الأربعاء، 24 سبتمبر، 2008

جزمه تزحلق على السيراميك

الرايق :- هاااااااااااااااى ايفرى بدى ... شيلوا معايا يا انجالى الهدايا كتيييييييييييييير

الاولاد :- هيييييييييييييييه بابا جه ....هييييييييييييييه بابا جه

مسز رايق :- ايه ده كله يا رايق ... انت ورثت ولا ايه ؟؟؟؟؟

سقراطه :- يا ما جاب الغراب لامه ....ايه ده كله انت سرقت البنك الاهلى ولا ايه ؟؟؟؟

الرايق :- اعوذ بالله ...سقراطه هنا .... انتى مش مع اخواتك محبوسه فى رمضان ؟؟؟؟ ايه طلعك ؟؟؟؟ وخرجتى امتى من القمقم ؟؟؟؟

سقراطه :- محبوسه ؟؟؟؟ ليه كنت جنيه ولا عفريته يا رايق ؟؟؟؟

الرايق :- تعالوا اتفرجوا على هدايا العيد ... ادى اول هديه اهيه

سقراطه :- جزمه تزحلق على الجليد ....ههههههه ...مش بقولك ياما جاب الغراب لامه

مسز رايق :- ايه ده صحيح يا رايق هتعمل بيها ايه دى ؟؟؟؟

الرايق :- سيبك انتى مسز رايق دونت تسمعى كلام الكريزى سقراطه ام السقاريط دى انا لسه عندى مفاجاه

سقراطه :- ورينا يا زعيم عصرك واوانك .... ايه ده كمان مضرب تنس ... ومضرب جولف .... وخيمه جاهزه ... ايه ده فين هدوم العيد ؟؟؟

الرايق :- بس يا مجنونه انتى هدوم مين هو انا لسه صغير على الكلام ده

الرايق الصغير :- هدوم لينا احنا يابابا ... انت نسيتنا ولا ايه ؟؟؟ هو انت لاقينا جنب جامع

الرايق :- بس يا ولد ... الهدوم دى شكليات وانا مش ببص للشكليات دى .... انا محضر لكم مفأجاه

مسز رايق :- شكليات ايه ونيله ايه يا رايق ... فين هدوم العيد انت مش واخد ال 500 جنيه بتوع الجمعيه تجيب للاولاد هدوم العيد

الرايق :- بصى مسز رايق ... دونت وورى ...انا عامل حساب كل حاجه ... الرايق مبيفوتشى حاجه بتيتا

سقراطه :- خلينا وراء الكداب لغايه باب الدار .... ايه هى المفاجأه يا رايق ؟؟؟؟

الرايق :- هو انتى بتحشرى نفسك فى الكلام ليه ؟؟؟ عارفه يا سقراطه .... انا نفسى اروح انا وانتى جنينه الحيوانات ..واكيد اكيد هاخرج من غيرك ... والحراس هناك هيشكرونى قوى قوى قوى

سقراطه :- انا يارايق .... طيب بص لنفسك فى المرايه ... اللهم انى صايمه

الرايق :- شط اب يور ماوس ... بصى مسز رايق انا عندى ليكم مفاجاه جنان

مسز رايق :- خير يا خويا

الرايق :- هنروح نقضى العيد فى باريس

الاولاد :- هييييييييييييييييه هنروح فرنسا ....هنروح فرنسا

الرايق :- مين جاب سيره فرنسا يا اغبياء ... هنروح باريس عاصمه المانيا

سقراطه :- ياعم المانيا المانيا مش مشكله ....بس هتروح المانيا ازاى وانت كحيان وعدمان وندمان

الرايق :- موتى بغيظك يا سقراطه .... بصى مسز رايق ... بصوا يا اولاد ... حموده اخو العلامه الكبير حسن الفراش مسافر بكره يدور على شغل فى لبنان وهيطلع على ليبيا ومنها للسودان ويروح قبرص ومنها لالمانيا ....وحسن وعدنى اول ما اخوه يلاقى شغل هيبعتلى انا والعيله نقضى العيد هناك

الجميع :- اممممممممممممممممممممم

الرايق :- ايه مالكم ؟؟؟؟؟؟؟؟؟؟؟؟؟؟
فى ايه ؟؟؟؟
محدش بيرد ليه ؟؟؟؟؟؟؟؟؟؟؟؟؟
مش مهم ... اروح اجرب الجزمه ....واتزحلق بيها على السيراميك

الأحد، 20 يوليو، 2008

دروس بالعافيه ..فى التاريخ والجغرافيا


سقراطه :- اهو الفلحوس جوزك وصل

مسز رايق :- اهلا ياسى عبده حمدلله على السلامه

الرايق :- شرفتى كازينو الرايق يا سقراطه ...انتى رجلك خدت على بيتنا يعنى...ماتجيبى جوزك وعيالك وتقعدى هنا واحنا نقرفص على السلم

مسز رايق :- عيب كده ياسى عبده ...ماتزعليش منه يا نعمه ده بيهزر

سقراطه :- يهزر ولا ميهزرشى ...انا باجى هنا لبيت اختى مش لبيت الرايق

الرايق :- خليكى قاعده ياختى فى بيت اختك .....سواق لورى يكون اعمى واطرش يسلم عليكى بالدوبل

سقراطه :- بطبرطم بتقول ايه يا رايق ؟؟؟؟؟؟؟؟

الرايق :- لا ابدا ..انا داخل اصحح الكراريس.. اصل الاشاره فتحت

سقراطه :- هههههههه .....كراريس !!!!!!!.....هو انت بتعرف تصحح كراريس ؟؟...وكراريس ايه دى بقى يا فالح ؟؟

الرايق :- بصى يا سقراطه ....مساهمه منى انا الدكاتره عبده الرايق فى حل مشكله نحو الاميه ...قررت اعلم اهل الحته مجانا بدون اى ماااااانى ...واتفرج على الحلاوه حلاوه

سقراطه :- اسمها محو الاميه يا رايق ...مش نحو الاميه

الرايق :- نحو الاميه يا متخلفه ....بمعنى اننا نجرى نحو الاميه ونمسحها باستيكه

سقراطه :- نحو ولا محو ...مش مشكله ...هى فكره كويسه جدا يارايق بس ياريت تيجى من حد تانى غيرك

الرايق :- ليه كده يا سقاريطو هو انا كخه ولا ايه ؟؟؟

سقراطه :- لا انت مش كخه ..ورينى الكراريس دى

الرايق :- ياريت تغسلى ايدك بالليفه والصابونه الاول

سقراطه :- ورينى بس كده...ايه ده ...مصر دوله خليجيه !!!!!!!!!!

الرايق :- طبعا يا جاهله ....الدكاتره عبده الرايق بيصحح الجغرافيا والتاريخ ....مصر مش واقفه على خليج السويس

سقراطه :- ايوه بتطل على خليج السويس

الرايق :- تبقى دوله خليجيه ولا لأ

سقراطه :- لا ناصح من يومك ....وايه ده كمان ....الناس ايام صلاح الدين مكنوش يعرفوا الملابس

الرايق :- طبعا يا فالحه ..صلاح الدين بنى ايه ؟؟؟؟

سقراطه :- بنى القلعه

الرايق :- طيب لو كانوا يعرفوا الهدوم مش كانوا لبسوها

سقراطه :- مش بقولك ناصح ..وايه ده كمان ....اكبر بلد بتنتج الحبر هى السودان ...وايش عرفك انت ؟؟

الرايق :- طبعا انتى جاهله ....السودان فيها النيل الازرق ولا لأ ؟

سقراطه :- فيها النيل الازرق

الرايق :- خلاص خدوا منه الحبر ... انتى لازم تدخلى نحو الاميه يا سقراطه

سقراطه :- ههههههههه .....لامتشكره خالص يارايق ...اصل العلم بتاعك ده صعب على الواحده اللى زى حالاتى

الرايق :- انا ممكن احجزلك مع المعاقين ذهنيا

سقراطه :- طيب قولى يا رايق ...مين اول من نادى بحريه المرأه ؟؟؟؟

الرايق :- قنوات الدش طبعا هى دى عايزه سؤال

الأربعاء، 9 يوليو، 2008

شيكات ...نو نو نو


ترررررررن ....تررررررررررررن ...ترررررررررن

الرايق :- الو

صوت :- الو السلامه عليكم ...معايا استاذ عبده الرايق

الرايق :- وعليكم السلام ...استاذ مين ؟؟ انتى اتعميت ولا ايه ؟؟؟ مش شايفنى فى السماعه ؟؟؟ ... معاك الدكاتره عبده باشا الرايق

صوت :- انا بكلم حضرتك يا دكاتره بخصوص الشيك

الرايق :- نو نو نو انا الدكاتره عبده الرايق لايمكن اقبل ابدا شيكات ...انا عايز الجايزه كاش مانى ..وتكون فلوس مش معلمه ..انا لايمكن ارضى ابدا بالشيكات حتى لو اتلمت السويد كلها برجالتها ونسوانها وعيالها .. انا دونت موافق

صوت :- يا دكاتره اسمعنى ارجوك

الرايق :- نو نو نو انا مش هاسمعك ومتضيعشى وقتى مع السلامه

سقراطه :- مين ده يا رايق ؟؟؟

الرايق :- اه ..هنا بقى وتعملى نفسك قريبه فريد الاطرش ...وتعملى نفسك مش سامعه حاجه

سقراطه :- انا سمعاك بتقول شيك والجايزه والسويد ..فى ايه يارايق ؟؟؟؟

مسز رايق :- ايه يا عبده الحكايه ياخويا فى ايه ؟؟؟؟

الرايق :- الجماعه بتوع جايزه موبيل عايزين يدونى الجايزه بالشيكات ....وانا قولتلهم نو نو نو... انا لايمكن اعمل زى البشر التانيه واقبل شيكات ..لازم كاش مانى يا اما بلاش

سقراطه :- طيب ليه ؟؟؟وبأماره ايه ؟؟؟وعلشان ايه ؟؟؟

الرايق :- طول عمر لسانك طويل يا سقرووووطه ... وادى السويد كلها بتحفى ورايا علشان يدونى الجايزه وانا مش موافق ...انا داخل المكتبه بتاعتى اطالع الكتب الثقافيه ..انا مش هضيع وقتى معاكم ...ابقى زروينا بعد كام الف سنه ياسقراطه ....سلالالالالالالام

سقراطه :- هو ايه الحكايه ياختى الرايق جوزك بقى مثقف وهياخد جايزه نوبل ؟؟؟؟؟

مسز رايق :- مثقف مين يا نعمه ..انتى بتصدقى ؟؟؟ قال مثقف قال ..بلا نيله

سقراطه :- ماهو بيقول انه داخل المكتبه بتاعته

مسز رايق :- مكتبه ايه يا حسره ...ده عامل صندوق قديم مكتبه وحاطط فيه كام مجله من بتوع سمير وميكى وبطوط وكتب المدرسه بتاعه العيال وكرارسهم القديمه ...وكل شويه يقعد يقراء فيهم

