه وكاميرا ايه يا وحيد عصرك واوانك
الرايق :- بصى يا سقاريطو بصى مسز رايق ..تو داى وانا راجع من شغلى قابلنى شابين ومزيعه اخر جمال وفيها حاجات جميله شبه سقراطه بالظبط
سقراطه :- الله يجبر بخاطرك يا رايق جميله وشبهى بالظبط متشكره قوى يا رايق
الرايق :- نو نو نو انا مش قصدى انها شبهك ... نو نو نو انا بقول فيها حاجات شبهك قصدى على الشراب ..مش عارف ليه الشراب بتاعها له نفس ملامحك
سقراطه :- انا برضه شبه الشراب يا خيبه الرجاله انت ؟؟
مسز رايق :- بس بقى انت وهى .. رمضان كريم يا جماعه .. وبعدين كمل يا رايق
الرايق :- المذيعه قالتلى انت هتكون نجم حلقه الكاميرا الخفيه .. وحلقه اليوم ده عباره عن عربيه محمله ادوات كهربائيه والضيف اللى هو انا اول ما العربيه تقف قدامى وينزل منها الشابين ويقولولى لو سمحت يا عمو خلى بالك من العربيه دى ..وبعد كده يجى واحد يقولى العربيه دى مسروقه
والحاجات اللى فيها مسروقه ..وانا بقى اترعش واخاف وفى الاخر يقولولى الفقره دى اتصورت لو عايز نذيع قول ذيع
سقراطه :- ها وبعدين ..سمعنى كمان واطربنى
الرايق :- المذيعه والشابين مش كانوا عاملين حسابهم ومش جايبين معاهم اجهزه كهربائيه رحت انا استلفت من الجيران كام تليفزيون على كام مروحه على كام تسجيل على كام كمبيوتر وحملناهم على العربيه ..بس مش عارف العربيه اتأخرت ليه ؟؟؟؟
سقراطه :- لووووووووووولى ههههههه يام المطاهر رشى الملح سبع مرات .... ههههههه وحضرتك بقى قعدت فى الشمس مستنى العربيه ؟؟؟
الرايق :- ايوه يا متخلفه انتى وفيها ايه
سقراطه :- لا ابدا حاجه بسيطه يا عنتر زمانك ..دول بس اكيد حراميه
الرايق :- نو نو نو هو انتى مفيش على لسانك الا الصدى
مسز رايق :- فين مخك يا رايق حرام عليك دول اكيد حراميه
الرايق :- نو نو نو مش حراميه ..وحتى لو كانوا حراميه البطاقه بتاعتى معاهم وهاعرف اجيبهم
سقراطه :- هههههه البطاقه بتاعتك .... وايه اللى خلاك تديهم البطاقه
الرايق :- انا لما حملت لهم الحاجات قالولى متخافشى يا ريس احنا هنلف ونرجعلك ... انا بقى قلت لهم نو نو نو علشان اضمن حقى وحق الناس لازم تاخدوا البطاقه بتاعتى تخلوها معاكم

الخميس، 10 يونيو 2010

عتبه .. رمسيس ..جنوب افريقيا

الرايق :- هااااااااااااى ايفرى بدى ... مسز رايق هاو اار يو ؟ .. سقراطه هانم فى بيتنا يا مرحبا يا مرحبا .. يبقى اكيد هتنقطع الكهربا
مسز رايق :- اهلا يا سى عبده ... مالك انهارده مزقطط كده ليه ؟؟؟ وكمان راجع بدرى من شغلك
الرايق :- راجع بدرى علشان احضر شنطه هدومى ... اما بقى مزقطط ليه .. خليها فى سرك احسن فى ناس هنا عنيها تفلق الجبل
مسز رايق :- مالكشى دعوه بنعمه اختى وخليك معايا انا ... شنطه هدوم ايه اللى هتحضرها يا رايق ؟؟؟
الرايق :- بليز بى كويت مسز رايق .. ترجمتها للعربى اهدى شويه يا ام التخلف ... مالك يا سقاريطو .. سقرااااااااااااطه .. فى ايه مالك حاطه رجلك على خدك وحزينه كده ليه ؟؟؟
سقراطه :- حطوك فى زير مليان يا بعيد روح ... انا برضه حاطه رجلى على خدى ؟؟ اطلع من نافوخى يا رايق الساعه دى انا مش فايقه لك
الرايق :- ااااااااو سوورى سقراطه هانم ..انا كمان معذور كل دى ايد ... وبعدين كم البلوزه دى شبه الشراب
سقراطه :- شرااااااااب !!!!! الله يرحم ده انت لغايه السنه اللى فاتت كنت بتخاف تلبس الشراب ..ههههه .. دلوقتى عرفت تقول على البلوزه شراااااااااب
مسز رايق :- فى ايه يا رايق ؟؟؟ وشنطه هدوم ايه ؟؟ انت مسافر ؟؟
الرايق :- طبعا هتعرفى منين يا وش التخلف انتى ... انا رايح جنوب افريقيا علشان افتتاح كأس العالم بعد بكره وصديقى العزيز جاكوب زوما وماى فريند التوينز بلاتير حلفوا يمين طلاق ان اول مان يلمس الكره الجديده اديداس جابيلانى هو العبد لله عبده باشا الرايق
مسز رايق :- جابيلانى ؟؟؟؟ مين ياخويا جابيلانى دى كمان ؟؟؟
الرايق :- جابيلانى ده اسم كره كاس العالم الجديده يا متخلفه انتى ويور سيستر
سقراطه :- اتمسى ياسى قردان انت وخليك مع مراتك ومالكشى دعوه بيا نهائى
الرايق :- نهائى ... نو نو نو.... انا لايمكن ارجع الا بعد ماتش النهائى
سقراطه :- نهائى مين ونيله مين ؟؟؟ هو انت اصلا معاك جواز سفر ؟؟ هو انت اصلا معاك فلوس تتنيل بيها وتسافر ؟؟ هو انت اصلا فى حد فى جنوب افريقيا يعرفك ؟؟؟
الرايق :- ههههههههههه .. جواز سفر مين يا ام التخلف انتى .. الواد حسن باشا الفراش صديقى العزيز قالى انه حجز لى فى بورت اليزبيث جنب بورتوفيق على طول
مسز رايق :- بورت ايه ؟؟؟؟
الرايق :- بليز مسز رايق .. لسن توو مى ... بورت اليزبيث دى مدينه من المدن المستضيفه للكاس وهى جنبنا هنا على طول
سقراطه :- يعنى هتاخد لها ميكروباص يعنى ولا ايه ؟؟؟
الرايق :- نو نو نو ... انا برضه هاخد ميكروباص لجنوب افريقيا .. نو نو نو .. هو انا اتجننت ؟؟؟ .. الميكروباص هو اللى هيخدنى يا ام السقاريط انتى .. وبعدين ماى فريند عمنا جاكوب عمره ما هينساتى فى ال 420 مليون دورر جوايز البطوله .. حتى لو مصاريف السفر والتليفونات
سقراطه :- فوق واصحى يا رايق الزفت حسن الفراش ده بيضحك عليك
الرايق :- نو نو نو ... الراجل كتر الف خيره جبلى الدعوه والكزاكر وحجز لى فى احسن فندق فى رمسيس وحجز لى فى الميكروباص .. كل ده بكام تتخيلوا ؟؟؟
مسز رايق :- هو انت دفعت فلوس ؟؟؟
سقراطه :- طبعا ..طول ما المغفل عايش يبقى اكيد النصاب بخير

