الأحد، 25 مايو 2008

الرايق الصغير علمنى الادب


الرايق :- هااااااااااى افرى بدى ...نسايبى حبايبى هنا ؟ يا مرحبا يا مرحبا ...ماى هاوس فيرى فيرى نور بوجودكم....وايه الليفه اللى انتوا رمينها على الكرسى دى ؟؟؟


مسس رايق :- سى عبده ابوس ايدك ماليكشى دعوه بنعمه اختى


سقراطه :- مين الليفه دى يا فارس زمانك ؟؟؟؟؟؟؟ياريت تتمسى وتبعد عنى احسن العفاريت كلها بتتنطط دلوقتى فى وشى


الرايق :- شايفهم ....ههههههه ...اهم عمالين يتنططوا ..اوعى تهزى مناخيرك احسن واحد فيهم يقع من عليها ولا حاجه ....هههههه


اخو مسس رايق :- ازيك يا عبده ..انت مش هتبطل مناكفه انت ونعمه ....المهم عامل ايه ؟؟؟؟


ام مسس رايق :- ازيك يا عبده يابنى...قولى الاحوال عامله ايه معاك ؟؟؟؟


الرايق :- فيرى فيرى جووود يا مسس حماتى ....انا داخل على مشروع تقيل هيكسبنى فلوس بالهبل


سقراطه :- انت تااااااااااانى يارايق ......هههههه ...ضحكتنى وانا ماليش نفس اضحك ....المره دى ناوى على ايه انشاء الله ؟؟؟؟


الرايق :- انتم مش عندكوا قصافه فى بيتكم يا سقراطه ؟؟؟؟


سقراطه :- عندنا ....ليه ؟؟؟؟


الرايق :- اصلى متهيئالى انك نسيتى تقصى لسانك وانتى جايه ...
بصى يا مسس حماتى ..انا نويت ادى دروس خصوصيه للتلاميذ بتوع المدارس فى فتره الاجازه


سقراطه :- حد يناولنى ايد مقشه ياناس .....يا نيله بختك يا اختتتتتتتتتتتتتتتتتتتتتتتتتتتتتتتتتتتى


الرايق :- سيبكم من سقراطه يا جماعه خليكم معايا انا ..
شوفوا يا جماعه انا ضليع قوى فى كل المواد وانتم عارفين انى بذاكر للرايق الصغير ..واهو مشاء الله ...صامم المنهج بتاع سته كله ...وفاهمه زى الحلاوه الطحنيه ...وبعدين المدرسه فيها اكتر من 2000 عيل ..على اسوء الظروف عيلين ماجوش ..يبقى عندنا 1998 عيل لو كل عيل اخدت منه فى اجازه الصيف 100 جند ...يبقى حسبه .......حسبه ....حسبه ....مش مهم الرقم دلوقتى .....وبكده اقدر احسن مستوايا وكل واحد له مليم هياخده


سقراطه :- يا راجل حرام عليك هو انت اصلا بتفهم لمال تفهم العيال ؟ وبعدين فين البيت اللى هيشيل العيال دول كلهم ؟؟؟


الرايق :- شوفى يا سقراطه ...اولا ( ولو انى زعلان على موضوع القصافه انما هجاوبك ) انا هادى الدروس فى حوش المدرسه واوقف العيال طابور زى طابور الصبح
ثانيا انا بفهم فى منهج الابتدائى والدليل الرايق الصغير .....ولد يا راااااااااااايق .......انت ياااااااااااااااض


الرايق الصغير :- نعم يابابا


الرايق :- عايزك تقول لتيتا ولخالو ولخالتك بابا بيشرح ازاى


الرايق الصغير :- بابا ممكن كلمه فى ودنك لو سمحت


الرايق :- تعالى على جنب فى ايه ؟؟؟؟؟


الرايق الصغير :- اقول على ايه ؟؟؟؟؟مش كل حاجه بتشرحالى باخد فيها صفر
وتقعد تقولى المدرسين مش بيفهموا ....ونبص فى الكتاب نلاقى كلامهم هما اللى صح