سقراطه :- امال ايه حكايه الجايزه دى ؟؟؟....الكلام فعلا قدامنا اهه

مسز رايق :- والله مانا عارفه بقى ...يمكن يكونوا اتهبلوا ولا حاجه هما كمان

ترررررررررررررررن ......ترررررررررررن ...ترررررررررررررن

الرايق :- انا جاى اوعوا حد يرد ..الجماعه دول مش ناويين يجيبوها البر ....الو

صوت :- الو يا دكاتره

الرايق :- انت تانى يا بتاع الشيك ؟؟؟

صوت :- ايوه يا دكاتره ..ياريت تسمعنى ومتقفلشى السكه

الرايق :- اخر كلام عندى ...الجايزه تيجى فلوس مش متعلمه ..وميعاد التسليم الساعه واحده بالليل بعد كمين الكيلو 109 طريق القاهره - السويس وياريت متبلغوش البوليس ..مع السلامه

سقراطه :- نهارك زفت يارايق بوليس ايه ؟؟؟؟؟

الرايق :- مش هما بيقولوا كده فى الافلام ؟؟؟ انا عملت زى الافلام ...واطلعى انتى منها يا ام السقاريط

سقراطه :- طيب يا اخويا خلى المتكلم عاقل والمستمع مجنون ...انا عايزه اعرف هيدوك جايزه نوبل على ايه ؟؟؟؟

الرايق :- يا متخلفه ياللى شبه اختك مسز رايق ....هيدونى جايزه نوبل عن علمى الكبير

سقراطه :- فى ايه ؟؟؟؟؟؟؟؟ ماتخلى الطابق مستور احسن

الرايق :- بصى يا سقراطه انا اتعمل عليا 140 الف بحث عالمى واكدت اللجنه انى استحق الجايزه عن جداره

سقراطه :- ومين بشرك بقى بالخبر الحلو ده ؟؟؟؟

الرايق :- العلامه الكبير الواد حسن باشا الفراش ...وكمان قالى انهم قعدوا يصقفوا للرايق وانجازاته 4 ايام بلياليهم

سقراطه :- وانت مصدقه ؟؟؟؟؟؟؟

الرايق :- ومصدقوش ليه ؟؟؟وبعدين اديكى شايفه التليفونات بتجرى ورايا ازاى ...عارفه يا سقراطه ...انتى اول واحده هتستفاد من الجايزه . هود يكى عند اجدع دكتور تجميل فى السويس يقصلك لسانك من لغلوغه

ترررررررررررررررن .......ترررررررررررررن ....تررررررررررررررن

الرايق :- رن للصبح انا مش هارد عليك

سقراطه :- اوعى كده يا رايق ....انا هارد على التليفون ...الو

صوت :- الو ...لو سمحتى يا مدام قولى للاخ اللى عندك لو مارحشى بكره للمعلم اسامه بتاع التلاجات ودفع الشيك اللى عليه باقى قسط التلاجه هيوديه المحكمه وقد اعذر من انذر ...سلام عليكم

السبت، 21 يونيو، 2008

سقراطه ...مريضه


مسز رايق :- ازيك يانعمه ياختى الف الف سلامه عليكى ..هو انا اقوم انتى تتعبى ؟؟؟

سقراطه :- الله يسلمك ياختى برضه تعبتى نفسك وجيتى انتى والرايق ؟؟؟؟؟

الرايق :- هااااااااااى سقراطه ....متتصوريش انا فرحت قد ايه ؟؟؟...قصدى زعلت قد ايه لما عرفت ان انتى بتودعى ....هو الدكتور قالك فاضل كام يوم ؟؟؟؟

مسز رايق :- حرام عليك يارايق ..فال الله ولا فالك .. برضه ده وقت هزار ومناكفه ؟؟؟

الرايق :- مش انتى يا وليه قولتى عايزين نزور اختى سقراطه علشان عيانه قوى ومبتتحركشى من مكانها ؟؟؟

سقراطه :- برضه فيك خير يا رايق ...دول بس شويه برد

الرايق :- وات ؟؟؟....شويه برد فى الصيف ؟؟؟...انتى معندكيش بوصله ولا ايه ؟؟؟..فى حد فى الدنيا ياخد برد فى الصيف .؟؟؟...ممكن معلشى تقولى شويه حر

سقراطه :- هو البرد له موسم ؟؟؟ انا اخدت دور برد من المروحه

الرايق :- ههههههههه ....بتهزرى ؟؟؟...طبعا شكلك بتهزرى ...اول مره فى حياتى اشوف مروحه بتعدى انسان ...انت بوستيها ؟؟؟...ولا شربتى من كوبايه المروحه شربت منها ؟؟؟...ولا اكلتى بمعلقتها ؟؟؟

سقراطه :- لأ ظريف ....ههههههههه.......انت جاى لوحدك ولا جاى مع الماما ؟؟؟؟...مش بقولك ظريف يا مضروب وبكره لما تكبر هتبقى ظرف ...ونرميك فى صندوق البوسته ...ونلزق على قفاك طابع ...ونكتب على ضهرك شكرا لساعى البريد ...وكل ما واحد يستلمك يقطعك

الرايق :- حتى وانتى بتحتضرى لسانك طويل ...ماتيبجى اقصهولك احسن تفيصى وانتى مش حالقه لسانك.
ورينى ايدك اكشف عليكى

سقراطه :- لا يا خويا متشكرين افضالك انا كاشفه عند الدكتور وجايبه علاج ومش محتاجه لكشف سعادتك ...نقطنا انت بسكاتك احسن

الرايق :- نقطه ؟؟؟؟؟....ليه انتى ولدتى ولا ايه ؟؟؟....هو الزياره عندكم بنقطه ؟؟؟؟...هو انا جاى ازورك فى فرح بعوالم ولا ايه ؟؟؟؟
هاتى ايدك بلاش تخاريف ولعب عيال

مسز رايق :- ماتسيبها يارايق فى حالها البنيه تعبانه حرام عليك

الرايق :- شط اب يور ماوس ....امال انا جاى وخابط المشوار ده كله وجايب معايا كيلو وربع تفاح وفى الاخر ماكشفشى على المريضه
نو
نو
نو
انا لازم اقوم بواجبى ...هاتى ايدك ...اول القصيده اهه ...مش قصه ليه ضوافرك ؟؟؟؟.....عايزك تجوابى عليا بسرعه ومن غير ما تفكرى وانتى مغمضه عنيكى....6787 ×778 +987654 × 67654 - 7632 = كام ؟؟؟؟

سقراطه :- انت هتهزر ؟؟؟سيب ايدى

الرايق :- طبعا مش عارفه ....لا اله الا الله .....الحاله متأخره خالص ..هسألك سؤال تانى ..لو جاوبتى عليه ممكن يكون فيه امل ...لكن لو مقدرتيش هنضطر نعملك عمليه

سقراطه :- معاك للصبح يا رايق ...اسأل

الرايق :- فى عام 1942 اى قبل انتهاء الحرب العالميه ب 3 سنين كانت هناك معارك منتشره فى انحاء العالم ومنها باريس ..السؤال بقى بيقول فى يوم 26 مارس من نفس العام دارت معركه قتل فيها جندى فرنسى وكانت معه محفظه بها عده صور
1 - كم صوره كانت فى المحفظه ؟؟؟
2 - لمن كانت تلك الصور اذكرى الاسماء ثلاثيه ؟؟؟

سقراطه :- ههههههه ...مش بقولك دمك يلطش ...مش عارفه

الرايق :- ايييييييييييييييييييه دنيا ....احنا عملنا اللى علينا والباقى على ربنا....للاسف يا جماعه ...احنا مضطرين نغير المخ ...وننفخ الرئتين ...ونبدل تروس القلب ...ونغير المعده والامعاء والكبد ...وربنا يستر

مسز رايق :- ياراجل اتقى الله حرام عليك انت ايه ..كل حاجه واخدها هزار كده ؟؟؟

الرايق :- هو انا لو كنت بهزر كنت جبت التفاح وركبت مواصلات وجيت على هنا ؟؟؟؟

سقراطه :- اه تفاح و مواصلات ؟؟؟؟....بقولك ايه يا رايق خد يا خويا ال 50 جنيه دى حوشهالى معاك هاخدها منك بعد 100 سنه لو عشنا ..وممكن تصرفها دلوقتى براحتك

الرايق :- ماشى وانا موافق ...بس ده حق نفخ الرئتين فين الباقى .؟؟؟؟؟؟؟؟؟؟؟

السبت، 14 يونيو، 2008

الرايق وصل للعالميه

تحديث
-------
كان اسمهم عاشقين ... ودلوقتى من بعضهم مخنوقين
تدوينه جديده للمفقوعه مرارتها
على مدونه
.
.
===================
المذيعه :- اعزائى المشاهدين ..اهلا ومرحبا بكم فى برنامجكم سماء العلم ..يسعدنا ان نستضيف فى هذه الحلقه واحدا من اعلام العلم والثقافه فى جمهوريه مصر العربيه ..السيد \ عبده الرايق الحائز على جائزه نوبل

الرايق :- سيد مين ومصر مين يا مزمزين .....انا الدكاتره \ عبده بيه الرايق .واحد من اعلام العلم واثقافه فى مصر والعالم العربى والكره الارضيه ..وبعدين اسمها جايزه موبيل مش نوبل ..انتى هتعملى زى سقراطه ولا ايه ؟؟؟؟؟؟

المخرج :- ستوب !!!!!!!!لو سمحت يا دكتور عبده ممكن تسيب الاستاذه لمياء هى عارفه شغلها كويس ...انا ارجوك لو سمحت

الرايق :- نو نو نو ...انا مش الدكتور عبده الرايق ...انا الدكاتره عبده الرايق

المخرج :- ياسيدى على عينى وعلى راسى ...لو سمحت يا سياده الدكاتره عبده الرايق سيب المذيعه تقوم بشغلها ....يلا يا جماعه ...ثرى ..تو ...وان

المذيعه : - احنا نحب نعرف من سعادتك ليه الدول الاوروبيه اتقدمت عن الدول العربيه رغم اننا اصحاب حضارات قديمه مثل الحضاره الفرعونيه والفينيقيه

الرايق :- بالذمه ده سؤال يرضى ربنا ؟؟...بقى انا واخد عربيه مخصوص من السويس وجاى هنا اسجل معاكم علشان تكلمونى عن الفينيكيه ..انا مالى ومال الفنيك ..هو احنا هنا للعلم ولا هنغسل حمامات ...ادى اللى ناقص نتكلم عن الفنيك كمان

المخرج :- ستوووب ....فنيك ايه يا دكاتره عبده بيه ...بتقولك الحضاره الفينيقيه ...غير الفنيك خالص ....بلاش السؤال ده يا لمياء ...يلا يا جماعه جاهزين ؟ ...ثرى ..تووو ...وان

المذيعه :- الدكاتره \ عبده الرايق ..ممكن حضرتك تقولنا ..ليه رشحوك لجايزه نوبل ؟؟ ومتى ستذهب سيادتك الى السويد لاستلام الجائزه ؟؟؟؟؟