الثلاثاء، 11 مايو 2010

دقيقه حداد

معذره لكل احباء الرايق
فتدوينه اليوم خاليه من الابتسامه
********************
فى بدايه تدوينه اليوم ادعو الجميع الى الوقوف دقيقه حداد على روح المرحوم الفقيد (( التعليم المصرى ))
قام السيد الوزير السابق يسرى الجمل صاحب قرار تأجيل الدراسه بالاشتراك مع الشو مان السيد الوزير احمد زكى بدر الوزير الحالى وصاحب اكبر معارض الشو الاعلامى الدرامى وصاحب الفيلم الهابط ( مدرسه الخلفاء ) بقتل ثنائى وبدم بارد للتعليم المصرى
بالامس كان اول ايام امتحان ابنى فى المرحله الاعداديه وقبل يوم الامتحان وكما عودتنى ستى نفوسه رحمها الله ان توصى الام ابنتها على زوجها وحسن معاملته فى يوم الدخله ( يعنى تسيب سنين عمر البنيه كلها وتفتكر النصيحه يوم الدخله )
وانا علشان مزعلشى ستى نفوسه منى اردت ان اراجع مع ابنى ليله الامتحان
وياريتنى ماتهببت على عينى وراجعت
فى اثناء المراجعه النهائيه اكتشفت ان هناك دروس كامله فى جميع المواد لم يشرحها المدرس نهائيا نظرا لضيق الوقت وتقديم موعد الامتحانات
وطبعا ان مربى ابنى على الصدق
وعلشان كده مصدقتوش
واتصلت بابن اختى وهو فى منطقه مختلفه وفى مدرسه مختلفه وفى نفس العام الدراسى لابنى
وكانت الطامه الكبرى
ابن اختى اكد ان بعض المدرسيين لم يشرحوا الدروس الاخيره من عده مواد دراسيه نظرا للحضور المبكر للامتحانات
وفى مواد كتير يعنى على كل لون يا باطستا
وتذكرت قول الفيلسوف الرومانى حسن باشا الفراش حين قال ( اذا اردت ان تحارب قوما فعليك بعلمائهم .... واذا اردت ان تدق عنقهم فعليك بعلمهم )
وياريتك يا حسن يا زفت ماتكلمت ولا نطقت ... لان الساده محترفى الحرب هيدقوا عنقنا فى التعليم
افرح بقى واتفلسف براحتك يا حسونه
فى البدايه يا ساده اصدر السيد الوزير السابق يسرى الجمل قرار بتأجيل الدراسه بسبب الخوف من انفلوانزا الخنازير ( وده بصراحه كان مطلب للكثير من اولياء الامور )
ولان دولتنا ديمقراطيه ومش بتاكل مهلبيه تم الاستجابه لطلب اولياء الامور وتقرر تأجيل الدراسه على ان تستمر الدراسه المده المؤجله فى الصيف
وتم اقاله الجمل
وتولى زمام الامور الشو مان صاحب العرض القوى وخليفه مذبحه القلعه ( وانا اتحدى ان تجدوا عرضا مماثلا فى اى دوله فى العالم مثله ) عرض الشومان ( مدرسه الخلفاء ) وده العرض الاسبق فى نوعه واتحدى وجوده فى كتب الف ليله وليله او نوادر جحا او كليله ودمنه
عموما
تعلم السيد الوزير من اخطاء سلفه وتخيل له ان سبب اخراج الكارت الاحمر له هو تأجيل الدراسه
وبسبب العشق المصرى والعربى الروحانى للمحبوب الكرسى ..وبسبب عدم مقدره الوزير على معرفه وجوب جمع الاسبوعين المؤجليين للدراسه ام طرحهم من العام الدراسى
قام الوزير بعمل مخالف تماما
فقد قام بتقديم موعد الامتحانات اسبوعين عن موعدها الاساسى
يعنى بالبلدى عكس عكاس
وبالبلدى كده ( اسبوعين مؤجلين + اسبوعين مقدمين عن موعدهم = شهر كامل مفقود )
ويقال فى تقديم موعد الامتحانات عده اقوال منها
اولا :- يقال والعهده على الرواى ان تقديم موعد الامتحانات تم بسبب كأس العالم 2010 المقام فى جنوب افريقيا حيث تشترك مصر لاول مره باربعه منتخبات فى كأس العالم
ثانيا :- يقال ايضا ان تقديم موعد الامتحانات بسبب اعطاء امريكا الوقت الكافى للبحث عن اسامه بن لادن
ثالثا :- يقال ان التقديم تم بسبب التصريحات الاخيره لعصام الحضرى ورغبته فى العوده للاهلى
رابعا :- يقال ايضا ان التقديم بسبب الانتخابات الحره النزيهه التى ستشهدها مصرنا الحبيبه ( انتخابات مجلس الشورى ) وده اصاب التعليم بالشورى
خامسا :- يقال ان التقديم جاء بسبب مشاركه وزاره التربيه والمرحوم التعليم فى الاحتفال بعيد ميلاد التلميذه كارولين بيتر الامريكيه الطالبه بمدرسه سان فرنسيسكو الاعداديه القديمه بنات بولايه سان فرنسيسكو الامريكيه .. وذلك حرصا من الوزاره على المشاركه فى عيد ميلاد ام الفصاد
ان مايحدث من هرج ومرج وعدم احساس بالمسئوليه شىء خطير ومرعب على مستوى مصر كلها
اننى اناشد اتحاد الكره فى مصر ان يختار وزير جديد قوى وخبير كما وفقه الله فى اختيار حكام اجانب اكفاء لادراه مباراه الاهلى والزمالك الاخيره ( طبعا سامع حد بيقول مال اتحاد الكوره ومال الوزير .. اقوله بصراحه شديده .. عجبنى الحكم )
****************************
واخيرا اتقدم انا اخوكم عبده باشا الرايق بخالص التعزيه فى فقيد مصر والعالم العربى والاسلامى المرحوم المغفور له ان شاء الله التعليم المصرى
للفقيد الرحمه ولمصرنا الغاليه الصبر والسلوان

