الاثنين، 31 مارس 2008

هديه الراااااااااااايق


الاولاد :- خالو عبده جه ...خلو عبده جه ... خالو عبده جه
الرايق :- هاى تشيلدرين
الاخت :- ازيك يا رايق يا خويا
الرايق :- هاى ماى سيستر هالوووووووووو
الاخت :- ايه يا رايق الكرتونه دى كلها ؟
الرايق :- دى هديه بسيطه ليكى وللاولاد ... هديه فرى بيتيفول
طفل خبيث :- انت قبضت الكادر يا خالو ؟؟
طفل اخبث :- ولا جاى تستلف العفش بتاعنا فى الكرتونه ؟
طفل برىء :- جايب لنا حلاوه المولد يا خالو ؟
الاخت :- سيبوا خالكم يا ولاد واقعدوا سا كتين
زوج الاخت :- ايه يا رايق الهديه دى مالكش حق يا راجل ؟
الرايق :- هاى افرى بدى .. دى حاجه تذكار من الرايق ...ماعلينا منها ياله يا اولاد محدش عنده حاجه معصلجه معاه فى المدرسه وعايزنى احلها له ؟؟
الاولاد :- امممممممممممممممم
الرايق :- مالكم بتبصوا لبعض كده ومتناحين كده ليه ؟
طفل خبيث :- مابلاش انت يا خالو ... الحساب اللى ذاكرتهولى كله طلع غلط والابله ضربتنى عشر عصيان
الرايق :- اوه ..نو ..الماث ؟؟؟؟؟؟ ....الماث ده لعبتى من زمان
طفل خبيث :- لعبتك ايه يا خالو .... اقولك 4 فى 12 = 48 تقولى لأ ...دى تساوى 16
واقولك 5 فى 10 = 50 تقولى لأ ...دى تساوى 15؟
الرايق :- بلاش حساب اى ماده واقفه قدامكوا غير الحساب انا لها
وزى ما قال عمنا امير الشعراء احمد زويل
قم للمعلم وفىء التبجيلا كاد المعلم ان يكون رسولا
طفل اخبث :- انا عندى سؤال فى الدراسات يا خالو محيرنى
الرايق :- جود ...يس فرى جود ...اى لف دراسات ...اسأل
نفس الطفل :- ايه هى الكوارث الطبيعيه والكوارث البشريه ؟؟
الرايق :- طبعا سهله ...الكوارث الطبيعيه هى الكوارث الطبيعيه اما الكوارث البشريه هى الكوارث البشريه
نفس الطفل :- ههههههههههههههه
طيب وبنقيس قوه الزلزال بأى جهاز يا خالو ؟؟
الرايق :- زى ما الناس بيقيسوه هو احنا هنخرج بره الناس
الاخت :- ياله يا ولاد ادخلوا ذاكروا جوه
الاولاد :- عايزين نشوف الهديه
الاخت :- ادخلوا دلوقتى جوه
زوج الاخت :- تشرب ايه يا رايق ؟
الرايق :- كانز بيريل ... اوور كانز فيروز
زوج الاخت :- عندنا عناب وعارف طلبك 7 كوبيات شوب كبير
الرايق :- لأ ده كان زمان ..دلوقتى علشان السكر عايز 6 كوبيات شوب وكوبايه عاديه
زوج الاخت :- تعالى ندخل المطبخ نجيب لاخوكى العناب

فى المطبخ

زوج الاخت :- ايه ده اللى جايبه اخوكى ده ؟
الاخت :- مش عارفه
زوج الاخت :-اكيد جاى يستلف منى فلوس وانا لو وقف على رقابته مش هديله ولا نكله ..كل مره يضحك عليا ويبلفنى وياخد فلوس ويمشى ... لأ المره دى لأ
الاخت :- ومين قالك انه جاى يستلف بس ؟
زوج الاخت :- ماهو باين جاى ومحمل بكرتونه كبيره وعمره ما عملها .. اخر مره جاب فيها زياره كانت من سنتين وانا عيان .. جاب كيس فيه خمس برتقالات وقال كل واحد منكم واحده .... وممشيش الا لما اكل نايبى ونايبك
الاخت :- تعالى بس احسن عيب نسيبه قاعد لوحده