الرايق :- ليه رشحونى ؟؟؟؟؟ياسااااااااااااااااتر يا رب ....هى الناس مبتحبش الخير لبعضيها كده ليه ؟؟؟ زعلانه انتى انهم رشحونى ؟؟؟ روحى اسئاليهم انتى ...ده ايه ده ..حقد ..وبعدين اروح السويس استلم الجايزه ؟؟؟...طيب مانا من السويس جبتى ايه من عندك

المخرج :- ستووووووووب ....سويس ايه وحقد ايه يا استاذ ؟؟مش ممكن كده ارجوك عندى شغل تانى ....ياريت تجاوب على المذيعه عدل ارجوك
يلا يا جماعه ...جاهزين ؟ .....ثرى ...تو ...وان

المذيعه :- الدكاتره \عبده الرايق ..ممكن حضرتك تقولنا انت حصلت على كام دكتوراه ؟؟؟

الرايق :- ستووووووب ...ايه كام دكتوراه دى هو انا مش قلتلك بلاش الحساب ارجوكى انا ميح فيه خالص ؟؟؟

المخرج :- ستووووب ....ماتتفضل هنا مكانى يا استاذ رايق وانا اروح بيتنا ...انت مال حضرتك ستووووب ولا ما ستوبش ...لو سمحت ابوس ايدك ..خلصنا من اليوم الاسود ده
يلا يا جماعه ..جاهزين ؟ ثرى ..تو ...وان

المذيعه :- كنا عايزين نعرف رأى حضرتك فى العولمه ؟؟؟

الرايق :- بصراحه انا بحب العولمه جدا .ومن اشد المعجبين بالست تحيه كاريوكا والست نعيمه عاكف والست ام تامر ...بصراحه انا بحب الفرح لما يكون فيه عولمه ...الزق جنب المسرح ..واى نقطه طايره كده ولا كده القطها ..بصراحه كل فرح فيه عولمه بيطلعلى كام جند محترمين

المخرج :- ستوووووب ....محمد يا حسن ...استااااااااذ محمد ...انا مش هاشتغل الحلقه دى ....سوورى ...انت جايبلى واحد لاسع خالص ..وانا اصلا مش ناقص
خلاص ماشى علشان خاطرك ...بس وحياه ابوك يا محمد كلمه كلمتين انا خلاص مرارتى هتنفجر
يلا يا جماعه ....جاهزين ؟؟؟...ثرى ..تو ..وان

المذيعه :- استاذ عبده ..نحب نعرف حضرتك اخذت جائزه نوبل عن اى فرع من فروع المعرفه

الرايق :- اى فرع ؟؟؟؟؟؟؟هما فرعين مفيش غيرهم طول عمرنا نسمع عنهم فرع دمياط وفرع رشيد...وبعدين انا مش بدق ..دمياط ماشى ..رشيد ماشى ...كله محصل بعضه

المخرج :- ستوووووووووووووووووووب ....انا يستحيل اكمل مع الجدع ده

الرايق :- يستحيل مين يابا ...انا جاى مخصوص من السويس وصاحى الساعه 11 بالليل وجاى فى عربيه مخصوص ب 2000 جند وفى الاخر تقولى مش هنكمل البرنامج

المخرج :- عربيه ايه دى اللى تاخد 2000 فى مشوار مصر السويس ؟؟؟؟؟؟؟؟

الرايق :- انت اصلا مش عايش فى الدنيا ..زانا رحت الموقف بتاع التاكسى ونقيت عربيه مدندشه وقلت للسواق تودينى التليفزيون فى مصر وتاخد كام ؟؟؟قام السواق بصلى بكل تناحه وقله ذوق وقالى ..دى عربيه باربع كوتشات ..لو عايز عجله على قدك روح اجرك واحده ...رحت انا قلت له انا هادفع الاجره قبل ما نتحرك ..عايز كام ؟؟؟ قام السواق قالى عايو 500 جند حسبتها فى عقل بالى 500 جند فى اربع كوتشات يعنى السواق عايز منى 2000 جند ...رحت مديله ال 2000 جند وقلت له توكل على الله

المخرج :- ههههههههههه.....اربع كوتشات ؟؟؟طيب علشان ضحكتنى انا هاكمل الحلقه
جاهزين يا جماعه ؟؟؟؟ ...ثرى ...تو ..وان

المذيعه :- استاذ عبده .هل تؤمن بالحدود الجغرافيه والسياسيه بين الدول العربيه بعضها البعض ...ام تتمناها قوميه عربيه واحده ؟

الرايق :- هى لو عربيه واحده مش هنعرف نركبها كلنا ..لكن ممكن اتوبيس يكفينا ..ولو حد مروح فى طريق السويس اوصله

المخرج :- ستوووووب ...فركش يا جماعه ....استاذ عبده ..انا بحييك جدا جدا واحنا لاغينا البرنامج خالص من على خريطه التليفزيون .زوادى يا عم 2500 جنيه للعربيه المخصوصه بتاعتك

الرايق :- لكن انا دافع 2000 جند بس

المحرج :- حضرتك دفعت 2000 جنيه على الاربع كوتشات بس ..الظاهر حضرتك نسيت الاستبن

مسز رايق :- عبده ..انت يا عبده ....سى عبده ...اصحى ياسى عبده

الرايق :- انا فين يا وليه ؟؟؟؟وفين ال 2500 جند ..وفين المخرج ؟؟؟ وفين المذيعه ؟؟؟

مسز رايق :- مخرج ايه ومذيعه ايه اصحى وفوق كده علشان تروح الشغل

الرايق :- منك لله مسز رايق كنتى استنى لما احط الفلوس فى جيبى

السبت، 7 يونيو، 2008

الرايق فى نهائى رولان جاروس


اصدقائى الاعزاء ادعوكم لزياره مدونتى المشتركه
مع فرنسا هانم وهى

سقراطه :- ازيك يا ختى دلوقتى عامله ايه ؟؟؟؟

مسز رايق :- الحمد لله على كل حال

سقراطه :- فى ايه ياختى هو الرايق متضايق كده ليه ؟؟؟

مسز رايق :- اهو على الحاله دى من امبارح ..وقلتله خد البرشامه بتاعتك مش عايز يسمع كلامى ..واهو عماله ينفخ ويفش من بدرى

سقراطه :- مالك يا ريق فى ايه ؟؟؟؟؟؟؟؟

الرايق :- هششششششششششششششششششششششششش

سقراطه :- ايه يا راجل يا خرفان انتى ...انت بتهشنى هو انا دبانه ؟؟؟؟؟؟؟

الرايق :- هسسسسسسسسسسسسسسسسسسسسسسسس

سقراطه :- هو جوازك ماله يا ختى ...عماله هش وشويه هس هو فى ايه ؟؟؟؟؟؟؟؟

مسز رايق :- مانا بقولك من امبارح وهو مكلضم وكل ما حد يكلمه يشاور بايده وميتكلمشى ومفيش على لسانه الا هس او هش

سقراطه :-لالالالالا احنا مش لازم نسكت عليه ...يمكن جراله حاجه ولا محتاجه.......اشوفه ماله ....رايق ...يا رايق ...انت يا رايق

الرايق :- هششششششششششششششششششششش

سقراطه :-مالك يا رايق ؟؟؟....انت سامعنى ؟؟؟؟.......هما بابا وماما سابوك هنا لوحدك ؟؟؟.....انت تعرف تروح بيتكم يارايق ؟؟؟؟.....

الرايق :- هسسسسسسسسسسسسسسسسسسسسس

سقراطه :- لا حول ولا قوه الا بالله...........فى ايه يا رايق ؟؟؟.....القطه اكلت لسانك ؟؟؟؟.....طيب لو نطقت وقلت مالك هابعت اجيب ساقع واعمل حسابك معانا فى ازازه

الرايق :- هشششششششششششششششششششششششششش

سقراطه :- لا ده باين الموضوع كبير قوى......فى ايه يا رايق ؟

الرايق :- انا هاطق انا هافرقع ....انا خلاص روحى ان ماى نووز

سقراطه :- فضفض يا خويا احنا برضه اهلك

الرايق :- فيفى عملتها معايا ولعبت معايا الدنيئه

سقراطه :- فيفى ؟؟؟؟؟؟؟؟ ..مين فيفى دى ؟؟؟؟؟؟؟

الرايق :- ما هو انا كنت ساكت وكاتم فى نفسى لانى عارف ان انتم اصلا متخلفين مش فاهمين حاجه

سقراطه :- الله يحفظك مش جديد عليك طوله اللسان ...لكن مش وقته ....مين فيفى دى ؟؟؟؟؟؟

الرايق :- فيفى بتاعه الاتحاد الدولى لكره القدم

سقراطه :- هههههههههه ......اسمها فيفى ؟؟؟؟؟؟ .....اسمها فيفا يا عم الرايق ...مالها بقى بيك الفيفا

الرايق :- فيفا بقى وشغل مصاطب ..قلنا اسمها فيفى ...كمان دى هتأوحى فيها

سقراطه :- فيفى فيفى مش مشكله ...مالها بقى فيفى ؟؟؟؟

الرايق :- بطوله الامم الاوروبيه خلاص كلها ساعه وتبدء ومحدش اتصل بيا

سقراطه :- طيب هيتصلوا بيك ليه ؟؟؟؟

الرايق :- طبعا لازم يتصلوا بيا افتتح البطوله ....انا بقالى سنتين بتعلم سويسرى وباخد فيها دروس علشان افتتح البطوله ....كل فلوسى راحت على الدروس وفى الاخر محدش يتصل بيا ؟؟؟.....ليه ده انا اخاصم فيفى ليوم الدين

سقراطه :- سويسرى ايه يا خويا انا عمرى ماسمعت ان فى لغه سويسريه ؟؟؟؟

الرايق :- طبعا جاهله ومتخلفه واخت المتخلفه مراتى (لا مؤاخذه مسز رايق ) الولد حسن الفراش جده سويسرى وبيعرف يتكلم سويسرى وبقاله سنتين كل شهر يا خد منى عشرين جند علشان يعلمنى سويسرى

سقراطه :- واتعلمت ايه يا فالح

الرايق :- الواد حسن الفراش قالى ان اللغه السويسريه هى هى اللغه العربيه لا العرب كانوا محتلين سويسرا لمده سبع تلاف سنه لغايه لما سويسرا استقلت من 4 سنين علشان كده تلاقى كل كلامهم عربى بس بالمقلوب ..يعنى قلب بالسويسرى بلق ...وحصان بالسويسرى ناصح ...وولد بالسويسرى دلو ...وبنت بالسويسرى تنب ....وعسكرى بالسويسرى يركسع

سقراطه :- بس بس بس وحياه ابوك ماتكمل ....من حقك ياخويا تضايق اقعد هناك مكانك وانفخ وفش براحتك

الرايق :- خلاص لو مبعتوليش تبقى دى قطيعه مع فيفى وبكره انشاء الله هاروح فرنسا اسلم الكاس بتاعه رولان جاروس للفايز فى نهائى التنس ....مش عايزه حاجه من باريس يا سقراطه ؟؟؟؟
سقراطه ؟؟؟ ....يا سقراطه ؟؟؟؟؟ ؟...انتى يا سقراطه