الخميس، 29 أبريل 2010

زغرووووووووووووده ياسقرااااطه

نكته الدورى
========
واحد زملكاوى صميم راح لدكتور عيون يكشف على عينه - راح الدكتور اداله علبه نقط من عنده وقاله تحط فى كل عين ثلاث نقط قبل النوم - راح صاحبنا الزملكاوى ماسك الازازه ورماها على الارض وقاله ماخلاص يادكتور الدورى راح والنقط ماعاديتش تنفع
================
هااااااااااااى ايفرى بدى
هااااااااى بجد وجدانى
=============
الرايق -- هاى مسز رايق هاااااا ى سقاريطو
سقراطه -- اهلا يا رايق مالك كده مزقطط
الرايق -- خبر بربع مليار دورر امريكى خلاص الدنيا ابتسمت خلاص انا هاطير مع السحاب
سقراطه -- ماتطير لوحدك ياروقه والنبى احسن السحاب محتاجينه
الرايق -- ماشى ياوش السعد ماشى يانور عيون الرايق من الانتو
سقراطه --- خير اللهم اجعله خير فى ايه يا رايق
الرايق -- بس خلاص كله سكوووووووووت الرايق اتشهر يارجااااااااااااااااااااااااله --- انا وصلت للعالميه
سقراطه ---ههههههه وصلت للعالميه هههههههه --فاضل واحد وتوصل الكيلو 101 طريق العباسيه الصحراوى
مسس رايق -- ايه يا سى عبده - فى ايه وقعت قلبى
الرايق --- خلاص فاااااااااات الكتييير مابقى الا القليل --هاااااانت يا بشر
سقراطه -- ياشيخ حرام عليك فى ايه قول بقى وخلصنا
الرايق --- كله سكووووت كله انتباه -- كله يسمع وبس -- دونت سبيك -- دونت مووف -- خلاص انا بقيت اشهر من كيلوباترا ملكه مصر ايام الناصر صلاح الدين -- انا بقيت اشهر من المعلم حسن باشا شحاته محافظ القاهره -- انا بقيت اشهر من العندليب الاسمر محمود على -- انا بقيت
سقراطه -- بس صداع حرام عليك - ايه ماسوره ميه وانكسرت - فى ايه يا رايق
الرايق -- خلاص فاضل 79 مليون و999 الف و999 نسمه وكل مصر تعرف العبد لله
سقراطه -- انا مش فاهمه حاجه خالص
مسز رايق -- ولا انا فاهمه حاجه خالص
الرايق --- هتفهموا ازاى طول ما اللبانه دى فى بقكم ليل نهار-- بصوا يا بشر انا اتشهرت خلاص -- امبارح وانا متربع على الكرسى فى القهوه جانى واحد ماى فرند اسمه الباشهندس عبد الموجود وبص فى عينى وقالى ايه اخبارك يا رايق
سقراطه -- لوووووووووولى يام المطاهر رشى الملح سبع مرات --- واحد بس عارفك من 80 مليون واحد وتقولى خلاص انا اتشهرت
الرايق -- وايه يعنى يا ام التخلف انتى -فاضل 79 مليون و999 الف و999 فرد ومصر كلها تهتف اسمى

جرس الباب يرن ترررررررررررررر

مسز رايق -- فى واحد على الباب اسمه عبد الموجود بيسال عليك يا رايق
الرايق -- روحى قوليله الرايق فى رحله لكوننهاجن فى فرنسا -- ولا اقولك خليه يدخل انا عزمته يشرب معايا شفطه شاى علشان تسمعوا بنفسكم ان الرايق بقى من العظاء
مسزرايق -- اتفضل ياخويا اهلا وسهلا
عبد الموجود -- سلام عليكم -- خير يا عبده انا لقيت رساله منك على الموبايل انى احضر البيت عندك حالا -خير اللهم اجعله خير
الرايق -- لايا عوبد مش تتخض كده -- بس انا كنت عايز اعرف انت عرفت منين انى انا الرايق
عبدالوجود -- رايق مين وزفت مين انا بقول الكلمه لكل صحابى وزمايلى فى الشغل - عامل ايه يا رايق - ازيك يا رايق - اهلا يا رايق وكده يعنى
سقراطه --- هههههههههههه لوووووووووولى فاضل على الحلو دقه باقى 79 مليون و999 الف و999 نسمه ومصر كلها تعرفك ياسي رووووووووووقه
الرايق ---عارفك بتفرحى فى المصايب -- ولا يهمنى هانت برضه كلها 80 مليون واحد وواحده وايجيبت كلها تعرفنى

الخميس، 4 مارس 2010

مبروووووووك حنين القلب

الف الف الف مليون مبروك ابنتى الغاليه حنين القلب على المولود الجديد
مبروك علينا كلنا اصغر عضو فى عائله الرايق
****** الاستاذ الكبير\ عمر اشرف ******
على فكره يا حنين اسراء راسها والف برطوشه انها لازم تكلم النونو وتشيله
احاول اقنعها ان النونو فى الاسكندريه واحنا هنا فى السويس ولكن هى مش فاهمه حاجه
احاول اقنعها ان الاسكندريه محافظه والسويس محافظه تانيه خالص وان عدد محافظات مصر حوالى 16 محافظه بعد انضمام المحافظتان الجديدتان اكتوبر وحلوان
وان الجمهوريه تنقسم جغرافيا الى عده محافظات ونجوع وكفور
وان المسافه بين السويس والاسكندريه اكتر من 14 ساعه وحوالى 850 كليو متر
وان الثوار فى سنه 1919 قاموا بكسر خطوط السكك الحديديه التى تربط بين المحافظات وبعضها
لكن هى مش قادره تفهم كلامى نهائى
ومصممه انها تروح بكره الاسكندريه
اقولها يا اسراء انتى كبرتى دلوقتى وعندك 4 سنين ونصف يعنى مفروض تكونى فاهمه التضاريس الجغرافيه للوطن العربى وطبيعه عوامله وتقسيماته الاستعماريه وما قبل الاستعماريه والانشقاقات الداخليه التى اثرت تأثرا مباشرا على الحدود الدوليه
الا اننى كمن ينادى فى مالطه
وهى اكيد فاهمه بس بتستهبل
عموماالف الف الف الف مليار مبروك مره تانيه

الجمعة، 30 يناير 2009

تبرعوا لأم حسين

سقراطه :- السلام عليكم

مسز رايق :- اهلا يانعمه ياختى ازيك .. برضه كده بقالك اسبوعين متجيش ولا تزورينى

سقراطه :- معلشى ياختى انتى عارفه لو عليكى انتى وعيالك انا اكون عندك كل يوم لكن انا طهقانه من وش النحس جوزك اللى ما يتسمى

مسز رايق :- انتى مالك وماله ده علاجه الوحيد تنفضيله انا عاشرته وعارفاه

سقراطه :- بس وانا داخله الحاره شفت لافتات كتيره قوى مكتوب عليها تبرعوا لام حسين .. هى ايه الحكايه ؟؟

مسز رايق :- غلبانه قوى الست دى والله جوزها مات وساب لها خمس اولاد صغيرين وياحبه عينى مالهمشى معاش .. اصل جوزها كان ارزقى ومالهوش تأمين ..والناس فى الحته كتر الف خيرهم بيلموا من بعضهم علشان يعملوا لام حسين مشروع تعيش منه هى وعيالها

سقراطه :- انا عن نفسى معايا 200 جنيه دلوقتى وعايزه اتبرع بيهم لعمل الخير ده

مسز رايق :- طيب استنى لما الرايق يجى واديلى الفلوس

سقراطه :- ميييييييييييييين الرايق !!!!!!!!!!!!