فى الصالون

الاخت :- خطوه عزيزه يا رايق
الرايق :- الله يعزك ..شوفى يا ماى سيستر ..انا جاى لى مانى كتير الاسبوع الجاى ...حوالى 5000 جنيه قلت اسدد الناس اللى ليهم عندى عدد صحيح من الالاف بعنى اللى ليه الف او الفين .. اما الفرط زى ميه وستميه .. دول بعدين
زوج الاخت :- واحنا يا رايق
الرايق :- اه صحيح انتوا ليكم كام ؟؟
الاخت :- 650 يا عبده
الرايق :- خلاص خلوهم 1000 وانا احطكم فى الجدول الاسبوع الجاى ... هاتو 350 وكده يبقى الف جنيه تاخدوهم الاسبوع الجاى
زوج الاخت :- ماشى يا رايق ... ادى 350 جنيه بس اعمل حسابك لو كنت بتضحك عليا مش هيحصلك طيب
الرايق :- سلام عليكم
الاخت :- مش تستنا لما نشوف الهديه يا رايق
الرابق :- افتحى وانتى تتفرجى
الاخت :- اهوه فتحتها ...دى جواها كرتونه تانيه اصغر منها
الرايق :- افتحيها
الاخت :- وادى التانيه ... الله دى جواها كرتونه تالته اصغر .. ورابعه ..وخامسه .. وسادسه ..وعاشره
ايه ده يا رايق دى علبه كبريت !!!!!!!!!!!!!!!!!!!!!!!!!
الرايق :- علبه كبريت سوبر 120 عود لو متوسط استخدامك 4 عود فى اليوم معكى هديه تكفى الشهر بحاله .... سلامو عليكوووووووووووووووو

الاثنين، 24 مارس 2008

بلاها فول ...هالعب جولف

سى عبده !!! مالك ياخويا قاعد ليه كده لوحدك فى البلاكونه فى الوقت ده !!

جود نايت مسس رايق ...سانك يو ..هو ممنوع اقعد فى البلاكونه مسس رايق ؟؟؟

لا يا خويا ده بيتك وتقعد مكان مانتا عايز ...لكن الساعه داخله على 3 الفجر وانت عندك شغل الصبح

ايم تايرد مسس رايق ......زهقان وقرفان ومش رايق بالمره والفكر لاحس صواميل ماى هيد .

خير يا خويا اتكلم معايا فضفض ...واو انى عارفه اللى بيوجعك واللى مطير من عنيك النوم ..الديون يا خويا مش كده ؟؟ ...عارفه ان ده عماله يسألك وده عماله يسألك وكل واحد عايز فلوسه لكن ياخويا الناس برضه معذوره

ناس مين وفلوس ايه يا متخلفه انتى ....ربى رحماك ربى
غلطه عمرى انى ماريد يو مسس رايق ...فعلا غلطه عمرى وبندم عليها انى اتجوزتك
يا ام التخلف انا مش بفكر فى التفاهات دى

امال بتفكر فى ايه يا خويا ؟؟؟

بفكر اعزم ماى فرند السويدي جون اديفرز بطل الجولف العالمى على وان ويك ان كايرو
سورى مسس رايق عارفك متخلفه مش هتفهمى انا بقول انى بفكر اعزم صديقى جون اديفرز على اسبوع فى القاهره ....بس المشكله انى مزنوق فى انتخابات المحليات . وكل رؤساء الاحياء بيتصلوا بيا يوميا علشان يعرفوا منى الاخبار .. وانا لو سبتهم هيغرقوا

وسى جرجز بتاعك ده هتعزمه ازاى واحنا على البلاطه .. ولا هتقولى الكادر ؟

جرجز ؟؟؟؟؟
سميتى الراجل جرجز يا ام التخلف
عموما انا عامل حسابى على كل حاجه وموضب كل حاجه دونت وورى