سقراطه :- هششششششششششششششششششششششششششششش

الثلاثاء، 3 يونيو، 2008

الرايق طبيب مشهور


الاخوه الكرام معذره عن التأخير ....انا مشغول شويه ...لكن سبت الدنيا دلوقتى واتفرغت لكم ...بالذمه استاهل ايه ؟؟؟؟؟
طبعا استاهل جايزه وانا مش طماع كفايه كل واحد يبعت لى 150 كارت تليفون من ابو 100 جند وانا اتصرف فيهم براحتى
ندخل بقى فى تدوينه انهارده
*************

سقراطه :- الف سلامه ليكى ياختى ياحبيبتى ..مالك عندك ايه ؟؟؟؟؟؟؟

مسس رايق :- الله يسلمك يانعمه ياختى ..من امبارح الفجر وانا جنابى الاتنين هينفجروا ..الم شديد جدا ربنا ما يوريه لحد

سقراطه :- والدكتور قالك ايه ؟؟؟؟؟؟؟؟

مسس رايق :- انا مارحتش للدكتور

سقراطه :- مرحتيش للدكتور ؟؟؟؟؟؟؟ .....ده برضه اسمه كلام .....امال فين المتعوس جوزك اللى مايتسمى ؟؟؟؟؟؟؟؟؟؟

الرايق :- صباحك جبنه قديمه مدوده يا سقراطه هانم ....نفسى سوريا الشماليه تبعت لك قنبله نوويه على مقاسك ..يمكن نخلص من طلعتك البهيه

سقراطه :- بسم الله الرحمن الرحيم ....ايه اللى مدخلك تحت السرير يا رايق ؟؟؟؟ ..منك لله خضتنى

الرايق :- ههههههه هو انتى بتتخضى زى البشر ؟؟؟؟؟؟؟ ....عجيبه

سقراطه :- امال انت شايفنى ايه يا بتاع سوريا الشماليه ؟؟؟ ...اسمها كوريا الشماليه ...مش سوريا

الرايق :- سوريا ولا كوريا هو انا هناسبها ...تطلع زى ما تطلع بس المهم تبعت القنبله ليكى لوحدك..انا كنت نازل ادور على الترموميتر وقع تحت السرير

سقراطه :- سايب مراتك تتوجع من امبارح الفجر ومودتهاش للدكتور ليه يا رايق ؟؟؟؟؟؟؟

الرايق :- خسئتى ..وخسىء ملفظك ...انا اودى مراتى للدكتور ..وانا دكتور وعلامه كمان ؟؟

سقراطه :- انت دكتور ؟؟؟؟؟؟؟؟؟؟

الرايق :- شوفى يا متخلفه انتى ..انا درست الطب لمده 12 سنه ......وقريت لحوالى 150 دكتور ....وده يدينى الحق انى اكشف على اى حد براحتى واكتب العلاج كمان

سقراطه :- مش فاهمه ....فهمنى اصلى كل ما اشوفك ...افتكر عالم الحيوان

الرايق :- عالم الحيوان ؟؟؟؟ عموما هاعديهالك المره دى ...بس لازم افهمك.......شوفى يا متخلفه ..طبعا عارفه الدكتور محمد سيد دكتور العظام المشهور

سقراطه :- عارفاه

الرايق :- اهو انا كنت زميله فى الابتدائى والاعدادى والثانوى...احسبى بقى 6 سنين ابتدائى و3 اعدادى و3 ثانوى يبقى 12 سنه وانا زميله يعنى شربت مهنه الطب

سقراطه :- اسم النبى حارسك وصاينك ...لأ عندك حق.......وايه حكايه ال 150 دكتور اللى قريتلهم دول ؟؟؟

الرايق :- طبعا زى عوايدك مش مصدقانى لكن انا هاثبتلك كلامى ....شوفى الاسامى اللى مكتوبه هنا ..خدى اقريى

سقراطه :- مالهم دول ؟؟؟؟؟؟

الرايق :- دى اسامى 150 دكتور قريت لهم اليافطه بتاعتهم...كل ما امشى فى شارع الاقى يافطه دكتور اقراها واكتب اسمه ....لغايه لما وصلوا ل150 اسم يعنى انا من حقى اخد جايزه موبيل فى الطب

سقراطه :- ههههههههه ....احسن حاجه قلتها ....فعلا من حقك جايزه موبيل ...وتاخدها بنزين وسخ من ال 80 اللى لسه مغليش ...اسمها جايزه نوبل مش موبيل يا فالح

الرايق :- نوبل ولا موبيل ...هو انا هناسبهم ..المهم شوفى يابنت الناس .....انا مسبتش اختك من غير علاج ...انا استلفت لها على الصبح 600 جند من ام عادل جارتنا ..وكتبت روشته بنفسى ورحت اشتريتها من الصيدليه برضه بنفسى

سقراطه :- ورينى العلاج ابو 600 جنيه ده ؟؟؟؟؟؟؟؟؟

الرايق :- ادى يا ستى الشوال قدامك اهه ...اتفرجى براحتك

سقراطه :- ايه ده ؟؟؟؟؟ .....عشر لفات شاش ؟؟؟؟؟.......انتى متعوره يا ختى

مسس رايق :- لا ياختى مش متعوره ولا حاجه ...ده سى عبده جابهم وقالى لازم اى مريض يبقى متربط بشاش

الرايق :- اوه نو ......ذاتس رايت ...مفروض طالما فى مريض يبقى لازم شاش

سقراطه :- وده ايه كمان ؟؟؟ مكركروم ويازول ..وقطره عيون ومرهم عيون

الرايق :- طبعا ..اهم حاجه المريض عنيه تكون سليمه علشان يعرف مين اللى زاره

سقراطه :-وده ايه ؟؟؟؟؟؟...عشر دست معالق شاى ؟؟؟؟؟؟

الرايق :- علشان تاخد بيهم الدواء

سقراطه :- هو فين الدواء ؟؟؟؟؟؟؟؟؟

الرايق :-دواء ايه ؟؟؟؟؟؟؟انا عملت اللى عليا والباقى على ربنا....انا جبت كل حاجه حتى الجبس جبت سبع شكاير يمكن نحتاج نجبسها كلها ولا حاجه

سقراطه :- منك لله يا رايق ....انا هاخد اختى اكشف لها ...واشتريلها فرخه تبر بيها نفسها

الرايق :- فرخه ؟؟؟؟؟؟؟؟؟؟؟؟ فرخه ؟؟؟؟؟؟؟؟؟ فرخه ؟؟؟؟؟؟؟.... ااااااااااااااااااااااااااااااه يا جنبى انا كمان تعبااااااااااان قوى

الأحد، 25 مايو، 2008

الرايق الصغير علمنى الادب


الرايق :- هااااااااااى افرى بدى ...نسايبى حبايبى هنا ؟ يا مرحبا يا مرحبا ...ماى هاوس فيرى فيرى نور بوجودكم....وايه الليفه اللى انتوا رمينها على الكرسى دى ؟؟؟


مسس رايق :- سى عبده ابوس ايدك ماليكشى دعوه بنعمه اختى


سقراطه :- مين الليفه دى يا فارس زمانك ؟؟؟؟؟؟؟ياريت تتمسى وتبعد عنى احسن العفاريت كلها بتتنطط دلوقتى فى وشى


الرايق :- شايفهم ....ههههههه ...اهم عمالين يتنططوا ..اوعى تهزى مناخيرك احسن واحد فيهم يقع من عليها ولا حاجه ....هههههه


اخو مسس رايق :- ازيك يا عبده ..انت مش هتبطل مناكفه انت ونعمه ....المهم عامل ايه ؟؟؟؟


ام مسس رايق :- ازيك يا عبده يابنى...قولى الاحوال عامله ايه معاك ؟؟؟؟


الرايق :- فيرى فيرى جووود يا مسس حماتى ....انا داخل على مشروع تقيل هيكسبنى فلوس بالهبل


سقراطه :- انت تااااااااااانى يارايق ......هههههه ...ضحكتنى وانا ماليش نفس اضحك ....المره دى ناوى على ايه انشاء الله ؟؟؟؟


الرايق :- انتم مش عندكوا قصافه فى بيتكم يا سقراطه ؟؟؟؟


سقراطه :- عندنا ....ليه ؟؟؟؟


الرايق :- اصلى متهيئالى انك نسيتى تقصى لسانك وانتى جايه ...
بصى يا مسس حماتى ..انا نويت ادى دروس خصوصيه للتلاميذ بتوع المدارس فى فتره الاجازه


سقراطه :- حد يناولنى ايد مقشه ياناس .....يا نيله بختك يا اختتتتتتتتتتتتتتتتتتتتتتتتتتتتتتتتتتتى


الرايق :- سيبكم من سقراطه يا جماعه خليكم معايا انا ..
شوفوا يا جماعه انا ضليع قوى فى كل المواد وانتم عارفين انى بذاكر للرايق الصغير ..واهو مشاء الله ...صامم المنهج بتاع سته كله ...وفاهمه زى الحلاوه الطحنيه ...وبعدين المدرسه فيها اكتر من 2000 عيل ..على اسوء الظروف عيلين ماجوش ..يبقى عندنا 1998 عيل لو كل عيل اخدت منه فى اجازه الصيف 100 جند ...يبقى حسبه .......حسبه ....حسبه ....مش مهم الرقم دلوقتى .....وبكده اقدر احسن مستوايا وكل واحد له مليم هياخده


سقراطه :- يا راجل حرام عليك هو انت اصلا بتفهم لمال تفهم العيال ؟ وبعدين فين البيت اللى هيشيل العيال دول كلهم ؟؟؟


الرايق :- شوفى يا سقراطه ...اولا ( ولو انى زعلان على موضوع القصافه انما هجاوبك ) انا هادى الدروس فى حوش المدرسه واوقف العيال طابور زى طابور الصبح
ثانيا انا بفهم فى منهج الابتدائى والدليل الرايق الصغير .....ولد يا راااااااااااايق .......انت ياااااااااااااااض


الرايق الصغير :- نعم يابابا


الرايق :- عايزك تقول لتيتا ولخالو ولخالتك بابا بيشرح ازاى


الرايق الصغير :- بابا ممكن كلمه فى ودنك لو سمحت


الرايق :- تعالى على جنب فى ايه ؟؟؟؟؟


الرايق الصغير :- اقول على ايه ؟؟؟؟؟مش كل حاجه بتشرحالى باخد فيها صفر
وتقعد تقولى المدرسين مش بيفهموا ....ونبص فى الكتاب نلاقى كلامهم هما اللى صح


الرايق :- ولد .....خليك جدع ....وادى 10 جند اهم وقول انى بشرح احسن من الاستاذ ومن الابله


الرايق الصغير :- ماشى يا عوبد ..بس احلف ورحمه ابوك ما هتضربنى بعد ما يمشوا وتاخد منى العشره جنيه


الرايق :- ماشى يا عم احلف


الرايق الصغير :- تيتا خالو خالتو عارفين بابا بيشرح احسن من اى استاذ ومن اى ابله .......وانا بصراحه مفهمتش الدرس الاول فى الحساب الا من بابا