مسز رايق :- اه الرايق اصل هو اللى اقترح يلموا لام حسين والناس عرضوا عليه يمسك هو الفلوس ويفكر فى المشروع

سقراطه :- ده شارع ده ولا جناح فى مستشفى العباسيه ؟ برضه فى حد يمسك الرايق فلوس ؟؟ الناس دول اتهطلوا ولا ايه ؟؟

مسز رايق :- لا يانعمه هو الرايق مش حرامى برضه .. هو يمكن عبيط لكن مش حرامى

سقراطه :- ماهو دفاعك عنه ده هو اللى جايبك لوراء ... اهو المحروس امين الصندوق وصل اهو

الرايق :- هااااااااااى ايفرى بدى ... هى النطره نطرت فى شقتنا احنا بس ولا ايه ؟؟ هيييييييييييه يا نطره رخى رخى على قرعه بنت اختى ...بنت اختى قرعه قرعه مالهاش ولا شعره

سقراطه :- مطره مين يا متعوس مفيش نطره ولا حاجه

الرايق :- اصلى وانا داخل الشقه شفت طينه ووحل قاعده على الانترير قلت يمكن تكون النطره نطرت هنا بس

سقراطه :- قصدك ايه يا رايق ؟؟؟ وحل البرك لما يلفك من راسك لرجلك .. انا برضه وحل وطينه ؟

الرايق :- نو نو نو انا مش اقصد كده .. دونت تفهمينى غلط يا سقاريطو .. لكن انا قصدى ان انتى فيكى شبه كبير من الطينه والوحل

مسز رايق :- يا جماعه صلوا على النبى مش كده هو انتوا ناقر ونقير مع بعض كده على طول .. ها يا رايق ايه اخبار مشروع الست ام حسين

الرايق :- خلاص انا خلصت كل حاجه والحمد لله .. اييييييييييييييه ربنا يقدرنى على فعل الخير . انا اشتريت الحاجه ووديتها بيت الست ام حسين وربنا يكرمها ويوفقها

سقراطه :- انا مش عارفه ازاى اهل الحته دول يمسكوا واحد اهبل وعبيط زى حالاتك حكايه زى دى ... مفروض اللى يمسك حاجه تخص الناس وعمل الخير يكون انسان كفء للعمل ده ويكون انسان نضيف وذكى وملو هدومه

الرايق :- ايه ده هو احنا ساكنين جنب زريبه ولا حاجه ؟؟ اصلى سامع صوت كده زى صوت الجاموسه .. يا ترى جاى منين الصوت ده ؟؟

سقراطه :- احنا اصلا مش هناخد منك غير طول اللسان .. المهم عملت ايه بالفلوس يا عبقرى

الرايق :- يييس ذاتس ذا كويتشن .... شوفى يا متخلفه انا ولله الحمد جمعت 35 الف جند من الحته وحتت الحته والشوارع اللى جنبنا ورحت اشتريت ....

سقراطه :- ااى يا دماغى ايه ده فى حد بيحدف طوب من الشباك ..... الحقوا الحقوا

مسز رايق :- يالهوىىىىىىى الناس بتحدفنا بالطوب .. هيكسروا الشقه

الرايق :- ده اكيد ضريبه الشهره .. لازم كلنا ندفع ضريبه الشهره

سقراطه :- شهره مين وضريبه مين يا متعوس هو انت عملت ايه بالفلوس ؟

الرايق :- نو نو نو... اوعى تفهمى الموضوع غلط انا لايمكن اسرق ابدا . بس الناس دى اكيد مش مقدره الفن مش مقدره المواهب مش مقدره الرقى والجمال والتذوق

سقراطه :- رقى مين وجمال مين وتذوق مين ؟؟؟؟ هو انت عملت ايه يا رايق ؟؟؟ .. الناس هيكسروا البيت بالطوب

الرايق :- الناس دى مش فاهمه حاجه .. انا اخذت ال 35 الف جند .. ورحت اشتريت للست ام حسين اجدع بيانو فى محافظه جمهوريه مصر كلها .. علشان تعزف عليه كام سرفوانيه من سيرفونيات الموسيقار الكبير دارهوفن .. وتهدى اعصابها وتعرف تفكر فى مستبقل عيالها

الأربعاء، 24 سبتمبر 2008

جزمه تزحلق على السيراميك

الرايق :- هاااااااااااااااى ايفرى بدى ... شيلوا معايا يا انجالى الهدايا كتيييييييييييييير

الاولاد :- هيييييييييييييييه بابا جه ....هييييييييييييييه بابا جه

مسز رايق :- ايه ده كله يا رايق ... انت ورثت ولا ايه ؟؟؟؟؟

سقراطه :- يا ما جاب الغراب لامه ....ايه ده كله انت سرقت البنك الاهلى ولا ايه ؟؟؟؟

الرايق :- اعوذ بالله ...سقراطه هنا .... انتى مش مع اخواتك محبوسه فى رمضان ؟؟؟؟ ايه طلعك ؟؟؟؟ وخرجتى امتى من القمقم ؟؟؟؟

سقراطه :- محبوسه ؟؟؟؟ ليه كنت جنيه ولا عفريته يا رايق ؟؟؟؟

الرايق :- تعالوا اتفرجوا على هدايا العيد ... ادى اول هديه اهيه

سقراطه :- جزمه تزحلق على الجليد ....ههههههه ...مش بقولك ياما جاب الغراب لامه

مسز رايق :- ايه ده صحيح يا رايق هتعمل بيها ايه دى ؟؟؟؟

الرايق :- سيبك انتى مسز رايق دونت تسمعى كلام الكريزى سقراطه ام السقاريط دى انا لسه عندى مفاجاه

سقراطه :- ورينا يا زعيم عصرك واوانك .... ايه ده كمان مضرب تنس ... ومضرب جولف .... وخيمه جاهزه ... ايه ده فين هدوم العيد ؟؟؟

الرايق :- بس يا مجنونه انتى هدوم مين هو انا لسه صغير على الكلام ده

الرايق الصغير :- هدوم لينا احنا يابابا ... انت نسيتنا ولا ايه ؟؟؟ هو انت لاقينا جنب جامع

الرايق :- بس يا ولد ... الهدوم دى شكليات وانا مش ببص للشكليات دى .... انا محضر لكم مفأجاه

مسز رايق :- شكليات ايه ونيله ايه يا رايق ... فين هدوم العيد انت مش واخد ال 500 جنيه بتوع الجمعيه تجيب للاولاد هدوم العيد

الرايق :- بصى مسز رايق ... دونت وورى ...انا عامل حساب كل حاجه ... الرايق مبيفوتشى حاجه بتيتا

سقراطه :- خلينا وراء الكداب لغايه باب الدار .... ايه هى المفاجأه يا رايق ؟؟؟؟

الرايق :- هو انتى بتحشرى نفسك فى الكلام ليه ؟؟؟ عارفه يا سقراطه .... انا نفسى اروح انا وانتى جنينه الحيوانات ..واكيد اكيد هاخرج من غيرك ... والحراس هناك هيشكرونى قوى قوى قوى

سقراطه :- انا يارايق .... طيب بص لنفسك فى المرايه ... اللهم انى صايمه

الرايق :- شط اب يور ماوس ... بصى مسز رايق انا عندى ليكم مفاجاه جنان

مسز رايق :- خير يا خويا

الرايق :- هنروح نقضى العيد فى باريس

الاولاد :- هييييييييييييييييه هنروح فرنسا ....هنروح فرنسا

الرايق :- مين جاب سيره فرنسا يا اغبياء ... هنروح باريس عاصمه المانيا

سقراطه :- ياعم المانيا المانيا مش مشكله ....بس هتروح المانيا ازاى وانت كحيان وعدمان وندمان

الرايق :- موتى بغيظك يا سقراطه .... بصى مسز رايق ... بصوا يا اولاد ... حموده اخو العلامه الكبير حسن الفراش مسافر بكره يدور على شغل فى لبنان وهيطلع على ليبيا ومنها للسودان ويروح قبرص ومنها لالمانيا ....وحسن وعدنى اول ما اخوه يلاقى شغل هيبعتلى انا والعيله نقضى العيد هناك