عامل حسابك على ايه بس فهمنى ...مش كل مصيبه تعملها واقع انا فيها

امسكى الخشب اولا مسس رايق بليز تاتش وود

مسكنا الخشب اهو لما نشوف اخرتها معاك

خشب ؟؟؟؟ انتى ماسكه دراعى مسس رايق .. بليز تاتش وود

ادى الخشب اهو .. قولى بقى هتعمل ايه ؟؟

انا دخلت جمعيه 15 نفر وهاقبضها انا الاول ب 10 جند فى الشهر يعنى هاقبض 150 جند وبما انى كالعاده لن ادفع يبقى هقبض 140 جند وربك يعدلها مسس رايق
اكيد ماى فرند المحافظ هيساهم فى العزومه
واكيد كل رجال الاعمال والرياضيين هيسهموا
واكيد الدوله هتدعم الزياره
واكيد ماى فرندس المدونين اللى خلاص قربت اضحك عليهم واستلف منهم هيحنوا وهيسلفونى ... يعنى لو رميت بلايا على 20 مدون ومدونه وكل واحد منهم لهفت منه على الاقل 10000 يورو يعنى ميتين الف يورو فى 7 يعنى مليون و 400 الف يورو غير المساعدات بتاعه الدوله وماى فرند المحافظ يعنى هتتظبط
ده غير ال 140 جند بتوع الجمعيه يعنى هتلعلع وهتزهزه

طيب يا خويا طالما العمليه ربحانه ومزهزهه والحال ماشى مزعل نفسك ليه وبتفكر فى ايه ؟ وقاعد لوحدك فى البلاكونه ليه ؟

المشكله يا متخلفه جنب الزنقه بتاعه الانتخابات انى مش عارف عنوانه ولا اعرف بلده ايه ؟؟؟

هههههههههههههههههه
ضحكتنى مستر رايق
سويدى يبقى من السويد هى دى عايزه فكاكه ؟

طبعا متخلفه
غلطه عمرى انى اتجوزتك
طيب ما السويدى بتاعنا بتاع الكبلات مش سويدى ولا حاجه
واللى مجننى اكتر هو السويد دى فين اصلا تكونشى قاره لوحدها ؟

امال بتقول صاحبك ازاى ؟؟

هو يعى علشان صاحبى لازم اعرف اسراره
متخللللللللللللللللللللللللللللفه

السبت، 22 مارس 2008

كوبايه عصير

اطلع بره انتا يا عم سيد وسيبنى اتفاهم معاه
سيبونى يا عالم اطلع كل اللى جوايا
انت فاكر نفسك مين ؟؟؟؟
انت طلعت ولا نزلت بنى ادم زينا زيك
ايوه عارف انك رئيس الحى
وانى موظف عندك
لكن انت نسيت ان فى ربنا هيحسبك
انا مش خايف منك وبقولها بعلو صوتى .... انا بكرهك وبكره الحى بتاعك ... وبكره ايديكم الملوثه ... وبكره فلوسكم الحرام اللى بتنهبوها من الناس ... انا مش خايف .. ومش هاممنى .. عايز تعملى تحقيق اعمل ...ميهمنيش
عايز تدينى جزء ورينى جمايلك ..انا ميهمنيش ... اى هيت يو فرى فرى ماتش
جو .........جو .......جو تو هيل

سى عبده !!!!!!!!! مالك يا خويا واقف قصاد المرايه وبتكلم نفسك وبتتخانق مع نفسك .. هى الحاله رجعت لك تانى

حاله ؟؟؟؟
حاله ايه يا متخلفه ... انا بتمرن علشان اتخانق مع المدير بتاعى بعد لما اتظبط بالملايين

اقعد كده يا خويا وهدى اعصابك وبلاش تضايق نفسك وصلى على النبى ... وادى جنيه اهه خدوا وانت نازل اشرب لك كوبايه عصير قصب تهدى روحك شويه

اوه
نو
سوفاج
انتى يا ام التخلف ... انتى تدينى جنيه اشرب بيه عصير
اه ... ربى .... لقد ارتكبت هذه الامرأه جريمه تعاقب عليها الشموس المشرقه .. ايتها السماء اشهدى .. ايتها الجبال اشهدى .. ايتها كوبيات الشاى اشهدى ........وكما قال الشاعر فى تحيه العلم لا يسلم الشرف الرفيع من الاذىء حتى يراق على جوانبه الدم

خلاص يا خويا حقك عليا انا اصلى مبفهمشى .. بلاش الجنيه .. انا اسفه

اسفك مقبول يا امرأه
بس لو سمحتى مسس رايق
خليهم جنيه ونص .. وانا اوعدك ووعد الحر دين عليه .. اول مايجى الكادر هاشترى لك فدان بحاله مزروع قصب واسيبك ترعى فيه براحتك

ارعى ؟؟؟؟
كده ياسى عبده ...هو انتى فاكرنى معزه ؟

اوه
نو
مسس رايق انا كنت اقصد تراعى الطيور الجميله وهى تحط وترحل فى سماء زرقاء على بساط النسيم العليل