الرايق :- خد يا ولد عايزك فى كلمه على جنب


الرايق الصغير :- حاضر يا بابا


الرايق :- ايه حكايه فى الدرس الاول دى ....طيب وبقيه الدروس ؟؟؟؟؟؟


الرايق الصغير :- بقيه ايه يا باشا ؟؟؟؟؟....ده فاضل 6 دروس اضرب بقى فى 15 يعنى عايز منك 90 جنيه تانى


الرايق :- تسعين ايه ؟؟؟؟؟؟ وحياه ابوك يا ابن ال ....... لما الناس يمشوا لافرجك


الرايق الصغير :- خلاص براحتك


الرايق :- طيب مش كان الدرس بعشره جند ليه خليتو ب 15 جند


الرايق الصغير :- البنزين والحديد بيغلوا اشمعنى هتيجى عندى انا والدنيا تقف


الرايق :- خلاص ...خلاص ادى 90 جند وروح قول ان المنهج كله مش بتفهم من المدرسين زى بابا


الرايق الصغير :- ..بس احلف ورحمه ابوك ما هتضربنى بعد ما يمشوا وتاخد منى الفلوس


الرايق :- يابن ال ...... ماشى هاحلف


الرايق الصغير :- تيتا خالو خالتو ...انا مش بفهم من المدرسين زى بابا دا حتى زميالى فى المدرسه مستغربين وبيقولولى انت بقيت شاطر كده ليه فى الحساب وانا بقولهم بابا بيشرحلى الحساب


الرايق :- خد يا ولد عايزك على جنب


الرايق الصغير :- نعم يا بابا


الرايق :- حساب ايه يا ولد ؟؟؟؟هو انت عندك حساب بس ؟؟؟


الرايق الصغير :- لا ليه ؟؟؟؟؟؟؟


الرايق :- امال بتقول ليه حساب ومقولتش عن باقى المواد


الرايق الصغير :- طيب مش لما نتفق .....عندك فاضل 5 مواد شوف هتحسب الماده بكام ؟؟؟؟؟؟؟؟


الرايق :- ولد ...انا ممعيش اى فلوس تانى .....احسب اللى تحسبه ونبقى نتحاسب بعدين


الرايق الصغير :- ههههههههههه
ههههههههههه
ههههههههههه
انت فاكرنى منهم
دا انا تربيه ايديك وحياه عنيك .......شوف يا كابتن بابا ...خمس مواد فى 100 جنيه بخمسميت جنيه ....احلف برحمه ابوك ......انك هتجبلى بيهم عجله فى الاجازه وانا اظبتك


الرايق : عااااااااااااااااااااااااااا
انت السبب يابا
الدنيا دى غابه

الاثنين، 19 مايو، 2008

عمليه فرنسا هانم ...هتخلينا نبنى القصر

الف مبروك لبنتى العزيزه عزه انين الناى ..والف سلامه لاختى فرنسا هانم
وانا بهدى توام قلمى فرنسا هذه التدوينه وانا عارف انها مش هتزعل منها
***********************************************************************
هااااااااى مسس رايق ..ايه اللى فى بقك ده ؟؟؟ سنان ؟؟؟...من امتى طلعلك سنان يا مضروبه ؟؟؟


اممممممممممممممممممممم

وايه الكشافات دى ؟؟؟ جوز عيون ؟؟؟ نو نو نو ...انتى كل يوم بيتغير فيكى حاجه


ععععععععععععععبده يا رايق فى ايه ؟؟؟ انت جاى تتسلى عليا ولا ايه ؟؟؟؟؟؟؟


اوه نو مسس رايق ..انا بس فيرى هابى انهارده ...فرنسا هانم رجعت للتدوين تانى ..انا كنت قلقان وخايف عليها


هى مالها يا خويا فرنسا هانم


ابدا دى كانت بتعمل عمليه واحنا افتكرنا انها هتسيب التدوين ..وعلى فكره يور هسبن عمل حركه انما ايه ..فيرى فيرى بيتيفول


حركه ايه يا خويا ؟؟؟؟؟؟؟؟؟؟؟


قلت انى هاضرب عن التدوين وهاضرب عن الاكل والشرب لغايه ما ترجع فرنسا هانم


الحمد لله انها رجعت بالسلامه احسن لو كنت اضربت عن الاكل والشرب كنت بعد الشر مت يا رايق


اضراب ايه يا ام التخلف انتى ..انا كنت بقول كده وكده ...لكن ازاى اضرب عن الاكل والشرب ..كنت هاكل واشرب فى الخباثه من غير ما حد يا خد باله منى


طيب يا خويا ايه اللى مظقطتك ومفرحك قوى كده وعماله تهزر وتقول عينك وسنانك


شوفى يا متخلفه انتى ...انا خلاص كلمت سماسره كتير وهاشترى حته ارض فى وسط البلد قد عشرين الف متر مربع واعمل القصر اللى طول عمرى بحلم بيه وهاكلم ماى فرند المحافظ يعملى خط سكه حديد ويوصل مترو الانفاق لغايه باب القصر


تاااااااااااااااانى يا رايق .....ماتعيش يا خويا زى خلق الله وبلاش دماغك تسرح بعيد


بعيد مين يا ام التخلف انتى ...انتى مشفتيش ابن حجر العسقلانى جايب ايه ....يا دين النبى ..ده جايب اطنان من الشاى والنسكافيه وغير كده نص كيلو سكر بحاله يعنى حسبه 100 الف جند..... احسبى بقى...لو قلنا ابن حجر مهندس لسه على قده وجايب الحاجات دى كلها ...احسبى بقى ...الناس المليانه هتجيب ايه ....وطبعا فرنسا هانم تعبانه ومش فاضيه تروح الجمارك وتستلم الكونتنرات الكتير اللى جايه ...فانا عينت نفسى الواصى الشرعى على املاكها .....لغايه لما توصل مرحله الرشد فى قانون الرايق ..ومرحله الرشد دى لما توصل 80 سنه علينا وعليكى بخير

حرام عليك يا رايق هتورث البنيه وهى لسه عايشه ؟؟؟؟؟؟

ورث مين يا متخلفه انتى ؟؟؟؟؟ ....انا هاخد الهدايا وابيعها واعمل القصر واعين فرنسا هانم مديره مطبخ ...او سكرتيره بواب ..واهو نفع واستنفع

انا مش موافقه يارايق ....ده حرام

حرمت عليكى عيشتك مسس رايق ....وبعدين خلاص انا عندى فكره تانيه ...هاكتب الاوكره بتاعه باب القصر باسم فرنسا هانم ...وبكده ماكنشى ظلمتها ...وطبعا الاوكره بتاعه الباب اهم حاجه فى القصر وانا هاعمل لنفسى عشر نسخ

السبت، 10 مايو، 2008

الرايق..... والعلاوه الجديده


هاااااااااااى افيرى بدى

الاخت :- ازيك ياختى فى ايه مش بتروحى عند ماما والتليفون مرفوع من الخدمه على طول ..فى ايه ؟

مسس رايق :- مفيش حاجه ..من ساعه ما الرايق سمع عن العلاوه وهو قافل على نفسه ورافع سماعه التليفون وعماله يحسب مش عارفه فى ايه ...بقاله كذا يوم على الحاله دى ..انا خايفه يجراله حاجه

الاخت :- يارب يخلصنا منه ونرتاح

مسس رايق :- لا يا نعمه معندكيش حق ..حرام عليكى ..انتى عايزه تخربى بيتى بدرى

الاخت :- طيب ماتحاولى تكلميه وتشوفى بيعمل ايه

مسس رايق :- حاولت كتير ومش عايز يكلمنى خالص ولا يرد عليا ...ما تحاولى انتى تكلميه يمكن يسمع كلامك

الاخت :- هههههههه ملقتيش الا انا ....ده انا اصلا مبقبلوش لله فى لله ..ولو دخلت اكلمه برضه هاخرب بيتك ...هيطلقك

مسس رايق :- بس بس اقفلى على الموضوع ده اهو خرج من الاوده اهو

الرايق :- هااااااااااى افرى بدى .......مييييييين سقراطه ؟؟؟.......فرصه مطينه بطين ..هو انتى كل ماتيجى عندنا مش بتعدى على شريط السكه الحديد ؟؟؟؟

الاخت :- مش اهلا ولا سهلا يا زينه الرجاله ....ايوه بعدى السكه الحديد بتسأل ليه ؟؟؟؟؟؟؟

الرايق :- اصلى متغاظ من القطر ومن صوته وعايز منك خدمه لاخوكى العزيز مستر رايق ...عايزك اول ما تلاقى القطر معدى ....تقفى على السكه الحديد وتخبطيه ..علشان يحرم يعدى من هنا تانى

الاخت :- خبطه لما تاخدك ....عايز القطر يفرمنى ....مالك رافع ليه سماعه التليفون مش عارفين نطمئن على اختنا فى ايه ؟؟؟؟؟

الرايق :- شوفى يا سقراطه ...السياسه الداخليه لبيتى مش عايز ناموسه تدخل فيها ...فاهمه ولا اجيب ميكرفون وافهمك.....وعموما يا متخلفه انتى كمان انا هاشرح لك الموضوع والثواب على الله

الاخت :- قول يابلبل زمانك ....غرد وسمعنى ....اتحفنا بكلامك اللى يسد النفس

الرايق :- انا بعمل حسبه للعلاوه الجديده ...قل اعوذ برب الفلق 30 %...سبعه وسبيعه فى وش العدو ....علشان الخمسه مش محوقه نخليها سبعه

الاخت :- سبع كلاب لما ينهشوك

الرايق :- شوفى يا سقراطه سيبك من الكلام الاهبل ده وخلينا نتكلم ...ااااز فرندس ...الالف ومتين جند الزياده هتعمل شغل مع العبد لله يعنى هنتنعنش وهنفرفش وهتبقى الحياه حلوه ....انا عملت جدول مشتريات لقيت انى محتاج 60 الف جند فى الوقت الحالى هادخل فى جمعيه من خمسين نفر ب الالف ومتين جند واقبضها الاول يعنى اتحلت ..سبعه وسبيعه ....60 الف جند جند ينطح جند

مسس رايق :- اوعى تكون نسيت حد ياخويا ليه عندنا فلوس ...لازم نسدد اللى علينا كله طالما ربنا وقفنا

الرايق :- اسدد ؟؟؟؟؟؟؟؟ انتى يا ام التخلف اسدد ايه يا استيكه ؟؟؟؟...هو اللى على لسانك فلوس الناس فلوس الناس ؟؟؟
انا مش هسدد ولا جند ..لما يجى الكادر هسدد .....انا عندى التزامات اكتر من الكلام الفاضى ده

مسس رايق :- التزمات ايه يا خويا ؟؟؟؟؟؟؟؟؟

الرايق :- انا عايز اروح اسبانيا واشوف برج بيزا المائل لسه بيميل ولا بطل ميلان ...والرحله دى هتكلفنى ال 60 الف جند انا بقالى اسبوع بحسبها بالسحتوت

الاخت :- برج بيزا ؟؟؟؟....ربنا يكملك بعقلك يا رايق ...برج بيزا ده فى ايطاليا مش فى اسبانيا ...وبعدين انت هتستفاد ايه لما تشوفه بيميل ولا لأ
وبعدين مين قالك ان العلاوه الف ومتين جنيه ؟؟؟؟؟؟

