الاثنين، 19 مايو 2008

عمليه فرنسا هانم ...هتخلينا نبنى القصر

الف مبروك لبنتى العزيزه عزه انين الناى ..والف سلامه لاختى فرنسا هانم
وانا بهدى توام قلمى فرنسا هذه التدوينه وانا عارف انها مش هتزعل منها
***********************************************************************
هااااااااى مسس رايق ..ايه اللى فى بقك ده ؟؟؟ سنان ؟؟؟...من امتى طلعلك سنان يا مضروبه ؟؟؟


اممممممممممممممممممممم

وايه الكشافات دى ؟؟؟ جوز عيون ؟؟؟ نو نو نو ...انتى كل يوم بيتغير فيكى حاجه


ععععععععععععععبده يا رايق فى ايه ؟؟؟ انت جاى تتسلى عليا ولا ايه ؟؟؟؟؟؟؟


اوه نو مسس رايق ..انا بس فيرى هابى انهارده ...فرنسا هانم رجعت للتدوين تانى ..انا كنت قلقان وخايف عليها


هى مالها يا خويا فرنسا هانم


ابدا دى كانت بتعمل عمليه واحنا افتكرنا انها هتسيب التدوين ..وعلى فكره يور هسبن عمل حركه انما ايه ..فيرى فيرى بيتيفول


حركه ايه يا خويا ؟؟؟؟؟؟؟؟؟؟؟


قلت انى هاضرب عن التدوين وهاضرب عن الاكل والشرب لغايه ما ترجع فرنسا هانم


الحمد لله انها رجعت بالسلامه احسن لو كنت اضربت عن الاكل والشرب كنت بعد الشر مت يا رايق


اضراب ايه يا ام التخلف انتى ..انا كنت بقول كده وكده ...لكن ازاى اضرب عن الاكل والشرب ..كنت هاكل واشرب فى الخباثه من غير ما حد يا خد باله منى


طيب يا خويا ايه اللى مظقطتك ومفرحك قوى كده وعماله تهزر وتقول عينك وسنانك


شوفى يا متخلفه انتى ...انا خلاص كلمت سماسره كتير وهاشترى حته ارض فى وسط البلد قد عشرين الف متر مربع واعمل القصر اللى طول عمرى بحلم بيه وهاكلم ماى فرند المحافظ يعملى خط سكه حديد ويوصل مترو الانفاق لغايه باب القصر


تاااااااااااااااانى يا رايق .....ماتعيش يا خويا زى خلق الله وبلاش دماغك تسرح بعيد


بعيد مين يا ام التخلف انتى ...انتى مشفتيش ابن حجر العسقلانى جايب ايه ....يا دين النبى ..ده جايب اطنان من الشاى والنسكافيه وغير كده نص كيلو سكر بحاله يعنى حسبه 100 الف جند..... احسبى بقى...لو قلنا ابن حجر مهندس لسه على قده وجايب الحاجات دى كلها ...احسبى بقى ...الناس المليانه هتجيب ايه ....وطبعا فرنسا هانم تعبانه ومش فاضيه تروح الجمارك وتستلم الكونتنرات الكتير اللى جايه ...فانا عينت نفسى الواصى الشرعى على املاكها .....لغايه لما توصل مرحله الرشد فى قانون الرايق ..ومرحله الرشد دى لما توصل 80 سنه علينا وعليكى بخير

حرام عليك يا رايق هتورث البنيه وهى لسه عايشه ؟؟؟؟؟؟

ورث مين يا متخلفه انتى ؟؟؟؟؟ ....انا هاخد الهدايا وابيعها واعمل القصر واعين فرنسا هانم مديره مطبخ ...او سكرتيره بواب ..واهو نفع واستنفع

انا مش موافقه يارايق ....ده حرام

حرمت عليكى عيشتك مسس رايق ....وبعدين خلاص انا عندى فكره تانيه ...هاكتب الاوكره بتاعه باب القصر باسم فرنسا هانم ...وبكده ماكنشى ظلمتها ...وطبعا الاوكره بتاعه الباب اهم حاجه فى القصر وانا هاعمل لنفسى عشر نسخ

هناك 74 تعليقًا:

Mafrousa يقول...