ادى يا خويا الجنيه ونص
بس متنساش
اختى كلمتنى تانى على فلوس جوزها .. والراجل صاحب البيت بعت تانى على الايجار .. وام عادل ليها 400 جنيه وام محمد الباشا ليها 250 وام محمد ليها 100 جنيه ده غير الفلوس المنتوره عشرات وعشرينات من الخلق وعايزين نصلح البوتاجاز اللى شا حتينه وعايزيييييييييييييييييييييييييييييين وع وع وع وع وع ووووووووووو

طااااااااخ

شوفتوا الراجل كل مره يخرج ويهبد الباب فى وشى
عااااااااااااااااااااااااااااااااااااااااا
عاااااااااااااااااااااااااااااااااااااااااا

الاثنين، 17 مارس 2008

المحليات وهوجه الانتخابات

طبعا بما ان العبد الفقير الى الله
عبده باشا الراااااااايق فرى فرى موظف مهم فى الحى فالايام دى مشغول لشوشتى ( ومع انى معرفشى ايه هى الشوشه .... ممكن تكون الشعر .. يبقى مشغول لشعرى ..طيب لو واحد اقرع هيبقى مشغول لايه ) .. ماعلينا...واكيد زى مانتوا عارفين ان الحى كله ميعرفشى يتحرك الا بتوجيهاتى المنيره البراقه ...وعلشان كده المسئوليه جامده على العبد لله ... لا واللى زود الطينه بله .. ان كل احياء الجمهوريه وكل المراكز لازم وحتما الراااااايق يتابع خط سيرهم والا كله محلك سر الحكايه بقت امبوسيبول
مش عارف ليه مش عايزين يعتمدوا على نفسهم ؟ وكذا مره اقولهم هلب يور سلف ... هو انا يعنى لو هاجرت الى زحل او المريخ او كولامبور هيعملوا ايه من غيرى ؟
اكيد هيلوصوا وهيغرقوا فى شبر ميه ... كل شويه تليفون .. عم الرااايق الحقنا احنا حى كذا او مركز كذا واقعين فى مشكله عويصه ومش عارفين نحلها ابدا ... ايه يابنى مشكلتكم ؟؟ ... كذا كذا كذا ....وانا فى ثوانى اقولهم الحل وكل مره بيطلع الحل واحد وهو العجل فى بطن امه
طيب ليه مش يفكروا ويعتمدوا على نفسهم ..حتى لو رست الامور انهم يولدوا الام دى ويطلعوا العجل علشان ميضيوقناش
كل خمس دقايق الوووووووووووووووو
وانا ارد العجل فى بطن امه .. العجل فى بطن امه .. العجل فى بطن امه
نفسى يتخرج جيل جديد يمسك الرايه بدالى
معقوله يبقى فى موظف واحد ماسك شغل الحى كله وشغل كل احياء ومراكز الجمهوريه
تعب
بس اللى غايظنى وفاقع مرارتى
ان رئيس الحى عندنا مش عايز يدينى مكتب لغايه دلوقتى
ولا دفاتر ولاشغل ولا اى حاجه
وكل ما اقوله عايز مكتب زى كل الموظفين وعايز اشتغل
يرد على ويقول لى مش عايزين فضايح وشبهه فى الحى يا راااايق انت كل ما تمسك دفاتر بتعملها طيارات ومراكب وصواريخ ورق
اقوله يا سعاده الريس العيب مش عندى العيب عندكوا انتوا الدفاتر مكتوبه باى ارابيك وانا تعليمى انجلش وفرانش وايتالى
وبعدين الطيارات والصواريخ العيال عيالى بيحبوا يلعبوا بيها .. وبعدين بلاش دفاتر .. عايز مكتب بدل القعده على السلم
يرد ويقولى نو نو نو مكتب ايه .. احنا ناقصين تجيب الطاوله وتلعب على المكتب وتسيب الكرسى وتطلع فوق المكتب وتكوع
ارد عليه واقوله يا ريس انا بلعب مع الموظفين زميلى على مشاريب وده فى مصلحه القهوه قصدى البوفيه وده دخل مادى للبلد ويمكن لو عممنا الفكره على مستوى الاحياء والمراكز نقدر نسدد ديون مصر ونسلف السعوديه كمان
عارفين يا ماى فرندس
انا نفسى اعرف احنا شغلنا ايه فى الحى ؟؟؟
كل ما اسأل زميلى محدش يرد عليا
اقولهم يا جماعه هو احنا جمعيه تعاونيه ولا محطه بنزين ولا سوق سمك ولا شهر عقارى ولا وحده طهاره اطفال ولا سكه حديد
محدش يجاوبنى
ويسبونى ويمشوا
واحد بس مره قالى شوف يا راااايق احنا هنا بنشتغل فى الحى يعنى بنخلص اوراق المواطنين وبنطلع التراخيص وبنحل المشاكل والمجلس المحلى بتاعنا مهمته رفع المقترحات الى المحافظ للبت بشأنها وتقديمها للمجلس التنفيذى ليقوم بتنفيذ تلك الاقتراحات
وانا طبعا من يومها وانا مش بكلمه خااااالص علشان بيضحك على العبد لله الفقير الراااايق وبيتكلم عن حاجات غريبه علشان عارفنى مش هاقدر اعرف
لكن على مين
على الرااااااايق
نو نو نو
والف نو
انا عرفت
احنا بنشتغل دلاله
اه فعلا دلاله ولو حد عايز خدمه
او كام توب قماش او اى حاجه العبد الفقير الى الله الرايق فى الخدمه
وكل واحد كده من سكات يحضر 2000 جند علشان هاعمل مشروع قومى لدراسه تأثير اكل اللحمه على الاظافر ومحتاج مبلغ كبير علشان اشترى زريبه بهايم وادبح براحتى وااكل اللحمه وادرس ضوافرى ... يمكن اخد جايزه نوبل فى الضوافر
ملحوظه
الفلوس السلف هتنقص لما اجى اردها يعنى ال 2000 هاردهم 200 بس علشان خصم الضرائب بتاعه المتفوتر
وعلينا وعليكم بخير بعد الكادر