الرايق :- الولد الفراش قالى يا عبده باشا انت بتقبض كام ؟؟؟؟قلت له بقبض 400 جند قالى هيص يا عم هتاخد 30 % عن كل 100 جنيه ...وانا بقى حسبتها ...30 فى 100 بيساوى 300 جند ....يعنى كل 100 جند هاخد عليهم 300 جند ...اضربى بقى فى 400 هتلاقى العلاوه بقيت 1200 جند وسبعه وسبيعه فى وش العدو

الاخت :- هههههههههه....والنبى يارايق طالبه منك خدمه ....وانت جاى من اسبانيا ...ابقى اخطف رجلك بالطياره ..على الصعيد عندنا ...كان فى نخله مايله شفتها هناك شوفهالنا لسه مايله ولا انعدل حالها هههههههههههههه

الاثنين، 5 مايو، 2008

تاج المصرى ..ردا على فرنسا هانم


تاج استندر لسه... نيو تاج ...جانى من الاخ المصرى
وانا بشكره جدا على الثقه دى وبقوله ياريت استوب هنا التاج علشان نعرف نحكم البلد كويس
بس المصيبه الكبيره ان التاج ده راح لفرنسا هانم ...قال ايه فاكره نفسها هتبقى ريسه علينا ...ههههههههههه ...ريسه يا فرنسا .!!!!!!!!!!!!!!!!! ..ليه هى البلد فضيت ولا ايه
طبعا انا وال 120 مليون مصرى بنرفض رفضا باتا ورفضا صريحا كون فرنسا هانم تمسك الحكم ...وهى هتنفع اصلا ؟؟؟؟؟؟ ...يا جماعه الست فرنسا بتروح الفرنه وتقف فى الطابور وتشترى عيش ....ريس ايه ده اللى يقف فى الفرنه ؟؟؟
لأ وكمان اللى زاد الطينه بله ..انها بتحارب واحده اسمها ام دبوه ...يعنى حاجه بلدى ..ناقص كمان تعرفنا على حكشه .... وام الللالى ...والمفك ..وابو الليل ..وخيشه ...والنص ..وابودراع ...وست ابوها
يعنى مقر حكم الجمهوريه هيبقى فى حاره ( كل واشكر ) او ( زقاق العجل ) او ( قصر الحرنكش ) بدل ( قصر رأس التين ) ويمكن
ونلاقى وزراء اسمهم شحيبر ..وشويغر ...وسحتوت ...والمليس ..وكعبر.. وحماصه
وانا اوعدكم انى سوف اتولى الحكم بدون اراقه دماء ...هى فرنسا هانم مش محتاجه حرب
هى كلمه واحده هاقولها وتلاقى فرنسا سابت الحكم

بخ

بس كده فرنسا هانم ذهبت مع الريح وكل عام وانتم بخير
ونجاوب بقى على تاج المصرى

تخيل انك اصبحت رئيس الجمهوريهاول خمس قرارات هتاخدها

1 - تقديم فرنسا هانم الى محاكمه ديمقراطيه عادله ...ومهما يكن الحكم فسيتم نفى فرنسا هانم الى مثلث برامودا ..علشان تجيبلنا قرار السفن الغرقانه هناك
2 - اقرار الكادر العام للموظفين وتسويه اجورهم اسوه بالقطاع الخاص
3 - محاوله اجتذاب العلماء والاطباء والحرفيين المصريين الماهرين المغتربين ...لمحاوله احياء نهضه مصر من جديد لعلنا نستطيه بث الروح فيها
4 - عمل كشف حساب كامل وشامل للدوله ....واطلاع ممثلى الشعب عليه بكل نزاهه ( بلاش كلمه شفافيه لحسن الناس تزعل منى ..ويقواوا من اولها شفافيه ؟ )
5 - الاهتمام بالنشىء براعم الغد فى صوره علميه حضاريه بما يتفق وعقليه الطفل المصرى حتى نتمكن من تشكيل عجينه صالحه للاستخدام العالمى

من هم أول خمسة وزراء ستعزلهم فور توليك مقاليد الحكم

طبعا انا مش هغش الاجابه دى من فرنسا لكن طالما فى حكومه جديده ورئاسه جديده فالكل سوف يتغير

ما هى أول خمسة أماكن ستزورها عندما تصبح رئيسا للجمهوريه.

السد العالى واقراء الفاتحه على روح الرئيس الراحل جمال عبد الناصر وعلى روح اموات المسلمين اجمعين

سيناء الحبيبه واقراء الفاتحه على روح الرئيس الراحل محمد انور السادات وشهداءنا الابرار

القلعه واقراء الفاتحه على روح نسر الشرق صلاح الدين الايوبى محرر القدس داعيا من الله عز وجل ان يخرج من بيننا محرر اخر للقدس

االقناطر الخيريه واقراء الفاتحه على روح محمد على صاحب نهضه مصر الحديثه

الاهرامات الثلاثه واتعجب لقدره جدى الكبير احمس بانى الاهرام

كون جمهوريه لنفسك ومن وزير الداخليه ومن وزير الخارجيه ومن وزير العدل ومن وزير التربيه والتعليم ومن وزير التعليم العالى (سواء من أصدقائك أو أقاربك).

كل واحد له عندى فلوس هياخد بيها وزاره بما لايقل عن عشرين الف جند للوزاره الواحده يابلاش
ها
حد ناوى يحجز
باب الحجز مفتوح من الساعه الخامسه مساء الى الساعه الخامسه وعشر ثوانى
يعنى هما عشر ثوانى واللى يلحق يشيل

من هم أول خمسة رؤساء ستقطع معهم العلاقات الدبلومسيه

اى دوله تشم نفسها علينا انا معنديش ياما ارحمينى ..ومش هخاف من حد
والدفاتى بتاعه الحكومه كلها هاعملها طيالرات ورق وصاواريخ والجدع يورينى نفسه

.من هم أول خمسة دول ستنول عطفك واهتمامك ومساعدتك "باعتبارك دوله غنيه"

فلسطين ...واريتريا ...والصومال ...وموريتانيا.... والاتحاد الاوربى

احب ان اضيف حاجه صغيره

التاج ده هديه لكل المعلقين
واللى مش عايزه يبوسه ويركنه جنب الحيطه علشان محدش يدوس عليه

اخر نكته

بيقولك واحده صاحبتنا اسمها فرنسا هانم اول ما اشترت كومبيوتر جديد كل ما حد يدخل عندها يلاقيها طالعه فوق ترابيزه الكمبيوتر وقاعده على الشاشه...واحده زميلتها سألتها بتقعدى كده ليه يا فرنسا مش خايفه تقعى او تتكهربى ....قالت لها فرنسا ..اصلى الراجل اللى اشتريت منه الجهاز بسأله ..هو الجهاز مؤذى للعين ؟؟؟ قالى لو قعدتى عليه ساعتين فى اليوم مش هيجرالك حاجه
هههههههههههههههه

الخميس، 1 مايو، 2008

مش عايز مكتب ...ماله السلم ؟


استاذ عبده ...ياراااااااااااايق ...انت نايم ولا ايه ؟؟

فى ايه ؟ هى الدوشه ورايا ورايا ..حتى هنا فى الشغل ...مش هنعرف ننام فى سنتكوا السودا دى ...وات هبن ؟؟

قوم يا استاذ عبده نفض هدومك من تراب السلم وتعالى ..سعاده البيه رئيس الحى عايزك ضرورى

ومجاش هو هنا ليه ؟؟؟؟؟؟..وبعدين انا معرفشى هو ساكن فين ...قدامى ورينا مكتبه ...طول عمرى بكره القلق

ادى اوضه رئيس الحى ..حبط وادخل

طق طق طق طق

هاى مستر بوس ..مستر بيج بوس بالحضن يا راجل اموااااااه...اموااااه

انا مش رئيس الحى يارايق ..السيد رئيس الحى قاعد على المكتب اهه

غريبه ....بجد ناس غريبه قوى ..طالما انت مش رئيس الحى بتسلم عليا ليه ؟؟؟...اوعى من سكتى الله لا يسيئك ..
ازيك يا ريس ...معلش الشمس كانت ضاربه فى عينى مشفتكشى

شمس ؟؟؟؟ شمس ايه جوه المكتب يارايق ..مفيش شمس ..عموما انا عاوزك فى موضوع مهم بالنسبه لك

طبعا ان كنت واثق ومتأكد مليون الميه انكم هتحتاجونى وتقدروا مواهبى

مواهبك .!!!!!!! اه فعلا مواهبك ...انت عارف الاستاذ اللى سلمت عليه ده وانت داخل ؟

ربنا يكرمك ويزيد من احسانك ياريس ...اكيد واحد عابر سبيل جاى ياخد حسنه ...انا للاسف ممعيش فكه كنت اتديتله

عابر سبيل ؟؟؟ اتأدب يارايق ..انت مش عارف الاستاذ مدير الاداره الهندسيه اللى انت بتشتغل فيها

ماخودش بالى منه ياريس
الاستاذ مدير الاداره الهندسيه جاى بنفسه يتوسط لك علشان تقعد فى اوضه وعلى مكتب زى باقى الموظفين ..وبيقول ان قاعدتك على السلم بقى منظرها وحش قوى والناس بدأت تقدم شكاوى عن الموضوع ده ...فانا قررت اديلك مكتب زى الناس

وانا عبده باشا الرايق قررت اديلك انت والمدير مكافأه 5 ايام ...انشاله ماحد حوش ...وهكلملكم ماى فرند المحافظ يرقيكم

انت قررت ايه يا رايق ؟؟؟؟؟؟؟؟ ....تدينى مكافأه ؟؟؟؟...ياخى بص لنفسك الاول ...ايه ده يا استاذ انت داخل المكتب عندى حافى ؟؟؟؟؟؟

اوه نو ايام فيرى فيرى سورى مستر بوس .....للاسف الجزمه عند بتاع الورنيش بتتورنش ...لزوم الشياكه يا ريس

اخرج بسرعه البس الجزمه وتعالى

بتاع الورنيش بعيد يا ريس ..ده جنب البيت على طول يعنى خمس محطات

امال انت جاى الشغل حافى ؟؟؟؟؟؟؟؟؟؟

يوميا ياريس .......كل يوم اطلع من البيت اسلم الجزمه لبتاع الورنيش ..واستلمها منه بتبرق وانا راجع من الشغل ...علشان البرستيج يا فندم

عايز تقولى انك بتيجى كل يوم الشغل حافى ؟؟؟؟؟؟

لا طبعا يا فندم ..زى ماحضرتك شايف لابس شراب ....و بعدين متشغلشى دماغك بالكلام الفاضى ده.....يلا بقى لم اوراقك علشان اقعد على المكتب بتاعى

من اولهاااااااااااا ...ده مكتبى انا يا رايق ...تعالى هنا ..امضى على الورقه دى علشان تستلم عهده

ثوانى يا فندم ثوانى ..اطلع الكارت بتاعى علشان بتلغبط فى الاسم

فى حد فى الدنيا يبتلغبط فى اسمه ...ورينى الكارت ده ...عبده الرايق عبده ...رقم البطاقه ...رقم بطاقه التموين ....ايه ده يا فندى الناس بتعمل كارت تكتب فيه رقم التليفون مش رقم بطاقه التموين