ههههههههههههههههههههههههه
ههههههههههههههههههههه
هههههههههههههههههههه
ربنا ما يحرمنا منكم انتو الاتنين .....لأ اتنين ايه
انا لسه عداهم عندى فى المدونه 118
جايبه سرتك فى البوست الجديد
ممكن انااشتغل سوفرجى مستر رايق

المـــفـــــــقــــــــوعـــــة مــرارتـهــا يقول...

ماتنساش تحجزلي سويت في القصر عندك يارايق ... والمثل بيقول اللي مالوش خير في مفقوعة مش هايبقي ليه خير في حد
ماتنسانيش ياراجل يابكاش

أبو خالد يقول...

عندك حق مستر رايق ففرنسا هانم
مش رايقالك ..بكرة تروق و تحلى
و تعلقك مروحه فى المدونة
********
ده أنت كنت هاتموت عليهاياراجل
تصور ياعبده أنا كنت زى اللى ضاع منه
كيانه
بس أنا زعلان منها قوى ..كان لازم
تقول حاجة أى حاجة
المهم هى رجعت ربنا يشفيها شفاء
لا يغادر سقما

ابن حـجـر الـعـسـقـلانـى يقول...

دى أول مرة أعلق عندك ... بس و الله مت من الضحك

بس انت أخدت بالك من الكونتينرات و التريلاات بس ... و ما أخدتش بالك إنه فيه مشروع أنا متعاون فيه مع خيخة اسمه:"المشروع القومى لكهربة عبده الرايق".. هاتشوف تفاصيله فى آخر تعليق ليا عند فرنسا

و ماعرفش انت تعرف "التونجر" و لا لأ

و يا رب أشوفك منور دايما يا رب .. و خد بالك من "منور" دى

بس بجد موتنى من الضحك

رئـــــيسـة حزب الأحلام يقول...

هههههههههههههههههههههههههه
يعنى بتمثل يارايق هتعمل اضراب كدة وكدة بس يكون فى علمك كلنا بنحب فرنسا وربنا يقومها بالسلامة العالم التدوينى مالوش طعم من غيرها
تحياتى لك

النمر الشرس يقول...

ههههههههههههههههه
هههههههههههه
هههههه
ربنا ما يحرمنامنكم
مدونتك جميلة جدا بجد مدونتك بضحك
يا عم عبده الراايق
شكرا

ابو درويش يقول...

ههههههههههههههر
بنا ما يحرمنا منكم انتو الاتنين .....لأ اتنين ايه
انا لسه عداهم عندى فى المدونه 118
جايبه سرتك فى البوست الجديد
هههه

نسر الشرق يقول...

هههههههههههههههه
ربنا ما يحرمنا منك ومن كلامك الى ذى السكر والله ضحكتنى ياعم عبده

Empress appy يقول...

هههههههههههههه
ههههههههههههههههه
دا انت كنت عامل زي البيبى اللى ضاعت منه امه دا انت خليتنى اعيط اكتر لما قريت تعليق
بقى هتاكل وتشرب طيب والله ما كات لنا نفس لحاجه خالص

المهم ربنا مش يحرمنا من بعض ابدل ونفضل اسره حلوه مع بعض

غير معرف يقول...

هههههههههههههههههههه
ههههههههههههه

لالالالالالا
مش معقول يا مستر رايق بقى هتبنى قصر بهدايا فرنسا
يا راجل حرام عليك

بس خلى بالك من حكايه الكهربا دى لحسن خيخه وابو العساقيل معندهمش هزار فى الحاجات دى

وشكلنا كده هنشوفك منور يا مستر رايق
ههههههههههه

الا هيا الاوكرة تجيلها بكام كده يا مستر رايق
:)))))))))))

سلامى
:))

غير معرف يقول...