الجميع :- اممممممممممممممممممممم

الرايق :- ايه مالكم ؟؟؟؟؟؟؟؟؟؟؟؟؟؟
فى ايه ؟؟؟؟
محدش بيرد ليه ؟؟؟؟؟؟؟؟؟؟؟؟؟
مش مهم ... اروح اجرب الجزمه ....واتزحلق بيها على السيراميك

الأحد، 20 يوليو 2008

دروس بالعافيه ..فى التاريخ والجغرافيا


سقراطه :- اهو الفلحوس جوزك وصل

مسز رايق :- اهلا ياسى عبده حمدلله على السلامه

الرايق :- شرفتى كازينو الرايق يا سقراطه ...انتى رجلك خدت على بيتنا يعنى...ماتجيبى جوزك وعيالك وتقعدى هنا واحنا نقرفص على السلم

مسز رايق :- عيب كده ياسى عبده ...ماتزعليش منه يا نعمه ده بيهزر

سقراطه :- يهزر ولا ميهزرشى ...انا باجى هنا لبيت اختى مش لبيت الرايق

الرايق :- خليكى قاعده ياختى فى بيت اختك .....سواق لورى يكون اعمى واطرش يسلم عليكى بالدوبل

سقراطه :- بطبرطم بتقول ايه يا رايق ؟؟؟؟؟؟؟؟

الرايق :- لا ابدا ..انا داخل اصحح الكراريس.. اصل الاشاره فتحت

سقراطه :- هههههههه .....كراريس !!!!!!!.....هو انت بتعرف تصحح كراريس ؟؟...وكراريس ايه دى بقى يا فالح ؟؟

الرايق :- بصى يا سقراطه ....مساهمه منى انا الدكاتره عبده الرايق فى حل مشكله نحو الاميه ...قررت اعلم اهل الحته مجانا بدون اى ماااااانى ...واتفرج على الحلاوه حلاوه

سقراطه :- اسمها محو الاميه يا رايق ...مش نحو الاميه

الرايق :- نحو الاميه يا متخلفه ....بمعنى اننا نجرى نحو الاميه ونمسحها باستيكه

سقراطه :- نحو ولا محو ...مش مشكله ...هى فكره كويسه جدا يارايق بس ياريت تيجى من حد تانى غيرك

الرايق :- ليه كده يا سقاريطو هو انا كخه ولا ايه ؟؟؟

سقراطه :- لا انت مش كخه ..ورينى الكراريس دى

الرايق :- ياريت تغسلى ايدك بالليفه والصابونه الاول

سقراطه :- ورينى بس كده...ايه ده ...مصر دوله خليجيه !!!!!!!!!!

الرايق :- طبعا يا جاهله ....الدكاتره عبده الرايق بيصحح الجغرافيا والتاريخ ....مصر مش واقفه على خليج السويس

سقراطه :- ايوه بتطل على خليج السويس

الرايق :- تبقى دوله خليجيه ولا لأ

سقراطه :- لا ناصح من يومك ....وايه ده كمان ....الناس ايام صلاح الدين مكنوش يعرفوا الملابس

الرايق :- طبعا يا فالحه ..صلاح الدين بنى ايه ؟؟؟؟

سقراطه :- بنى القلعه

الرايق :- طيب لو كانوا يعرفوا الهدوم مش كانوا لبسوها

سقراطه :- مش بقولك ناصح ..وايه ده كمان ....اكبر بلد بتنتج الحبر هى السودان ...وايش عرفك انت ؟؟

الرايق :- طبعا انتى جاهله ....السودان فيها النيل الازرق ولا لأ ؟

سقراطه :- فيها النيل الازرق

الرايق :- خلاص خدوا منه الحبر ... انتى لازم تدخلى نحو الاميه يا سقراطه

سقراطه :- ههههههههه .....لامتشكره خالص يارايق ...اصل العلم بتاعك ده صعب على الواحده اللى زى حالاتى

الرايق :- انا ممكن احجزلك مع المعاقين ذهنيا

سقراطه :- طيب قولى يا رايق ...مين اول من نادى بحريه المرأه ؟؟؟؟

الرايق :- قنوات الدش طبعا هى دى عايزه سؤال

الأربعاء، 9 يوليو 2008

شيكات ...نو نو نو


ترررررررن ....تررررررررررررن ...ترررررررررن

الرايق :- الو

صوت :- الو السلامه عليكم ...معايا استاذ عبده الرايق

الرايق :- وعليكم السلام ...استاذ مين ؟؟ انتى اتعميت ولا ايه ؟؟؟ مش شايفنى فى السماعه ؟؟؟ ... معاك الدكاتره عبده باشا الرايق

صوت :- انا بكلم حضرتك يا دكاتره بخصوص الشيك

الرايق :- نو نو نو انا الدكاتره عبده الرايق لايمكن اقبل ابدا شيكات ...انا عايز الجايزه كاش مانى ..وتكون فلوس مش معلمه ..انا لايمكن ارضى ابدا بالشيكات حتى لو اتلمت السويد كلها برجالتها ونسوانها وعيالها .. انا دونت موافق

صوت :- يا دكاتره اسمعنى ارجوك

الرايق :- نو نو نو انا مش هاسمعك ومتضيعشى وقتى مع السلامه

سقراطه :- مين ده يا رايق ؟؟؟

الرايق :- اه ..هنا بقى وتعملى نفسك قريبه فريد الاطرش ...وتعملى نفسك مش سامعه حاجه

سقراطه :- انا سمعاك بتقول شيك والجايزه والسويد ..فى ايه يارايق ؟؟؟؟

مسز رايق :- ايه يا عبده الحكايه ياخويا فى ايه ؟؟؟؟

الرايق :- الجماعه بتوع جايزه موبيل عايزين يدونى الجايزه بالشيكات ....وانا قولتلهم نو نو نو... انا لايمكن اعمل زى البشر التانيه واقبل شيكات ..لازم كاش مانى يا اما بلاش

سقراطه :- طيب ليه ؟؟؟وبأماره ايه ؟؟؟وعلشان ايه ؟؟؟

الرايق :- طول عمر لسانك طويل يا سقرووووطه ... وادى السويد كلها بتحفى ورايا علشان يدونى الجايزه وانا مش موافق ...انا داخل المكتبه بتاعتى اطالع الكتب الثقافيه ..انا مش هضيع وقتى معاكم ...ابقى زروينا بعد كام الف سنه ياسقراطه ....سلالالالالالالام

سقراطه :- هو ايه الحكايه ياختى الرايق جوزك بقى مثقف وهياخد جايزه نوبل ؟؟؟؟؟

مسز رايق :- مثقف مين يا نعمه ..انتى بتصدقى ؟؟؟ قال مثقف قال ..بلا نيله

سقراطه :- ماهو بيقول انه داخل المكتبه بتاعته

مسز رايق :- مكتبه ايه يا حسره ...ده عامل صندوق قديم مكتبه وحاطط فيه كام مجله من بتوع سمير وميكى وبطوط وكتب المدرسه بتاعه العيال وكرارسهم القديمه ...وكل شويه يقعد يقراء فيهم