الرايق :- ولد .....خليك جدع ....وادى 10 جند اهم وقول انى بشرح احسن من الاستاذ ومن الابله


الرايق الصغير :- ماشى يا عوبد ..بس احلف ورحمه ابوك ما هتضربنى بعد ما يمشوا وتاخد منى العشره جنيه


الرايق :- ماشى يا عم احلف


الرايق الصغير :- تيتا خالو خالتو عارفين بابا بيشرح احسن من اى استاذ ومن اى ابله .......وانا بصراحه مفهمتش الدرس الاول فى الحساب الا من بابا


الرايق :- خد يا ولد عايزك فى كلمه على جنب


الرايق الصغير :- حاضر يا بابا


الرايق :- ايه حكايه فى الدرس الاول دى ....طيب وبقيه الدروس ؟؟؟؟؟؟


الرايق الصغير :- بقيه ايه يا باشا ؟؟؟؟؟....ده فاضل 6 دروس اضرب بقى فى 15 يعنى عايز منك 90 جنيه تانى


الرايق :- تسعين ايه ؟؟؟؟؟؟ وحياه ابوك يا ابن ال ....... لما الناس يمشوا لافرجك


الرايق الصغير :- خلاص براحتك


الرايق :- طيب مش كان الدرس بعشره جند ليه خليتو ب 15 جند


الرايق الصغير :- البنزين والحديد بيغلوا اشمعنى هتيجى عندى انا والدنيا تقف


الرايق :- خلاص ...خلاص ادى 90 جند وروح قول ان المنهج كله مش بتفهم من المدرسين زى بابا


الرايق الصغير :- ..بس احلف ورحمه ابوك ما هتضربنى بعد ما يمشوا وتاخد منى الفلوس


الرايق :- يابن ال ...... ماشى هاحلف


الرايق الصغير :- تيتا خالو خالتو ...انا مش بفهم من المدرسين زى بابا دا حتى زميالى فى المدرسه مستغربين وبيقولولى انت بقيت شاطر كده ليه فى الحساب وانا بقولهم بابا بيشرحلى الحساب


الرايق :- خد يا ولد عايزك على جنب


الرايق الصغير :- نعم يا بابا


الرايق :- حساب ايه يا ولد ؟؟؟؟هو انت عندك حساب بس ؟؟؟


الرايق الصغير :- لا ليه ؟؟؟؟؟؟؟


الرايق :- امال بتقول ليه حساب ومقولتش عن باقى المواد


الرايق الصغير :- طيب مش لما نتفق .....عندك فاضل 5 مواد شوف هتحسب الماده بكام ؟؟؟؟؟؟؟؟


الرايق :- ولد ...انا ممعيش اى فلوس تانى .....احسب اللى تحسبه ونبقى نتحاسب بعدين


الرايق الصغير :- ههههههههههه
ههههههههههه
ههههههههههه
انت فاكرنى منهم
دا انا تربيه ايديك وحياه عنيك .......شوف يا كابتن بابا ...خمس مواد فى 100 جنيه بخمسميت جنيه ....احلف برحمه ابوك ......انك هتجبلى بيهم عجله فى الاجازه وانا اظبتك


الرايق : عااااااااااااااااااااااااااا
انت السبب يابا
الدنيا دى غابه

هناك 100 من التعليقات:

Mafrousa يقول...

ههههههههههههههههههههه
ههههههههههههههههه
ههههههههههههههههه
هههههههههههههههه
هذا الشبل من ذاك الاسد

واد ترية ابوه بصحيح

أبو خالد يقول...

مستر رايق
لايك فازر لايك صن
***
أفتقدتك فى حفل توقيع أول مدونة للجيب
كان نفسى أشوفك ..خيرها فى غيرها

Empress appy يقول...

ههههههههه تستاهل فرحانه فيك بجد
وبعدين مالك جايب سيرة حماده عزوووو ليه
بقولك ايه التعليم كده كده بايظ فيال بجمله بقى ادخل بقلب جامد

عبدالله يقول...

هههههههههههههههههههههههه


جميله جدا يا مستر رايق
اول مره اشوف مدونتك و قريت جزء كبير منها كلمات ساخره رائعه فعلا

تحياتي

همس الاحباب يقول...