قال مضرب قال
انا شيفاك بعيني وانت بتاخد
غطس في حله الباميه
بس مرضتش اقول قلت ان الله حليم ستار
بقولك ابي اتخطبت يارايق روح بقي
لم النقطه عشان تفرش القصر يااخويا
انت وراكط رايقين صغيرين

امل يقول...

السلام عليكم مستر عبده الرايق
اول مرة اعلقك عندك لكن بتابع كتاباتك كتير وبتعجبني قوي وطبعا بتضحكني من القلب انت وفرنسا هانم
واللي خلاني اعلق المرة دي مش عشان القصر ولا حاجة بس عشان فرحانة بعودة فرنسا هانم

حاجات جوايا يقول...

ههههههههههههههههه
بقى كده
هى دى الاخوة ؟
صدقت الحكمة القائلة
مصائب قوم عند قوم فوااااااائد

ربنا يشفيها ويرجعهالنا بالسلامة وتفضل تناكف فيك كده على طوووووووول
ههههههههههههههههههههه

دمت بخير أخى
سالى

كاميليا بهاء الدين يقول...

ههههههههههههههههههههه

ههههههههههههههههه

لا والله؟

بجد والله؟

الاوكرة؟

ياخوفى يابدران

عالقصر والعمدان

والكونترات والاطنان

بكرة لما فرنسا هانم تظهر وتبان

هانشوف مين اللى هايمسك الصولجان

هههههههههههههههههه

كنت خليك مُضرب أحسن
هههههههههههههه

انا بجد ، مستنية ردها

اول زيارة
بس دايما اقرأ تعليقاتك الجميلة
ومتابعة جدا لحوارك مع فرنسا

طبعا مش محتاج رأيى فى مدونتك

لإنها من أروع المدونات

تحياتى

آخر العنقود يقول...

ماكانش العشم مستر رايق
بقى خالتو العسل تستاهل منك كده ربنا يشفيها يارب وتشوف هتعمل ايه معاك
ههههههههههههههههه
وابقى اقدر رد بقى
والله انتوا دويتو ماحصلش ربنا يجمعنا دايما على خير وطاعة

تحياتى ليك ياعم عبده
وخد بالك من نفسك قوووووووووووووووى الفترة الجاية
هاااااااااا
خد باااااااااااااالك
:)

Doba يقول...

بت يا خييييييخة
واد يا ابن حجر

ايدك معايا منك ليها يلا

جهزتو الحاجة بتاعت الكهربا
يلا ايدك منك له وتعالى نكتفه علشان ينور ويتبوأ فى أميريكا اللاتينية براحته بقى

بقى كده يا اريق
كل لازم تعمل منه سبوبة

طيب بلاش الست المريضة

بس تصدق انا هطول السلك لغاية عندها علشان هيه اللى تقوم بالواجب معاك
===============
دمتم اخف دم فى عالم المدونات
هبة

قوس قزح يقول...

انا لو منك استغل الزوار لفرنسا فى القصر و اعمل تذاكر على بابه بيقولوا محصولها من الحبايب كتير :)

و اشمعنا يعنى وسط البلد ما تخليك بعيد عن الزحمة و خد جنب قصر الرياسة على الاقل الشوارع تحفة و متسفلتة كويسة

و وقتها تطلب يعملوا لك ممر طيارات خاصة لحد المطار هههههههههههههه


ربنا يخليكوا لبعض

فاتيما يقول...

آه
يعنى من دقنه و إفتلو
لاااااا
أفتلو إيه
دنت هتاخد الدقن تركبها لنفسك كمان
بقى عاوز تاخد الحاجات اللى جاية للبونية فى فترة النقاهة و تديها بدالهم اوكرة؟؟
يا خرابى عليك يا عبده
إنتو الأتنين شربات مصفى و ربنا ما يحرمنا منكم يا رب

عبده الرايق يقول...

واحدة مفروسة
نو نو نو
سوفرجى ايه ؟
انتى هتتعينى رئيسه مباشره على فرنسا هانم
شدى حيلك معاها
وعايزين نجرب نكسر ازاز على الارض ومشيها حافيه على الازاز
بس الواحد خايف على الازاز احسن يزعل

عبده الرايق يقول...