الخميس، 13 مارس 2008

الدعوه عامه للجميع

الشاى ياسى عبده

حطيه عندك على التيبول .. سانك يو مسس رايق

سانك يووهك معاك ياخويا ... ايه اللى انت بتكتبه ده ؟

دى اسماء المدونين والمدونات ..ماى فرندس

وبتكتبهم ليه ياخويا ؟

علشان الحفله ياوليه ... انا عامل لهم عزومه فرى فرى بيتيفول

عزووووووومه هنا ...فى الشقه اللى قد الحق دى ... دحنا مبنعرفشى نقعد ناكل فيها زى خلق الله ... هتزعم الناس فيها ازاى ؟

نوووووووووووووو نو مسس رايق ... انا هاعمل حفله لارج .. فرى فرى لارج ... وهاعزم فيها كل المدونين اللى اعرفهم واللى معرفهمشى من ايجيبت ومن كل الدول العربيه والعالميه

يوووووووووه يوووووووه وكل ده ليه ياخويا ؟

الكادر يا متخلفه ........خلاص سمعت انهم خلاص على وشك الامضاء .. وكانو هيمضوا لولا انهم ملقيوش قلم ... وكل المكتبات كانت كلوز
خلاص اول ما المكتبات تبقى اوبن هيمضوا القرار وهاعمل الحفله

امممممممممممممممم

مالك مسس رايق ؟

هتعمل الحفله دى فين بالصلاه على النبى ؟؟

فى استاد القاهره الدولى يا متخلفه .... انا هكلم ماى فرند . المحافظ واجر الاستاد .. واجر كام الف عسكرى حراسه واعمل الحفله

وهتجيب الفلوس دى كلها منين يا حسره ؟؟؟

الكادر يا متخلفه هيكون اقل حاجه 10 الاف دولار فى الشهر .. يعنى لو قبضنا زى البترول 3 مرات فى الشهر يبقى 30 الف دولار فى خمسه على الاقل يعنى 150 الف جند فى الشهر ... طبعا مبلغ بسيط لكن مع الزياده هنوصل .. وهارجع الالف جنيه بتاعه جوز اختك وهاسدد كل الايجار والجزار وكل الديون اللى علينا ... وعارفه انا مش هاعزم فرنسا هانم ولا البنت وزه علشان طلبت منهم فلوس سلف ومرضيوش يدونى فاكرنى هاكلها عليهم

