الاثنين، 25 فبراير 2008

يوميات الرااااااااااااااااااايق


جوود مورننج مسس رااااااايق

وعليكم السلام ورحمه الله وبركاته . مالك يابودى مبهدل كده ليه ؟

وات ؟.ايه مبهدل دى ؟ انتى وليه بلدى خالص يعنى ايه مبهدل

قال على رأى المثل اللى ميشوفشى من الغربال ...... مبهدل فى هدومك .القميص طالع من البنطالون والجيب بتاع السويتر طالع من مكانه والجزمه غرقانه طينه

ضريبه الكفاح يا متخلفه .مشوار من شغلى فى الحى لغايه هنا 9 محطات . محطه تنطح محطه

انت برضه مش عايز تركب الاتوبيس

وااااااااااات ؟ اتوبيس بتاع الغلابه .......نو

ولأ ليه يا خويا ؟

يو سبيك انجلش ؟ فهمتى يعنى ايه نو ؟..غريبه والله

ما غريب الا الشيطان مانت طول النهار بتنونو كل شويه نو
لغايه لما خلتنى احس انى عايشه مع قطه

واااااااااات ؟ انا قطه يا وليه ؟

لا يا خويا قصدى قط....قط كبير .... نمر يعنى

يس .. قصدك تايجر ...تمام تمام فعلا نمر .. شوفى ياوليه انا امشى على رجلى ولا انى احطها فى الباص
عارفه يا متخلفه . انا زمايلى فى الحى معاهم عربيات وفى ناس معاها شقق تمليك وناس معاها عماير لكن انا نو والف نو
عيش شريف تموت نضيف
طبعا ولا انتى فاهمه حاجه
غلطه عمرى انى اتجوزت واحده متخلفه زيك
الاكل جاهز ؟؟؟

ايوه يا خويا جاهز من بدرى

عامله ايه انهارده مسس رايق ؟

فضله خيرك كشرى

والصلطات ايه والحلو ايه ؟

صلطات وحلو كمان عندك قرنين فلفل خضر اجبهم والحلو نص باكو بسكويت من بتاع العيال بتاع التغذيه فى المدرسه
الا مقلتلكشى اختى كانت هنا انهارده وبتقولى ان جوزها مطين عيشه اللى خلفوها على الالف جنيه السلف اللى عندنا وبقالهم سنتين

امممممممممممممممممممممممممم

عبده
ياراااااااااااااااق
عبده

فى ايه يا مسس رايق ؟

انت بتبص للسقف ليه يا خويا ؟

مش عاجبنى حال لبنان ازاى بلد تقعد 3 شهور من غير رئيس ازاى ؟؟؟؟

لبنان ؟؟ بقولك اختى عايزه فلوسها يارايق

لازم يبقى فى رئيس ويتوحد الشعب اللبنانى لازم

قالتلى جوزها حلف بالطلاق لو الفلوس دى مجاتش بعد شهر هيفضحنا فى العيله كلها

مفيش بلد فى العالم قعد المده دى من غير رئيس ... انا اعصابى شاطت من التفرقه اللى فيها الدول العربيه

وقعدت تعيط وتقولى حرام عليكى ياختى مستقبلى ومستقبل عيالى انا مش هاسكت لو فضحك فى العيله وده راجل شرانى

وليد جنبلاط وجعجع والحريرى ازاى مش فاهمين ان اسرائيل سبب كل البلاوى

وانا مش عارفه اقولها ايه طيب يا خويا ما تشوف لنا جمعيه وندخل فيها ونديها فلوسها

ولا حسن نصر الله مع انى بحب الراجل ده الا ان عايز الامور تمشى طبيعى لانى شايف بوادر حرب اهليه

اهليه ؟؟؟؟؟ انا بكلمك عن اهلى انا .. اهليه مين ؟؟؟؟

هه ؟؟؟؟؟؟؟؟؟
هو انا كنت بتكلم معاكى ؟؟؟ هوزلت

السبت، 23 فبراير 2008

كادر الموظفين تاه من سنين

ايييييييييييييييييه
يا فتاح يا عليم يا رزاق يا كريم
اصتبحنا واصتبح الملك للمالك
قو مى يا وليه الساعه بقت 7 الصبح كفياكى نوم كتمتى نفس المرتبه حرام عليكى

ايه يا عبده على الصبح عاملك غاغه ليه ؟ ولا هى عادتك صحيح

قومى يا مودام جهزى لى الساونا والفطار

سوانا ؟؟؟؟؟؟؟؟؟؟؟
منجيلكش فى ساونا ياعنتر زمانك .البوتاجاز خلص من 3 ايام

ولعى الوابور ياوليه واصتبحى واقولى يا صبح

بابور ؟؟؟؟؟؟؟؟؟؟؟؟
مفيش جاز يا روحى خلاص نشفت . قلت لك هات سخان وانت ولا انت هنا عملت روحك من كولامبور .خلاص خدلك ساونا من ميه الحنفيه بقى