حماتــــــــــــي ملاااااااااااك
بس كده
غالى والطلب رخيص
سويت واحد بس ؟؟؟؟؟؟؟
نو نو نو
انا هاحجز ليكى باسكويت بحاله

عبده الرايق يقول...

أبو خالد
فرنسا بتعزك جدا يا بو خالد
وعلى فكره
بدون هزار مع انى حاسس ان جواها لغز
الا انى بحترم خصوصيتها
مش عارف
بس هى يمكن انها مقالتش لحد على العمليه يكون عندها اسباب برضه مش عارف
لكن انا بحب التمس لها الاعذار لغايه لما تخف واعرف منها الحقيقه
وانا عايزك تبقى جنبها لانها بتعزك جدا

عبده الرايق يقول...

ابن حـجـر الـعـسـقـلانـى
منور المدونه يا ابن حجر من غير تونجر ولا حتى حجر حياته اطول
انت منورها بنورك الطبيعى
وبعدين الرايق 2 ماجستير و 345 دكتوراه وثانويه عامه علمى علوم ومش هاعرف ايه التونجر ؟
ده.. نمر.. بالانجليزى
ههههههههههههههه
نو ده التانى تيجر
يلا ماشيها تيجر زى تونجر حد واخد باله ؟؟؟؟؟؟؟؟؟؟؟؟

عبده الرايق يقول...

رئـــــيسـة حزب الأحلام
لا كنتى فاكرانى هاموت علشان فرنسا ؟؟
نو
نو
نو
انا كنت باعمل حركه قرعه بس

عبده الرايق يقول...

النمر الشرس
ايه يا عم التيجر ؟
ازيك انا دخلت مدونتك
وفخور جدا جدا بيك
لكن انت لسه صغير ومش هتسلفينى فلوس يلا خلينا فى القليل
معاك كام فى الحصاله ؟؟؟؟؟؟؟؟؟؟؟

عبده الرايق يقول...

ابو درويش
انت بتعمل كوبى بوست للتعليقات
ظريف

مدحت محمد يقول...

الحمد لله انها رجعت كنت انت هتضرب وهى تغيب

هيبقى المدونات ملهاش طعم

وهرجع اكتئب تانى

الحمد لله انها رجعت
والحمد لله انك ماأضربتش

دمت اخف دم
ياسى عبده

تحياتى وتقديرى

عبده الرايق يقول...

نسر الشرق
ربنا يكرمك يا عم صلاح الدين

عبده الرايق يقول...

appy
كلام فى سرك يا ابى
كل الكلام اللى قولتيه صح
لكن انا بحاول اهزر معاها
وفعلا كنت زى اللى فى غيبوبه
مبروك على الخطوبه

عبده الرايق يقول...

shayma
نو نو نو
متخافيش يا شيماء
انا مجهز لابن حجر ولخيخه ولدوبا
افخاخ
وهيقعوا فيها
وهاعمل بيهم زينه رمضان

عبده الرايق يقول...

mayada
باميه ؟؟؟؟؟؟؟؟؟؟؟؟؟؟؟؟؟؟؟؟
هى رخصت
نفسى فى الباميه
هى هترخص ويبقى الكيلو بربع جنيه امتى؟

عبده الرايق يقول...

امل
كلنا فرحانين بعوده فرنسا هانم
بس انا فرحان علشان
الهدايا اللى بالهبل

عبده الرايق يقول...

Sally
هى طبعا مش مصائب قوى
وبعدين انا هشارك فرنشا فى السبوبه واشغلها خدامه

عبده الرايق يقول...

كاميليا
القلب الطيب جدا جدا
كاميليا
انا بحترم فيكى قلبك الطيب وخوفك على اخواتك المدونين
انا فعلا سعدت بزيارتك
وعلشان كده
هاخلص ذمتى من فلوس رنسا هانم
وهاعمل لها اوكرتين

عبده الرايق يقول...

آخر العنقود
نو الرايق ضد الطوفان
ولا فرنسا ولا غيره
البرازيل مفيش غيره

عبده الرايق يقول...