هههههههههههه
هههههههههه
لا بجد رايق وجايب واحد اروق منك
وايظبطك بصراحة بس بجد الرايق الصغير طلع اشطر من الرايق الكبير بمراحل
وايخلص تار خالته سقراطة وكل العيلة
و2000 طالب شيل منهم 2 يبقى 1998
ليه فاكر نفسك المدرس الوحيد فى المدرسة
خلى الناس تاكل عيش يا رايق
بس بجد جامد يا روقة ومفطسنى من الضحك دايما
هو اخبار الكادر ايه
تحياتى وتقديرى
خالد

rtrcbh يقول...

السلام عليكم ورحمه الله وبركاته
اول زياره لمدونتك لكن بعد مارايت بها اعدك انها لن تكون الاخيره ابدا ان شاء الله
لسنا من نربى ابنائنا بل هم من يربننا
جزيتم خيرا على الموضوع وربنا يكرمك يارب
والسلام عليكم ورحمه الله وبركاته
اخوك
أحمدجمال

المـــفـــــــقــــــــوعـــــة مــرارتـهــا يقول...

ونعم التربية والتعليم

أنت ماجيتش الحفلة ليه يارايق أنا سألت عليك قالولي بيدي دروس ومش فاضي ؟؟؟؟

الساحرة يقول...

التلميذ دايما بيتفوق علي استاذة


ابنك تفوق عليك واللي بتعمله في الناس


طلع عليك يا جميل

2ensan wnsan يقول...

من شابه اباه فما ظلم يا رايق باشا

الرايق الصغير شكله هيفلسك يا رايق يا كبير واهو يرد حق سقراطه

لا بس واضح انك بتذاكر للواد دا كويس يا رايق الواد عارف يحسب كويس اهه ومٌشطك اول بأول اهه

حاجات جوايا يقول...

هههههههههههههههه
لا بجد ابنك ده ابن حلال مصفى

لو مكانش كده مين هيكون يعنى ؟
ربنا يخليهولك

دمت بخير

فاتيما يقول...

طبعاً يا عبدو
دا ذنب الأوكرة بتاعة فرنسا
ادفع للواد بقى و إنت ساكت
بجد بقى
أفتقدناك انت و خالتى بس فرنسا ليها عذرها
سيادتك بقى حرمتنا من وجودك وسطنا ليه ؟؟

صبرني يارب يقول...

ههههههههههههههههههه

عبده الرايق تصور انك رايق فعلا .

على فكره انا من يوم ما دخلت عالم التدوين ده من كام شهر كده وانا عايزه ادخل مدونتك على فكره من كلام فرنسا والناس الى اعرفهم عنك وانا عايزه ادخل المدونه اقرا بوست واحد يوحد الله مافيش فايده فشلت .
كل ماا فتح المدونه بتاعتك يحصل حاجه واقوم ومااعرفش ا قرا حاجه

واخيرااااااااااا جيت بقى
بجد حلو اسلوبك اوي ولعلمك العيال بقوا نفعيين كده ومش زي اهاليهم والله ده احنا غلابه ياا بنى

القلم السكندري يقول...

أضحك الله سنك


من شابه اباه فما ظلم

بصراحة الواحد بيفكر ييجي يتعلم علي ايدك مهاراتك الخارقة دي.. أن تلميذك ميتخفش عليه ف البلد دي



بس ع النوتة بقي عشان احنا اخر الشهر وانت عارف الحالة

القلم السكندري يقول...

سوري...

في حرف ت وقع


انت تلميذك.. مش ان

la3lahakhier يقول...

من اعمالكم ............

غير معرف يقول...

ههههههههههههههههههه

جامده يا رايق بجد

من شابه اباه فما ظلم

امال انت عيزه يطلع لمين يعنى
هههههههه

سلامى
:))

رئـــــيسـة حزب الأحلام يقول...

ههههههههههههههههههههههههههههههههه
ايه يارايق دة ابنك دة ولا محاسب عمال يحسب علطول كل شئ بحسابه
سلملى على الرايق الصغير دة مشكلة
تحياتى لك

جيهان علي يقول...