يعنى عايزنى اكدب يا ريس التليفون باسم مسس رايق ..لكن بطاقه التموين باسمى
عموما يا ريس متشغلشى بالك ...قولى بقى هنفرش امتى ؟؟؟؟؟؟؟

هنفرش ايه ؟؟؟؟؟؟؟

ماهو انا مش فاهم يا ريس هتشغلونى فين ؟ وهابيع ايه ؟؟ خضار ولا سمك ولا فاكهه ولا فول نابت

عبده يا راااايق ....اطلع بره ....بررررررررررررررررره ...اجرى اترزع مكانك على السلم
اطلع بررررررررررررررررررررررررررررررررررررره

الأحد، 27 أبريل، 2008

فتره مسائيه

جود افتر نون مسس رايق

اهلا ياسى عبده ..اتاخرت كده ليه ياخويا ؟..انا قلقت عليك

قلقتى عليه ليه ياوليه ؟..هو انا اللى كنت سايق ؟..عم محمد العربجى عيان وابنه اللى طلع بينا انهارده والظاهر ان الحصان مش واخد عليه

هو انت لسه بتركب العربيه الكارو ؟؟...ما الاتوبيسات ماليه الدنيا ..عموما ..الاستاذ عادل جارنا سأل عليك اربع مرات فى التليفون وعايزك ضرورى

ايوه ايوه انا قابلته وانا طالع على السلم وقالى انه عايزنى وجاى عندنا حالا

ترررررررررررررررررررررر

الظاهر ان هو ده اللى بيرن الجرس ..ادخلى جوه مسس رايق ...الراجل عنده عيال بدال ما يشوفك يتخض ولا حاجه

ليه هو انا بخض الناس ؟؟؟....حرام عليك يا عبده

مش وقت الكلام فى محاسن سيادتك مسس رايق ..ادخلى جوه وانا رايح افتح الباب للراجل

***********

هاى مستر عادل ..ماى فلات نورت بوجودك اتفضل

السلام عليكم ...يارب ياساتر

اتفضل يا راجل بيتك ومترحك ..اتفضل هنا فى الريسبشن

شقتك حلوه يا استاذ عبده بسم الله ماشاء الله

ابتدينا بالنق ...هههههههه ..انا بضحك معاك ..نق ولا يهمك ...شرفتنا مستر عادل

والله يا استاذ عبده انا ملاحظ ان حضرتك بتشتغل فتره واحده لغايه الساعه 2 ظهرا ..انا قلت لو حضرتك تشرفنا فى الشركه اللى بشتغل فيها ..وتشتغل معانا فتره مسائيه من 6 الى 10 مساء .. يبقى شرف كبير للشركه

اه بس انت عارف ان الامور دى متنفعشى كده على طول ...لازم نسأل عليك وعلى اخلاقك وعلى عيلتك وبعدين ناخد قرار ..يعنى ادينى فرصه 5 سنين افكر

اخلاق ايه وعيله ايه يا استاذ عبده ؟؟...هو انا جاى اتجوز...انا عايز حضرتك تشتغل معايا فى الشركه ...وكلمت المدير والمدير وافق

مدير ؟؟؟؟ هى الشركه فيها مدير ؟؟؟؟؟ امال عايزنى انا ليه ؟؟؟

احنا عايزينك تشتغل فى المخازن ...تظبط الوارد والصادر فى كشف ...فى واحد شغال نهار وانت هتشتغل ليل

هو شركتكم دى عباره عن ايه ؟؟؟

احنا شركه تصدير واستيراد...شركه ايهاب وعاطفكو

والمرتب كام ؟؟؟ والاجازات امتى ؟؟؟

اتفقت مع المدير على 450 جنيه شهريا ..ومتنساش انها فتره واحده ...والاجازات يوم الجمعه

نو نو نو ....شوف مستر عادل ...انا علشان اقبل اشتغل معاكم لازم تقبلوا شروطى

شروووووط ؟؟؟؟ ...شروط ايه يا استاذ عبده ...هو الشغل كمان فيه شروط ؟؟؟

اوف كوورس ...انا ليه شروط ولازم توفقوا عليها فى خلال 48 ساعه والا المقابله تعتبر ملغيه

الصبر يا رب .....ماشى يا عم عبده ايه بقى شروطك ؟؟؟؟؟

اولا - لازم يجى لى طلب رسمى من صاحب الشركه شخصيا يدعونى الى التكرم وقبول الوظيفه فى الشركه

اه .........الله ماطولك ياروح ....كمل يا استاذ عبده ...وبعدين

ثانيا - لازم وحتما ولابد يتغير اسم الشركه البلدى ده ...وتسموها اى اسم تانى ...ولو سميتوها ..شركه الرايقكو تبقى فكره هايله
ايه ساكت ليه مستر عادل ؟؟؟

هه ؟؟؟؟؟
لا ابدا اصلى سرحت شويه معلشى ...وايه كمان يا استاذ عبده ؟؟


ثالثا - المرتب لايقل بحال من الاحوال عن 12 الف جنيه مصرى او ما يعادلها بالعملات الاجنبيه
ايه يا راجل انت بتبص للسقف ليه ؟؟؟

لا ابدا معاك

رابعا - الاجازات يوم الجمعه والاثنين والاربعاء من كل اسبوع
خامسا - وقت العمل من الثامنه الى التاسعه والنصف
سادسا - سياره همر بالسائق للعبد لله وسياره اخرى لتوصيل الرايقين الصغيرين للمدارس
سابعا ....

استنى لو سمحت يا استاذ عبده ..ممكن استعمل التليفون

اتفضل ..أأز يور هوم

الو ..ام محمد ..انتى طالق

وات هبن مستر عادل ؟؟؟؟

ولا كلمه ...ولا عايز اسمع صوتك ..انا طلقت مراتى علشان هى السبب ...بقالها شهرين تزن على دماغى وتقولى شوف للرايق شغالانه معاكم اى حاجه انشاله فراش ..مراته كل يوم تكلمنى وتقولى مش لاقيين ناكل
لغايه لما انطصيت فى نظرى واتحايلت على صاحب الشركه يشغلك ..لغايه لما وافق بعد عذاب


خلاص خلاص ..ولا يهمك مستر عادل ..طلقتها ..طلقتها ..ولا تزعل عندى لك عروسه فيرى فيرى بيتيفول

الأربعاء، 23 أبريل، 2008

اربعه قهوه مشكله


وعندك واحد شاى سكر بره ..وعندك اتنين حمص

ولد يا حسن فى ايه ؟ ..مالك مطنشنى خالص ولا اكنى هواء قاعد على التيبول ..وير يور ايس ؟

ايوه يا استاذ رايق خير ..اصطبحنا واصطبح الملك لله

خير ايه ياولد ؟...هو انا جاى اتساهر معاك ؟..انا قاعد على القهوه بقالى نص ساعه ..وانت رايح جاى ..مش معبرنى ..هو انا مش باين من الترابيزه ..ولا نظرك مش جايب لغايه عندى ؟

تحت امرك يا استاذ عبده عايز ايه ؟؟

ايوه كده ..ناس تخاف متختشيش صحيح

ياعم متكترشى فى الكلام عايز ايه ؟؟

هاتلى اربعه قهوه .واحده ساده ..وواحده على الريحه ..وواحده مظبوط.. وواحده زياده

ياعم بلاش الحكايه دى ..قديمه ...عملتها معايا قبل كده وجبت لك الاربعه قهوه وشربت من كل فنجان شويه وفى الاخر تقولى اخترت المظبوط ...هو احنا فاتحينها حادى بادى ..خلصنا يا عم تشرب ايه ؟؟

خلاص يا ولد ..هاتلى واحد قهوه مظبوط

ايدك على 25 جنيه الاول

ليه هو انا قاعد فى الشيراتون ..25 عفريت لما ينططوك ..انت ولد فيرى فيرى امبسيبول

ياعم مترطنليش بالاجنبى وحياه والدك ..عليك 24 جنيه حساب قديم وواحد قهوه بجنيه يبقى 25 جنيه ..خلص علشان ورايا زباين ..مش كل مره تطلب وتمشى ..انت فاكرها سبيل ؟؟؟

خلاص ياولد ..بلاش قهوه ..خد الجاوند الطبى ده ..البسه فى ايدك واغسل كوبايه بالرابسو 3 مرات وهاتلى كوبايه ميه ساقعه

طلما انت نزيه كده وحركات ...فى ميه معدنيه ايدك على جوز جنيهات واجيبلك ازازه معدنيه

اه من التخلف ...اه من التخلف ..يا متخلف ان بستعمل الميه المعدنيه فى غسيل وشى الصبح ..مش فى الشرب...انجر يلا هاتلى الميه ..والبس الجاوند ده .

بص انا اصلا مخنوق منك ...وروحى فى مناخيرى ..ابعد عنى الساعه دى الله لا يسيئك ..والحنفيه هناك اهى .روح اشرب منها

ولد انت مرفود ...جوو اوت ...جوو اوت
استغفر الله العظيم ..الصبر يارب
تعالى يا معلم حنفى شوف الرايق ده خنقنى بصراحه

ايه يا استاذ عبده فى ايه ؟؟؟ استهدى بالله كده وصلى على النبى ...هات يا حسن واحد قهوه لعمك عبده على حسابى

سانك يو معلم حنفى ..فى كمان 24 جند ابقى ادفعهم طالما حلفت

يا عم ولا يهمك ..عندى انا ال 24 جنيه ..بس انا ليا عند طلب

خير يا معلم انت تأمر

الجماعه بتوع الحى مزودينها معانا شويه ..وبتوع التنظيم شدين حيلهم علينا حبتين ..وانت عارف القهوه صغيره والحته الوساعايه اللى قدامها نفعانى.. انا عايزك بقى تكلمهم يخفوا عنى شويه

ياسلام يا معلم انت تأمر .. غالى والطلب رخيص ..بس الجماعه بتوع التنظيم دول فين وانا اروح لهم...فى مصر هنا يعنى ولا فين ؟؟؟؟؟

ههههههههههه ...انت مش عارف زمايلك ؟؟ اكيد بتهزر ...عموما انا مستعد ادفع لهم اللى عايزينه ..ويخلصونى من المشاكل كل شويه
انت متأكد يا معلم ان احنا عندنا حاجه اسمها تنظيم ؟؟؟ ..اصلى معرفشى غير تنظيم الاسره
ياعم عندكم تنظيم فى ايه يا رايق انت مش شغال فى الحى ولا ايه ؟؟؟؟؟

شوف يا معلم حنفى ..طالما ناوى تدفع ..كل حاجه هتتحل ...ايدك على ربع مليون يورو وانا اخلص لك المشوار ده فى وان منت ...
ايه يا معلم حنفى قمت ليه ؟؟؟
الله فى ايه ؟؟؟ سبتنى ومشيت ليه ...يامعلم ..يا معلم ..يامعلم