Doba
على فكره يا اخوانى الاعزاء
عندى مفاجاه لدوبا
هبه
انتظرى المفاجأه
انتى انضميتى لزينه رمضان

عبده الرايق يقول...

قوس قزح
انا راجل ادرجى
فكرت فى فكره التذاكر دى لقيتها مش جايبه همها
كله كان دخل المدونه خلاص
قلت اعمل تذاكر على الخروج
لقيت المدونه ليها بابين

عبده الرايق يقول...

فاتيما
هى الاوكره وحشه ؟؟؟؟؟؟؟
مش هو ده العدل يا ناس ؟؟؟
ام يوسف لعلمك انا فعلا كنت خايف لاكون بظلم فرنسا علشان كده قررت ابنى لها عشه جنب البواب

عبده الرايق يقول...

مدحت محمد
على فكره انت الوحيد اللى ممكن كنت توصل لها بما انك سويسى
واول ما كنت تعرف مكانها
كنت تقولى وانا اتولى الباقى
كنت هاكسب مكاسب

maiosha يقول...

بقى كده يا عبده
بقى لما عملت حركة وقلنا ..إيه حركات الجدعنة الجامده دى طلعت أوت!!

بس بجد بوست تحفة أنا مش قادرة امسك روحى من الضحك

وهتكتب كمان الأوكرة بإسم فرنسا لأ يا راجل جيت على نفسك أوى .. ربنا يقويك على فعل الخير

ملحوظة :
أنا سمعت إنهم هيكهربوك .. الله معلشى يا رايق إنت عارف إنى فى دوشة إمتحانات مايعلم بيها إلا ربنا بس ربنا يخليك لما يجوا يكهربوك إبقى إدينى خبر علشان أتفرج
سلام

ألف سلامة عليكى يا فرنسا

زيزو الشقى يقول...

انا مدون جديد

دى اول زيارة ليا


مدونتك حلوة اوى ودمها شربات

عز الدين


سلااااااااام يا استاذ عبده

Desert cat يقول...

طيب كويس والله يارايق فيك الخير هتكتب الاوكره باسم فرنسا بس اوعى لما تشطب القصر تنسى
المهم حمد اله على سلامة فرنسا وسلامتك انت كمان ياباشا

كلاكيت تانى وتانى يقول...

عاوزة كلنا نتبنى حملة لنضع الثقة فى حد فينا يكون قادر يوصل للكل لو حصل لحد حاجة لازم نطلع من ورا الكى بوردات ومينفعش حد فينا يتعب ومنروحلوش او منقدرش نوصلة
بطل هزار شوية يارايق وتبنى الحملة دى احنا كتير واللى حصل مش لازم يتكرر تانى
تحياتى

رئيس حزب المغتربين يقول...

استاذ عبده الرايق معلش انا واصل متأخر بس انت عارف انا ساكن فى دبي وعلى ما أجي وادخل مدونه فى مصر مشوار ودبي زحمه اليومين دول مش عارف ليه عموما انا حاسس ان مصر كفاية عليها كده واحد فى كفائتك المفروض تشرفنا هنا بدل الكهربا الى انت عايش فى وسطيها ديه كل الى عايزة منك مؤهلاتك وصورة جوازك وسيب الباقى على الله ثم على أخوك

اهو ده عيبه يقول...

ههههههههههه
اخرتها اوكرة باب

وكمان هتحن عليها وتعملها سكرتيرة بواب
ليه بواب خريج الجامعه الامريكية

والنبى مش عايز واحده تشتغل حله فى المطبخ ؟

تحياتى ليك

همس الاحباب يقول...

ههههههههههه
هههههههه
طب اعمل معاك ايه انا طلعت من القسم بمعجزة المرة اللى فاتت
فرنسا اتعتقلك المرة دى
وانا كل مرة اترجاها تسيبك وبعدين يا رايق اتبقى وصى على فرنسا هانم لحد ما يبقى عندها 80 سنةوالله كويس
وقصر فى وسط البلد
طب ما اقولك على حاجة ايه رايك فى قصر عابدين معروض للبيع ما تاخده يا رايق وانا اكرمك فى السعر
بس تعرف انك وحشتنى مووووت
تحياتى وتقديرى
خالد

رندا يقول...