والله جدعان عندهم حق

بتقولى حاجه مسس رايق

لا يا خويا انا بكح ... بس بقول ان الاتنين دول ناس كويسه وبلاش تخسرهم

عموما انا قلبى طيب .. وهما غلابه
فرنسا هانم مكسوره وبتجيب عيش من الفرنه غلبانه
ووزه بتحلم ب 7 مليون جند ومش عارفه تعمل بيهم حاجه غلبانه

طيب يا خويا خد لك البرشام بتاع الهلوسه وخش نام

برشاااااااااااااام ايه يا وليه ؟؟

انتى هتفضحينا قدام البيبول ولا ايه ؟؟؟

الأحد، 2 مارس 2008

صباح الروقااااااااااااان

صباح الخير يا استاذ عبده يارااااايق ...المدير سألنى عليك وبيقول انت اتأخرت ليه لغايه دلوقتى ؟

صباح النور ولد فراااااااااااش ...وانا من امتى باجى بدرى ؟ .. مش يحمد ربنا ان مستحمله ومستحمل الوورك معاه

اممممممممممم

بطل هرش فى راسك على الصبح وروح هاتلى اتنين نسكافيه وواحد قهوه ساده وباكو باسكويت نواعم

اممممممممممممممممممم

مالك متنح ليه كده ؟؟جوووو

معلشى لامؤاخذه الحق حبيب الله ده تانى شهر نقبض ومتحاسبنيش ... بصراحه الحساب بتاعك تقل خالص ... واحنا لسه قابضين امبارح وانت زوغت منى زى الشهر اللى فات .... شخشخ جيبك وابجنى .. اجيب لك اللى انت عايزه

ايه ؟؟؟ ايه ؟؟؟ ايه ؟؟؟
سمعنى كمااااااااااااان
فلوس ؟؟؟
جالك قلب تنطقها قصادى ؟ لالالالالالالالالالالالالالالالالالالالا
لايسلم الشرف الرفيع من الاذى حتى يراق على جوانبه الدم

شرف مين ودم مين يا عمنا ؟ ما تدفع بالتى هى احسن

ووووولد انت مرفود

هههههههههههههههه
حلو يا حلو
ماتكنش فاكرنى شغال فى العزبه بتاعه الباشا جدك الثالث عشر ؟؟؟؟
انا موظف زيى زيك بالظبط .. ومتقدرشى ترفدنى

طيب مخصوم منك تلات ايام ... ودونت كراى ... هتعيط مش هارجع فى كلامى نيفر

يا خى تيييييييييت
روح بس شوف المدير لحسن يطين عيشتك
وبعدين انت مش رئيسى علشان تخصملى ولا فينتو ثانيه
سعيده يا اخ راااااااااااااايق

ولد يا سعاده الاستاذ فراش
انا كنت بضحك معاك يا راجل
ليه قلبتها نيرفز كده .. خليك ريلاكس
وروح هات الاتنين نسكافيه والقهوه والبسكويت

الفلووووووووووووووووووس الاول والا فلا

منك لله مسس رايق نفضتى جيوبى عاااااااااااااااااااا
منك لله يا جفرنمنت نفضتى هدومى وجيوبى يا حكحك يابنت ام حكومه
منك لله يا كادر خليت الناس تشمت فيا عاااااااااااااااااااا
منك لله يا غلا عاااااااااااااااا

خلاص يا راااااايق اهدى بس وصلى على النبى ... لحسن تجيلك ساكته ولا حاجه
انا هاجيب لك كوبايه شاى وساندويتش من بتوعى ... وبطل عياط

شاى فتله ؟؟؟

ياعم اهدى فتله مين

وساندويتش كايزر ولا بلدى ؟

ياعم الموجود هاجيبه ... بس وحياتك تخلى بالك معايا فى الحساب
حسابك تقل قوى يا عم عبده يا رااااااااااايق

ولد... اجرى يلا انجر اغسل يور هاند بالصابونه .. وهات الشاى والساندويتش وامرى لله
ولا زم يكون عليهم تاريخ الصلاحيه

صلاحيه ؟؟؟؟ منجيلكش فى صلاحيه

طب وبكره يا ولد يا فراش ؟؟؟

اعمل ايه ؟؟؟ نصيبى كده
كل يوم هاعمل حسابك فى كوبايه شاى وساندويتش لغايه اخر الشهر

بس ابقو وصى يور وايف تغسل ايديها بالميه المعدنيه والصابون وتعقم ايديها قبل ما تعمل الساندويتشات