غلطه عمرى
صحيح غلطه عمرى وهاندم عليها طول حياتى . انى اتجوزتك . وليه معندكيش دريمس . انا بقى عندى احلامى مش سخان لا انا بفكر فى الفيلا وحمام السباحه والساونا وجوه الفيلا بارك . هى دى الدريمس يا وليه مش تقوليلى سخان .
قومى بسرعه هاتى البريكفاست وحضريلى مضرب الجولف

اسم النبى حارسك وصاينك . مضرب ايه ؟ سمعنى

مضرب الجولف يا متخلفه . انا عارف انها غلطه عمرى 14 سنه اشغال شاقه معاكى . فين البراءه ياناس ؟

هههههههههههههههههههه
جولف انت ياروحى اخدت كل عصيان الغليه والزعافه والنشابه وايدين المقشات وكل مره تقولى رايح العب جولف

غلطه عمرى . يا متخلفه انا بتدرب علشان الكادر بتاع الموظفين هينغنغونا ويبشبشونا والفلوس هتجرى معايا زى الرز .
هالعب جولف وبايلياردو واشترى يخت

يختى عليك وعلى جمالك . علينا تلات شهور ايجار

بسيطه

علينا فلوس النور والكهرباء

بسيطه

الناس كلها جابت تليفون واحنا لسه بنتكلم فى الكوز

بسيطه

فلوس اخواتى السلف لسه مردنهاش

بسيطه
اسمعى يا وليه بطلى ازعاج وهبهبه على الفاضى وروحى هاتى البريكفاست

ايه اللى انت قولت عليه ده ؟

غلطه عمرى
بريكفاست يا متخلفه يعنى الفطار

ههههههههههههههههه

بتضحكى ليه ياوليه ؟

احنا بقالنا تلات ايام بنام من غير عشا يبقى هنلاقى منين الفطار

ومصروف الشهر ؟

هههههههههههه
ال250 جنيه شوف الرز بقى بكام وشوف العدس بقى بكام وشوف اللحمه بقيت بكام وشوف الزيت بقى بكام

خلاص
خلاص
غلطه عمرى كل ده هيتحل بعد ماهنزيد فى المرتب وهاعوضك برحله للاسكيمو تشوفى الدب القطبى يمكن نفسه تكون مفتوحه ويخلصنا

اسكيمو ؟؟؟؟؟؟
ههههههههههههه
اروح اصحى العيال احسن علشان يروحوا مدارسهم

بقولك ايه ؟ انتى يا مودام عايز الحق تمارينى الرياضيه قبل الشغل
مفيش اى بريكفاست ؟؟؟؟؟؟؟؟؟؟؟؟

يانهار مخبط فى بعضه

مش معقول ؟
مش ممكن ؟
عبده الرايق عمل مدونه يا رجااااااااله
خلاص يا اخوانى كل مشكلاتكم محلوله باذن الله
بشرى الى كل سكان القاهره
بشرى الى كل سكان محافظه الوراق
بشرى الى كل عربات الفول
بشرى الى اهالى سوق العيد ومراجيح السيده
بشرى لاهالى الشلالات والمنيره والكيت كات
عبده الرايق وصل
عبده الرايق
اخر روقان
ومدندش
وملعلع
وضارب الدنيا صارمه
ماهى اصلا مدياه قفاها
سيدتى
عبده الرايق لنظافه تامه
عبده الرايق
لقتل الناموس والذباب
عبده الرايق
خلى السلاح صاحى صااااااحى
عبده الرايق
على بلد ام نفيسه ودينى طال الحكم ياباشا والبعد كاوينى
عبده الرايق
سياسه
عبده الرايق
مدونه ساخره
عبده الرايق
لعب وجد وضحك وضرب ................
عبده الرايق
يقدم لكم احلى تشكيله من المكسرات والمفتفتات والمطحونات والتعلب فات فات وفى ديله سبع لفات
عبده الرايق
راااااااااااااااااااااااااااااااااااايق
ومرووووووووووووووووووووووووووق
والدنيا كاسحاه فى ديلها
د / عبده الرايق
كشف عادى 100 جنيه
مستعجل 150 جنيه
على طول 200 جنيه
انهارده 300 جنيه
فى التو واللحظه 600 جنيه
وفتح عينك تاكل ملبن
مدونه عبده الرايق
مدونه ضاربه الدنيا عرض الحيطه
وخدنا منها ايه ؟؟؟؟؟؟؟؟؟؟؟؟؟؟