ههههههههههه
هههههههههههههه
مش ممكن اسلوبك جميل بجد وبسيط قوى
وقوى جداااا
طيب انا مش قادرة اخرج من مدنتك طيب ممكن تقولى اعمل اية حضرتك هههه

هااروح اقرا تانى لا والتعليقات هقراها انت مش ممكن بجد

يارايق خليت كل الى حواليا يسئلونى انتى بتضحكى على اية هههههه
قلتهم الرايق هيبنى قصر ههههه
رندا

la3lahakhier يقول...

ههههههههههههههههههههههههههههههههههههه
بجد انتم توام لا حل له
ربنا مايحرمنا منكم ومن خفة دمكم يارب ويكتب لها كل الصحة والعافية امين

زيزو الشقى يقول...

يا استاذ راااايق

كتبت احد موضوعاتى وسوف ترى افكارى

تحياتى مسس رااااايق

عز

سلاااااااام

أم أحمد المصرية يقول...

ياراجل بقي انا جاية ازورك و اسأل عليك بناء علي توصيتها اننا نخلي بالنا منك :)))))))
الاقيك عايز تنصب عليها يا راجل و تلم الهدايا كويس بقي اني عرفت عشان أأمن الهدية قبل ما ابعتها

الـجـدة فـصـيـحـة يقول...

السلام عليكم ورحمة الله وبركاته

لا حقاني يارايق
اقرة القصر بحالها
جاي على نفسك ليه كدة



تحياتي

حنين القلب يقول...

هههههههههههههههههههههههههههههه
ههههههههههههههههههههههههههههههههههههههه
ههههههههههههههههههههههههههههه
والله يا رايق انت عسسسسسسسسسسسسل ولا يحرمك من فرنسا ولا يحرمها منك
وكنت هتاكل فى الخباثه طيب ليه جاى على نفسك كده
انا اللى اعرفه لما تقول كلمه تنفذها مش تاكل فى الخباثه
واوكره ايه اللى عايز تكتبها باسم فرنسا يعنى المال كله مالها وانت عايز تكتب ليها حته اوكره ارحم فرنسا دى لسه فى اجازة مرضيه
ربنا يسعدك زى ما بتسعدنا
سلام يا رايق

قلب صغير يقول...

والله ياعبده بيه
الاخت مفروسه وصفتلي وصفه خطيره اني ف اخر الواصفه حلاقي خالتي فرسنا عندك
امانه عليك
تقولي انت فين خالتي فرنسا

همس الاحباب يقول...

انت عارف كان نفسى اشوفك
امبارح فى حفل المدونين وكنت على بالى دايما
معرفش بحبك على ايه وانت مجننى معاك كده وحارمنى من انسك يا رايق
بس بقى من غير تهريج ده الايميل بتاعى
kh_cyc2006@hotmail.com
ابعتلى ايميلك او رقم تليفونك عليه وانا اكلمك اوك ولا اتعمل زى فرنسا تشحتفنا عليك
تحياتى وقبلاتى
خالد

WhItE HeArT يقول...

هههههههههههههههههههههه

اول مرة اجيلك من عند فرنسا حدف بس ايه ده

ده انته مشكلة بجد

حرام عليك مسس رايق اللي عملته فيها ده بصراحه

لأ بوست جميل

تقبل تحياتي

النمر الشرس يقول...

اهلا بك
يا عم عبده الراااايق مدونة جميلة جدا
حلوة مدونتك جدا
ههههههههههههههه
معسلام ياعم عبده الرااااااااايق
شكرا

القلم السكندري يقول...