سقراطه :- امال ايه حكايه الجايزه دى ؟؟؟....الكلام فعلا قدامنا اهه

مسز رايق :- والله مانا عارفه بقى ...يمكن يكونوا اتهبلوا ولا حاجه هما كمان

ترررررررررررررررن ......ترررررررررررن ...ترررررررررررررن

الرايق :- انا جاى اوعوا حد يرد ..الجماعه دول مش ناويين يجيبوها البر ....الو

صوت :- الو يا دكاتره

الرايق :- انت تانى يا بتاع الشيك ؟؟؟

صوت :- ايوه يا دكاتره ..ياريت تسمعنى ومتقفلشى السكه

الرايق :- اخر كلام عندى ...الجايزه تيجى فلوس مش متعلمه ..وميعاد التسليم الساعه واحده بالليل بعد كمين الكيلو 109 طريق القاهره - السويس وياريت متبلغوش البوليس ..مع السلامه

سقراطه :- نهارك زفت يارايق بوليس ايه ؟؟؟؟؟

الرايق :- مش هما بيقولوا كده فى الافلام ؟؟؟ انا عملت زى الافلام ...واطلعى انتى منها يا ام السقاريط

سقراطه :- طيب يا اخويا خلى المتكلم عاقل والمستمع مجنون ...انا عايزه اعرف هيدوك جايزه نوبل على ايه ؟؟؟؟

الرايق :- يا متخلفه ياللى شبه اختك مسز رايق ....هيدونى جايزه نوبل عن علمى الكبير

سقراطه :- فى ايه ؟؟؟؟؟؟؟؟ ماتخلى الطابق مستور احسن

الرايق :- بصى يا سقراطه انا اتعمل عليا 140 الف بحث عالمى واكدت اللجنه انى استحق الجايزه عن جداره

سقراطه :- ومين بشرك بقى بالخبر الحلو ده ؟؟؟؟

الرايق :- العلامه الكبير الواد حسن باشا الفراش ...وكمان قالى انهم قعدوا يصقفوا للرايق وانجازاته 4 ايام بلياليهم

سقراطه :- وانت مصدقه ؟؟؟؟؟؟؟

الرايق :- ومصدقوش ليه ؟؟؟وبعدين اديكى شايفه التليفونات بتجرى ورايا ازاى ...عارفه يا سقراطه ...انتى اول واحده هتستفاد من الجايزه . هود يكى عند اجدع دكتور تجميل فى السويس يقصلك لسانك من لغلوغه

ترررررررررررررررن .......ترررررررررررررن ....تررررررررررررررن

الرايق :- رن للصبح انا مش هارد عليك

سقراطه :- اوعى كده يا رايق ....انا هارد على التليفون ...الو

صوت :- الو ...لو سمحتى يا مدام قولى للاخ اللى عندك لو مارحشى بكره للمعلم اسامه بتاع التلاجات ودفع الشيك اللى عليه باقى قسط التلاجه هيوديه المحكمه وقد اعذر من انذر ...سلام عليكم

السبت، 21 يونيو 2008

سقراطه ...مريضه


مسز رايق :- ازيك يانعمه ياختى الف الف سلامه عليكى ..هو انا اقوم انتى تتعبى ؟؟؟

سقراطه :- الله يسلمك ياختى برضه تعبتى نفسك وجيتى انتى والرايق ؟؟؟؟؟

الرايق :- هااااااااااى سقراطه ....متتصوريش انا فرحت قد ايه ؟؟؟...قصدى زعلت قد ايه لما عرفت ان انتى بتودعى ....هو الدكتور قالك فاضل كام يوم ؟؟؟؟

مسز رايق :- حرام عليك يارايق ..فال الله ولا فالك .. برضه ده وقت هزار ومناكفه ؟؟؟

الرايق :- مش انتى يا وليه قولتى عايزين نزور اختى سقراطه علشان عيانه قوى ومبتتحركشى من مكانها ؟؟؟

سقراطه :- برضه فيك خير يا رايق ...دول بس شويه برد

الرايق :- وات ؟؟؟....شويه برد فى الصيف ؟؟؟...انتى معندكيش بوصله ولا ايه ؟؟؟..فى حد فى الدنيا ياخد برد فى الصيف .؟؟؟...ممكن معلشى تقولى شويه حر

سقراطه :- هو البرد له موسم ؟؟؟ انا اخدت دور برد من المروحه

الرايق :- ههههههههه ....بتهزرى ؟؟؟...طبعا شكلك بتهزرى ...اول مره فى حياتى اشوف مروحه بتعدى انسان ...انت بوستيها ؟؟؟...ولا شربتى من كوبايه المروحه شربت منها ؟؟؟...ولا اكلتى بمعلقتها ؟؟؟

سقراطه :- لأ ظريف ....ههههههههه.......انت جاى لوحدك ولا جاى مع الماما ؟؟؟؟...مش بقولك ظريف يا مضروب وبكره لما تكبر هتبقى ظرف ...ونرميك فى صندوق البوسته ...ونلزق على قفاك طابع ...ونكتب على ضهرك شكرا لساعى البريد ...وكل ما واحد يستلمك يقطعك

الرايق :- حتى وانتى بتحتضرى لسانك طويل ...ماتيبجى اقصهولك احسن تفيصى وانتى مش حالقه لسانك.
ورينى ايدك اكشف عليكى

سقراطه :- لا يا خويا متشكرين افضالك انا كاشفه عند الدكتور وجايبه علاج ومش محتاجه لكشف سعادتك ...نقطنا انت بسكاتك احسن

الرايق :- نقطه ؟؟؟؟؟....ليه انتى ولدتى ولا ايه ؟؟؟....هو الزياره عندكم بنقطه ؟؟؟؟...هو انا جاى ازورك فى فرح بعوالم ولا ايه ؟؟؟؟
هاتى ايدك بلاش تخاريف ولعب عيال

مسز رايق :- ماتسيبها يارايق فى حالها البنيه تعبانه حرام عليك

الرايق :- شط اب يور ماوس ....امال انا جاى وخابط المشوار ده كله وجايب معايا كيلو وربع تفاح وفى الاخر ماكشفشى على المريضه
نو
نو
نو
انا لازم اقوم بواجبى ...هاتى ايدك ...اول القصيده اهه ...مش قصه ليه ضوافرك ؟؟؟؟.....عايزك تجوابى عليا بسرعه ومن غير ما تفكرى وانتى مغمضه عنيكى....6787 ×778 +987654 × 67654 - 7632 = كام ؟؟؟؟

سقراطه :- انت هتهزر ؟؟؟سيب ايدى

الرايق :- طبعا مش عارفه ....لا اله الا الله .....الحاله متأخره خالص ..هسألك سؤال تانى ..لو جاوبتى عليه ممكن يكون فيه امل ...لكن لو مقدرتيش هنضطر نعملك عمليه

سقراطه :- معاك للصبح يا رايق ...اسأل

الرايق :- فى عام 1942 اى قبل انتهاء الحرب العالميه ب 3 سنين كانت هناك معارك منتشره فى انحاء العالم ومنها باريس ..السؤال بقى بيقول فى يوم 26 مارس من نفس العام دارت معركه قتل فيها جندى فرنسى وكانت معه محفظه بها عده صور
1 - كم صوره كانت فى المحفظه ؟؟؟
2 - لمن كانت تلك الصور اذكرى الاسماء ثلاثيه ؟؟؟

سقراطه :- ههههههه ...مش بقولك دمك يلطش ...مش عارفه

الرايق :- ايييييييييييييييييييه دنيا ....احنا عملنا اللى علينا والباقى على ربنا....للاسف يا جماعه ...احنا مضطرين نغير المخ ...وننفخ الرئتين ...ونبدل تروس القلب ...ونغير المعده والامعاء والكبد ...وربنا يستر