الأحد، 20 أبريل، 2008

المطرب الجديد ..عبده الرايق


اخوانى الاعزاء واخواتى العزيزات
نداء الى اصحاب القلوب الرحيمه
يمر اخوكم عبده الرايق بظرف طارىء ومحتاج مساعدتكم الماديه ...ساهم اخى العزيز ..ساهمى اختى العزيزه
من قدم شىء بيداه التقاه ...وهنيه لك يا فاعل الخير والثواب ...وحسنه قليله تمنع بلاوى كتيره

ايه رايك مسس رايق فى الداخله المتشحتفه دى ؟؟؟؟

رايئ فى يا خويا انت داخل تشحت ولا ايه ؟؟

اشحت ايه يا متخلفه انتى ...انا فى ورطه ولازم كل المدونين يقفوا معايا ...هو الناس مش لبعضيها ولا ايه ؟؟؟

ورطه ايه يا خويا اللى بتشحت عليها دى ؟؟

تااااااااااانى بتشحت ؟؟؟؟؟؟ ....عموما يا ام التخلف انتى انا همشيها تشحت ...المهم ..فكرك المره دى المدونين هيدفعوا ولا هيلعبوا معايا الدنيئه زى كل مره ويدونى صابونه

مش اعرف طيب الورطه الاول وانا اقدر احكم الناس هتديك فلوس ولا لأ

طبعا مانتى ولا هنا ...فالحه بس تاكلى وتشربى وتتفرجى على توم وجيرى ...وضاربه الدنيا صرمه ..وعلى على بالك انا يور هسبن ..واقع فى ورطه فيرى فيرى بيج

خوفتنى ياخويا ...فى ايه كفالله الشر

انتى مش عارفه ان مرات اخويا ولدت اول امبارح ..وان السبوع بعد اربع ايام

عارفه ياخويا ..لكن فين الورطه ؟؟؟؟؟؟

ربى رحماك ربى .......غلطه عمرى انى اتجوزتك يا ام التخلف ....امرى لله ...هانزل لمستواكى الفكرى وافهمك

قول يا خويا انا سامعه

اخويا ناوى يعمل سبوع بلدى ..بفشار وسودانى وحمص ...شغل بلدى ...انا قلت له نو نو نو ....احنا لازم نعمل سبوع فيرى فيرى لارج ...انا هاحجز مركب نيلى عايم فايف استارز ..وهاعمل بوفيه مفتوح وهاجيب الفنانه الكبيره منسى عجرن تغنى فى البارتى ..ومعاها الفنان الكبير ناصر الساهر ..علشان نسهر للصبح ..وانا عملت الحسبه لقيت انى محتاج ربع مليون جند

طيب يا خويا بلاش البعزقه دى وامشى على قدك ...طيب ده انى نفسى فى الحمص بقالى شهرين واقولك يارايق عايزه ربع كيلو حمص تقولى لما حد يولد ابقى روحى السبوع هيدوكى حمص

الكلام ده مش فى عيله الرايق ... انتى متعرفيش ان اصول جدودنا ملوك ؟؟؟؟

ملوك ؟؟؟؟؟؟ ...ههههههههههه ....ملوك فى ايه فى الشطرنج ؟؟؟؟

بتتريقى يا ام التخلف ؟؟؟ ...انتى مش عارفه ان جدى الكبير احمس باشا بنى الاهرام التلاته فى اسبوع زمن

انا يا خويا معايا دبلوم تجاره اى نعم لكن عارفه ان اللى بنى الاهرام التلاته الملك خوفو وخفرع ومنكارع .... وان الملك احمس طرد الهكسوس من مصر

هههههههههههه ....... متخلففففففففففففففففه ....طول عمرى بقول عليكى متخلفه ..شوفى يا ام التخلف ... الهكسوس دول اللى طردهم من مصر الباشا الكبير محمد على ...لما عمل القناطر الخيريه ...وطمع الهكسوس فى قنطره ..وراسهم والف سيف ياخدوا قنطره ...قالهم محمد على باشا ..عايزنها ليه القنطره دى ...قالوله ..عنينا وجعانا .وعايزين نحط فيها قنطره ...قام عملهم بارتى فى القلعه وجاب لهم بيتزا ونسكافيه ودبحهم زى العصافير

دماغك بقى يارايق محمد على عمل مذبحه القلعه للمماليك ...سبينا ياخويا من اجدادك وخلينا فى السبوع بتاع ابن اخوك ..انت معاك فلوس تعمل سبوع ؟؟؟؟

لأ طبعا وهو ده سؤال يا متخلفه ؟؟

طيب يا خويا بلاش نانسى عجرم وبلاش كاظم الساهر وسيب الناس يعملوا سبوعهم بنفسهم ملكشى دعوه بحد

طيب مالازم البارتى يبقى لارج ....خلاص نصيبهم كده مفيش الا حل واحد ... اروح اغنى انا فى البارتى وبالمره نفسى فى الحمص من زمااااااااااااااااااان

الأربعاء، 16 أبريل، 2008

فرح فى المنصوره

تحديث
-----------
اخوانى واخواتى الاعزاء
سلام الله عليكم
شكرا جزيلا للاستاذ صلاح حجازى على اذاعه حلقه سقراطه فى برنامجه اليومى انت تسأل والكمبيوتر يجيب
وشكرا لكل الاحباب الاعزاء
-------

الرايق فى عزومه فرح ابن اخت مراته فى المنصوره

ام العريس :- اهلا ياسى عبده خطوه عزيزه شرفتوا المنصوره

ابو العريس :- اهلا يا استاذ عبده والله شرفتونا

مسس رايق :- الف الف مبروك ياختى وربنا يتمم بخير

الرايق :- هاااااااااى افرى بدى .....اوعوا تكونوا اتغديتوا من غيرنا

ام العريس :- متخافشى يا خويا الاكل كتير وخير ربنا كتير ...شرفتونا وانستونا

الرايق :- ها هتعملوا فين البارتى ؟

ابو العريس :- الفرح تحت فى الشارع انت مشفتش الكراسى والنور وانت طالع ولا ايه ؟؟؟

الرايق :- شاااااااارع ؟؟؟؟؟؟ ..نو نو نو .....انا لايمكن اوافق على كده ابدا ....الفرح ده لازم يكون فى اوتيل
محترم ....ولا يهمكم ..انا هكلم ماى فرند المحافظ بتاع القاهره واحجز لكم دار الاوبرا ونعمل الفرح هناك وانشاء الله خلال شهرين تلاته اكون جهزت الحجز

الجميع :- اممممممممممممممممم

الرايق :- ايه مالكم بتبصوا لبعض كده ليه ؟؟؟ فى ايه ؟؟؟

ابو العريس :- لا ولاحاجه يا عبده بس انهارده الحنه وبكره الدخله وخلاص جهزنا كل حاجه

الرايق :- وايه يعنى ؟ مفيش مشكله نأجل الجوازه سنه او اتنين لما نوضب حالنا ....ايه هى الدنيا طارت ؟؟؟

مسس رايق :- بيقولولك انهارده الحنه وبكره الدخله تقولهم سنه او اتنين ...خلاص يا رايق الناس بيشكروك

الرايق :- خلاص مسس رايق انا كنت عايز اخدم ....الا قولى يابو هشام كتبتوا الكتاب ولا لسه

ابو العريس :- اه كتبناه امبارح

الرايق :- وكتبتوا القايمه بكام ؟؟؟؟؟؟

ابو العريس :- كتبناها ب 30 الف جنيه

الرايق :- ايييييييييييييييه ؟؟؟ سمعنى تانى .....30 الف جند بس ....لأ طبعا ..القايمه دى لازم تتغير ..وانا مش موافق على اقل من 100 الف جند ..احنا مش ضمنين شباب اليومين دول ..ولازم نكتف الولد ده ..ونحفظ لبنتنا حقها

ابو العريس :- يا رايق العريس هو ابننا احنا ....واهل العروسه وافقوا على القايمه ...انت عاوز تزود علينا ؟؟؟
الرايق :- هو انت تعرفه من زمان ؟؟ وعارف اخلاقه كويس ؟؟

مسس رايق :- فى ايه يا عبده حرااام عليك ..ملكشى دعوه بالناس

الرايق :- خلاص مسس رايق انا مليش دعوه انا كنت عايز اخدم بس .......امال فين العريس ؟؟؟

ابو العريس :- بيلبس جوه يا عبده ....يا هشاااااااااااام ...تعالى سلم على خالتك وجوز خالتك

العريس :- اهلا يا خالو عبده ...اهلا يا خالتو

الرايق :- هاى نيو هسبن ....مبرووووك يا بطل والله فرحت لك فرى فرى ماتش

العريس :- شكرا يا خالو عبده

الرايق :- وعلى كده بقى لقيت بنت الحلال ولا لسه بتدور ؟؟؟؟؟؟؟؟

الجميع :- امممممممممممممممممممم

الرايق :- ايه يا بيبول مالكم فى ايه ؟؟؟...هو انا كل ما اتكلم تبصوا لبعض ...فى ايه ؟؟؟؟

مسس رايق :- يا عبده ارحمنى الله يخليك ...الولد حنته انهارده وفرحه بكره يبقى ازاى لسه بيدور على العروسه ؟

الرايق :- عادى يا جماعه وفيها ايه ؟.......عموما يا هشام يا حبيبى انا ماكنتش عامل حسابى على فلوس سايله ...انا هاكتب لك شيك بالنقطه بتاعتك

ابو العريس :- خلاص يا استاذ عبده انت بتعمل ايه ؟؟...ميصحش تكتب حاجه

الرايق :- احنا عندنا كام هشام ؟؟؟ وادى شيك ب 20 الف جند نقطه حايره طايره من جوز خالتك الرايق

العريس :- شكرا يا خالو

الرايق :- انا كان نفسى اعمل فرح اكبر من كده واذود الكراسى والساقع والكهربا والذى منه ..بس كنت محتاج يكون فى ايدى 1000 جند سيوله ..وللاسف البنك قفل

ابو العريس :- يا استاذ عبده احنا قمنا بكل حاجه وجهزنا كل حاجه

الرايق :- لالالالالالالالالالالالالا
فى حاجات ومحتاجات كتيره كنت عايز اعملها

العريس :- عموما يا خالو انا مجهز كل حاجه ولو انت عايز تعمل حاجه نفسك فيها ادى ال 1000 جنيه خليهم معاك واتصرف براحتك

بعد الفرح فى شقه العريس

العريس متغاظ :- هو انت دفعت حاجه تانيه من جيبك فوق ال 1000 جنيه اللى انا اتديهملك يا جوز خالتى ....اصلى انا لاحظت انك نقطت اكتر من عشرين مره وكل مره كنت بتنقط ب 20 جنيه ..انت كنت واخد الفرح نقطه لحسابك
الرايق :- ده اقل واجب يا هش

العريس هيفرقع :- بس الواجب ده من فلوسى يا جوز خالتى

الرايق :- ادى يا سيدى الشيك بتاعك ....شيك ب 20 الف جند

العريس :- بس ده مش عليه امضاء يا جوز خالتى

الرايق :-يا راجل هو فى بينا وبين بعض امضاءات ...عموما الف مبروك
الا قولى يابو هشام انت هتجوز الولد التانى قريب ؟؟؟؟؟؟؟؟
واعى تنسى تعزمنا