هههههههههههههههههههههه


لا والله فيك الخير

أوكرة القصر بحالها؟؟؟

مش كتير برده ياراجل؟؟ ..حتي عيالك أولي بالأوكرة



تحياتي لروقانك يارااايق

عبده الرايق يقول...

maiosha
مسمعتيش اخر الاخبار ؟؟؟؟؟؟
مش انا كهربتهم كلهم
وعلقتهم على شجره
كل واحد نور حته

عبده الرايق يقول...

زيزو الشقى
متشكرين يا عم زيزو
خلى بالك من نضاره بابا
مع تحياتى

عبده الرايق يقول...

Desert cat
الله يسلمك يا قطه
وربنا يرجع فرنسا بالسلامه
اصلها مستلفه منى فلوس

عبده الرايق يقول...

كلاكيت تانى وتانى
اتبنى الحمله ؟؟؟؟؟؟؟
انا عندى 4 رايقين صغيرين
والحمله تبقى الرايق الخامس
بس على فكره
هى فكره كويسه جدا

عبده الرايق يقول...

عامل مش من هنا
انا مش عارف اقولك ايه
عاوز تخدمنى من غير ماتعرفنى
ربنا يكرمك
بس مؤهلاتى مش هتنفع تتبعت فى البريد
لازم قطر بضاعه او سفينه شحن
اصلها تقيله قوى
يجى اتنين كيلو وربع
بجد احييك على روحك الجميله

عبده الرايق يقول...

اهو ده عيبه
حله فى المطبخ ؟؟؟؟؟ حله فى المطبخ ؟؟؟
متهيئلى سمعت الاسم ده قبل كده
لكن فين ؟؟؟
مش عارف

عبده الرايق يقول...

همس الاحباب
قصر عابدين ؟؟؟؟؟؟؟؟؟
خلوووووووووووووود حبيبى
انت عايز تودينى فى داهيه
لا يا عم
بلاش قصر عابدين
خلينا فى سرايا القبه على قدنا

عبده الرايق يقول...

رندا
وليه تطلعى من المدونه
خليكى براحتك
هو مش فى عداد بيعد
ولا يهمك شوفى انتى هتقرىء كام حرف وانا هنزلك فى السعر

عبده الرايق يقول...

la3lahakhier
اللهم امين
ربنا يرجعها بالسلامه

عبده الرايق يقول...

زيزو الشقى
ماشى يا عم زيزو
انا هاروح اشوف انت كاتب ايه

عبده الرايق يقول...

أم أحمد المصرية
ومين قال انى هنصب عليها
انا كنت ناوى اكتب الاوكره باسمها
هى الاوكره رخيصه ؟؟؟؟؟؟

عبده الرايق يقول...

الجدة فصيحة
اهو بعزقه يا جده
هنعمل ايه ؟؟؟؟

عبده الرايق يقول...

حنين القلب
طيب ما نا لازم اكل
اصلى مبعرفشى اجوع
وكمان الاضراب عن الاكل مش كويس
وبعدين فرنسا ذات نفسها بتاكل
بس ادعى معايا ترجع بالسلامه

عبده الرايق يقول...

قلب صغير
طالما قولتى امانه عليك
انا هاقولك الحقيقه
بس اوعى حد غيرك يشم خبر
فرنسا موجوده فى السويس
بس
كتمى على الخبر

عبده الرايق يقول...

همس الاحباب
هو الاميل بتاعى يغلى على خالوووووود حبيب قلبى
aabbddoo666@yahoo.com
انا كمان والله بعزك جدا جدا يا ابو همس
برضه مش عارف ليه
يمكن
من القلب للقلب رسول

عبده الرايق يقول...

WhItE HeArT
من عند فرنسا وجاى فاضى ؟؟؟؟؟؟
يادين النبى
دى عندها اكل وعصير وفاكهه بالهبل
لو رحت تانى
ابقى هات لى معاك مما اعطاك الله

عبده الرايق يقول...

النمر الشرس
اهلا وسهلا عمنا النمر
اوعى تعض حد هنا يا نمر
احسن احنا برضه عندنا اسود

عبده الرايق يقول...

القلم السكندري
هو انا عبيط ؟؟؟؟؟
ماهو انا عامل حسابى
وعامل لنفسى عشر نسخ