مسز رايق :- ياراجل اتقى الله حرام عليك انت ايه ..كل حاجه واخدها هزار كده ؟؟؟

الرايق :- هو انا لو كنت بهزر كنت جبت التفاح وركبت مواصلات وجيت على هنا ؟؟؟؟

سقراطه :- اه تفاح و مواصلات ؟؟؟؟....بقولك ايه يا رايق خد يا خويا ال 50 جنيه دى حوشهالى معاك هاخدها منك بعد 100 سنه لو عشنا ..وممكن تصرفها دلوقتى براحتك

الرايق :- ماشى وانا موافق ...بس ده حق نفخ الرئتين فين الباقى .؟؟؟؟؟؟؟؟؟؟؟

السبت، 14 يونيو 2008

الرايق وصل للعالميه

تحديث
-------
كان اسمهم عاشقين ... ودلوقتى من بعضهم مخنوقين
تدوينه جديده للمفقوعه مرارتها
على مدونه
.
.
===================
المذيعه :- اعزائى المشاهدين ..اهلا ومرحبا بكم فى برنامجكم سماء العلم ..يسعدنا ان نستضيف فى هذه الحلقه واحدا من اعلام العلم والثقافه فى جمهوريه مصر العربيه ..السيد \ عبده الرايق الحائز على جائزه نوبل

الرايق :- سيد مين ومصر مين يا مزمزين .....انا الدكاتره \ عبده بيه الرايق .واحد من اعلام العلم واثقافه فى مصر والعالم العربى والكره الارضيه ..وبعدين اسمها جايزه موبيل مش نوبل ..انتى هتعملى زى سقراطه ولا ايه ؟؟؟؟؟؟

المخرج :- ستوب !!!!!!!!لو سمحت يا دكتور عبده ممكن تسيب الاستاذه لمياء هى عارفه شغلها كويس ...انا ارجوك لو سمحت

الرايق :- نو نو نو ...انا مش الدكتور عبده الرايق ...انا الدكاتره عبده الرايق

المخرج :- ياسيدى على عينى وعلى راسى ...لو سمحت يا سياده الدكاتره عبده الرايق سيب المذيعه تقوم بشغلها ....يلا يا جماعه ...ثرى ..تو ...وان

المذيعه : - احنا نحب نعرف من سعادتك ليه الدول الاوروبيه اتقدمت عن الدول العربيه رغم اننا اصحاب حضارات قديمه مثل الحضاره الفرعونيه والفينيقيه

الرايق :- بالذمه ده سؤال يرضى ربنا ؟؟...بقى انا واخد عربيه مخصوص من السويس وجاى هنا اسجل معاكم علشان تكلمونى عن الفينيكيه ..انا مالى ومال الفنيك ..هو احنا هنا للعلم ولا هنغسل حمامات ...ادى اللى ناقص نتكلم عن الفنيك كمان

المخرج :- ستوووب ....فنيك ايه يا دكاتره عبده بيه ...بتقولك الحضاره الفينيقيه ...غير الفنيك خالص ....بلاش السؤال ده يا لمياء ...يلا يا جماعه جاهزين ؟ ...ثرى ..تووو ...وان

المذيعه :- الدكاتره \ عبده الرايق ..ممكن حضرتك تقولنا ..ليه رشحوك لجايزه نوبل ؟؟ ومتى ستذهب سيادتك الى السويد لاستلام الجائزه ؟؟؟؟؟

الرايق :- ليه رشحونى ؟؟؟؟؟ياسااااااااااااااااتر يا رب ....هى الناس مبتحبش الخير لبعضيها كده ليه ؟؟؟ زعلانه انتى انهم رشحونى ؟؟؟ روحى اسئاليهم انتى ...ده ايه ده ..حقد ..وبعدين اروح السويس استلم الجايزه ؟؟؟...طيب مانا من السويس جبتى ايه من عندك

المخرج :- ستووووووووب ....سويس ايه وحقد ايه يا استاذ ؟؟مش ممكن كده ارجوك عندى شغل تانى ....ياريت تجاوب على المذيعه عدل ارجوك
يلا يا جماعه ...جاهزين ؟ .....ثرى ...تو ...وان

المذيعه :- الدكاتره \عبده الرايق ..ممكن حضرتك تقولنا انت حصلت على كام دكتوراه ؟؟؟

الرايق :- ستووووووب ...ايه كام دكتوراه دى هو انا مش قلتلك بلاش الحساب ارجوكى انا ميح فيه خالص ؟؟؟

المخرج :- ستووووب ....ماتتفضل هنا مكانى يا استاذ رايق وانا اروح بيتنا ...انت مال حضرتك ستووووب ولا ما ستوبش ...لو سمحت ابوس ايدك ..خلصنا من اليوم الاسود ده
يلا يا جماعه ..جاهزين ؟ ثرى ..تو ...وان

المذيعه :- كنا عايزين نعرف رأى حضرتك فى العولمه ؟؟؟

الرايق :- بصراحه انا بحب العولمه جدا .ومن اشد المعجبين بالست تحيه كاريوكا والست نعيمه عاكف والست ام تامر ...بصراحه انا بحب الفرح لما يكون فيه عولمه ...الزق جنب المسرح ..واى نقطه طايره كده ولا كده القطها ..بصراحه كل فرح فيه عولمه بيطلعلى كام جند محترمين

المخرج :- ستوووووب ....محمد يا حسن ...استااااااااذ محمد ...انا مش هاشتغل الحلقه دى ....سوورى ...انت جايبلى واحد لاسع خالص ..وانا اصلا مش ناقص
خلاص ماشى علشان خاطرك ...بس وحياه ابوك يا محمد كلمه كلمتين انا خلاص مرارتى هتنفجر
يلا يا جماعه ....جاهزين ؟؟؟...ثرى ..تو ..وان

المذيعه :- استاذ عبده ..نحب نعرف حضرتك اخذت جائزه نوبل عن اى فرع من فروع المعرفه

الرايق :- اى فرع ؟؟؟؟؟؟؟هما فرعين مفيش غيرهم طول عمرنا نسمع عنهم فرع دمياط وفرع رشيد...وبعدين انا مش بدق ..دمياط ماشى ..رشيد ماشى ...كله محصل بعضه

المخرج :- ستوووووووووووووووووووب ....انا يستحيل اكمل مع الجدع ده

الرايق :- يستحيل مين يابا ...انا جاى مخصوص من السويس وصاحى الساعه 11 بالليل وجاى فى عربيه مخصوص ب 2000 جند وفى الاخر تقولى مش هنكمل البرنامج

المخرج :- عربيه ايه دى اللى تاخد 2000 فى مشوار مصر السويس ؟؟؟؟؟؟؟؟

الرايق :- انت اصلا مش عايش فى الدنيا ..زانا رحت الموقف بتاع التاكسى ونقيت عربيه مدندشه وقلت للسواق تودينى التليفزيون فى مصر وتاخد كام ؟؟؟قام السواق بصلى بكل تناحه وقله ذوق وقالى ..دى عربيه باربع كوتشات ..لو عايز عجله على قدك روح اجرك واحده ...رحت انا قلت له انا هادفع الاجره قبل ما نتحرك ..عايز كام ؟؟؟ قام السواق قالى عايو 500 جند حسبتها فى عقل بالى 500 جند فى اربع كوتشات يعنى السواق عايز منى 2000 جند ...رحت مديله ال 2000 جند وقلت له توكل على الله

المخرج :- ههههههههههه.....اربع كوتشات ؟؟؟طيب علشان ضحكتنى انا هاكمل الحلقه
جاهزين يا جماعه ؟؟؟؟ ...ثرى ...تو ..وان

المذيعه :- استاذ عبده .هل تؤمن بالحدود الجغرافيه والسياسيه بين الدول العربيه بعضها البعض ...ام تتمناها قوميه عربيه واحده ؟

الرايق :- هى لو عربيه واحده مش هنعرف نركبها كلنا ..لكن ممكن اتوبيس يكفينا ..ولو حد مروح فى طريق السويس اوصله

المخرج :- ستوووووب ...فركش يا جماعه ....استاذ عبده ..انا بحييك جدا جدا واحنا لاغينا البرنامج خالص من على خريطه التليفزيون .زوادى يا عم 2500 جنيه للعربيه المخصوصه بتاعتك

الرايق :- لكن انا دافع 2000 جند بس

المحرج :- حضرتك دفعت 2000 جنيه على الاربع كوتشات بس ..الظاهر حضرتك نسيت الاستبن

مسز رايق :- عبده ..انت يا عبده ....سى عبده ...اصحى ياسى عبده

الرايق :- انا فين يا وليه ؟؟؟؟وفين ال 2500 جند ..وفين المخرج ؟؟؟ وفين المذيعه ؟؟؟

مسز رايق :- مخرج ايه ومذيعه ايه اصحى وفوق كده علشان تروح الشغل

الرايق :- منك لله مسز رايق كنتى استنى لما احط الفلوس فى جيبى

السبت، 7 يونيو 2008

الرايق فى نهائى رولان جاروس


اصدقائى الاعزاء ادعوكم لزياره مدونتى المشتركه
مع فرنسا هانم وهى

سقراطه :- ازيك يا ختى دلوقتى عامله ايه ؟؟؟؟

مسز رايق :- الحمد لله على كل حال

سقراطه :- فى ايه ياختى هو الرايق متضايق كده ليه ؟؟؟

مسز رايق :- اهو على الحاله دى من امبارح ..وقلتله خد البرشامه بتاعتك مش عايز يسمع كلامى ..واهو عماله ينفخ ويفش من بدرى

سقراطه :- مالك يا ريق فى ايه ؟؟؟؟؟؟؟؟

الرايق :- هششششششششششششششششششششششششش

سقراطه :- ايه يا راجل يا خرفان انتى ...انت بتهشنى هو انا دبانه ؟؟؟؟؟؟؟

الرايق :- هسسسسسسسسسسسسسسسسسسسسسسسس

سقراطه :- هو جوازك ماله يا ختى ...عماله هش وشويه هس هو فى ايه ؟؟؟؟؟؟؟؟

مسز رايق :- مانا بقولك من امبارح وهو مكلضم وكل ما حد يكلمه يشاور بايده وميتكلمشى ومفيش على لسانه الا هس او هش

سقراطه :-لالالالالا احنا مش لازم نسكت عليه ...يمكن جراله حاجه ولا محتاجه.......اشوفه ماله ....رايق ...يا رايق ...انت يا رايق

الرايق :- هششششششششششششششششششششش

سقراطه :-مالك يا رايق ؟؟؟....انت سامعنى ؟؟؟؟.......هما بابا وماما سابوك هنا لوحدك ؟؟؟.....انت تعرف تروح بيتكم يارايق ؟؟؟؟.....

الرايق :- هسسسسسسسسسسسسسسسسسسسسس

سقراطه :- لا حول ولا قوه الا بالله...........فى ايه يا رايق ؟؟؟.....القطه اكلت لسانك ؟؟؟؟.....طيب لو نطقت وقلت مالك هابعت اجيب ساقع واعمل حسابك معانا فى ازازه

الرايق :- هشششششششششششششششششششششششششش

سقراطه :- لا ده باين الموضوع كبير قوى......فى ايه يا رايق ؟

الرايق :- انا هاطق انا هافرقع ....انا خلاص روحى ان ماى نووز

سقراطه :- فضفض يا خويا احنا برضه اهلك

الرايق :- فيفى عملتها معايا ولعبت معايا الدنيئه

سقراطه :- فيفى ؟؟؟؟؟؟؟؟ ..مين فيفى دى ؟؟؟؟؟؟؟

الرايق :- ما هو انا كنت ساكت وكاتم فى نفسى لانى عارف ان انتم اصلا متخلفين مش فاهمين حاجه

سقراطه :- الله يحفظك مش جديد عليك طوله اللسان ...لكن مش وقته ....مين فيفى دى ؟؟؟؟؟؟

الرايق :- فيفى بتاعه الاتحاد الدولى لكره القدم

سقراطه :- هههههههههه ......اسمها فيفى ؟؟؟؟؟؟ .....اسمها فيفا يا عم الرايق ...مالها بقى بيك الفيفا

الرايق :- فيفا بقى وشغل مصاطب ..قلنا اسمها فيفى ...كمان دى هتأوحى فيها

سقراطه :- فيفى فيفى مش مشكله ...مالها بقى فيفى ؟؟؟؟

الرايق :- بطوله الامم الاوروبيه خلاص كلها ساعه وتبدء ومحدش اتصل بيا

سقراطه :- طيب هيتصلوا بيك ليه ؟؟؟؟

الرايق :- طبعا لازم يتصلوا بيا افتتح البطوله ....انا بقالى سنتين بتعلم سويسرى وباخد فيها دروس علشان افتتح البطوله ....كل فلوسى راحت على الدروس وفى الاخر محدش يتصل بيا ؟؟؟.....ليه ده انا اخاصم فيفى ليوم الدين

سقراطه :- سويسرى ايه يا خويا انا عمرى ماسمعت ان فى لغه سويسريه ؟؟؟؟

الرايق :- طبعا جاهله ومتخلفه واخت المتخلفه مراتى (لا مؤاخذه مسز رايق ) الولد حسن الفراش جده سويسرى وبيعرف يتكلم سويسرى وبقاله سنتين كل شهر يا خد منى عشرين جند علشان يعلمنى سويسرى

سقراطه :- واتعلمت ايه يا فالح

الرايق :- الواد حسن الفراش قالى ان اللغه السويسريه هى هى اللغه العربيه لا العرب كانوا محتلين سويسرا لمده سبع تلاف سنه لغايه لما سويسرا استقلت من 4 سنين علشان كده تلاقى كل كلامهم عربى بس بالمقلوب ..يعنى قلب بالسويسرى بلق ...وحصان بالسويسرى ناصح ...وولد بالسويسرى دلو ...وبنت بالسويسرى تنب ....وعسكرى بالسويسرى يركسع

سقراطه :- بس بس بس وحياه ابوك ماتكمل ....من حقك ياخويا تضايق اقعد هناك مكانك وانفخ وفش براحتك

الرايق :- خلاص لو مبعتوليش تبقى دى قطيعه مع فيفى وبكره انشاء الله هاروح فرنسا اسلم الكاس بتاعه رولان جاروس للفايز فى نهائى التنس ....مش عايزه حاجه من باريس يا سقراطه ؟؟؟؟
سقراطه ؟؟؟ ....يا سقراطه ؟؟؟؟؟ ؟...انتى يا سقراطه

سقراطه :- هششششششششششششششششششششششششششششش