السلام عليكم ورحمة الله وبركاته

الرايق الصغير ده تحفة بجد
لا وعارف نظام الأسعار في البلد
كدة يبقى اطمنا على مستقبله


وبعدين حساب ايه اللي تديه لإبتدائي

ابعد عن التاريخ والجغرافيا
وطبعا اللغة العربية والإنجلزية كمان

ممكن بقى تدي ألعاب

وأنت ممكن بالكتير اوي لـ kg1


تحياتي

maiosha يقول...

ههههههههههههههههههههه
إبن الوز عوام يا رايق.. بسم الله ما شاء الله بجد ولد مشكلة.. بموت أنا فى العيال اللى بيعرفوا ياخدوا حقهم دول

بس بينى وبينك أنا إتأكدت دلوقتى إنك عمرك ما إديتلوا دروس فى الحساب.. الواد ماشاء الله بيحسب زى السوسة لو كنت إنت بقى اللى بتذاكرله كانت الحسبة هتبقى 2500 جند زى حسبة العلاوة كده

غير معرف يقول...

ههههههههههه
والله الرايق الصغير ده
رايق من ضهر رايق
عارف المثل اللي بيقول
ابن الرايق سفن اب (لذيذ ورايق )
ربنا يخليه لك
شفلي بقي اي سبوبه معاك في
مشوار الدوروس ده
ربنا يكفيك رواقه الرايق الصغير

مدحت محمد يقول...

هههههههههههههههه
لا ده الواد طالع مشكلة عنك ياعم

ربنا يخلهولك يارب

حنين القلب يقول...

ههههههههههههههههههههههههه
ههههههههههههههههههههههههههههههههههههههههه
ابن الوز عوام
وابن الرايق لازم يطلع لابوه
بس والله بوست عسل الواد الصغير بيقلبك
عمل اللى محدش قدر يعملوا وطلع من جيبك 90 جنيه والله شاطر
ربنا يسعدك ويحفظه ليك ويعيش ويقلبك
سلام يا رايق

Lobna Ahmed Nour يقول...

هههههههه

هههههههههههههههه

يا سلام على الرايق الصغير

هكذا يكون الابتزاز

انت اللي جبته لنفسك يا مستر

عبده الرايق يقول...

واحدة مفروسة

ده طلع القديم والجديد فى ابوه
انا بفكر اتعلم عنده

عبده الرايق يقول...

أبو خالد
وانا شفت صورتك وكان نفسى اتعرف عليك
وتصدق طلع شعر دقنك ابيض زى حالاتى
والصلعه نفس الوضع
تحيات الرايق لاخوه الكبير المحترم ابو خالد
ولنا لقاء بأذن الله

عبده الرايق يقول...

appy
حماده باشا عزووووووووو خلاها خل الخل
وخلا الناس هتختل
الف مبروك على الكتاب يا ابى

عبده الرايق يقول...

عبدالله
شكرا على الزياره
وعلى التجول فى المدونه
بس ايه رايك فى الامن والامان داخل المدونه ؟؟؟؟
اظن مفيش لا بلطجيه ولا عيال بتسرح بلب وسودانى ولا حاجه
اصلى عامل نظام شديد قوى

عبده الرايق يقول...

همس الاحباب
يقول الراوى
ياساده كان ياما كان ..كان فى زمان مشروع اسمه الكااااااااااادر
كان ماشى فى الادغال ولا همه لعب عيال
اصله كان قاااااااااااادر
جه الوحوش سرقوه وفى جيوبهم حطوه
واصبح غير قاااااااااااااادر

خالوووووووووووووووود
ابو همس حبيبى
شفت اللى جراء لاخوك الواد قلبنى

عبده الرايق يقول...

د/أبا يحيى وادم
وانا فى انتظار تشريفك لى
جزاك الله خيرا

عبده الرايق يقول...

المـــفـــــــقــــــــوعـــــة مــرارتـهــا
خدعوكى فقالوا ..لسه مشروع الدروس مبدأش
محتاجين شويه مصاريف
تشاركينى ؟؟؟؟؟؟؟؟؟؟؟؟؟؟
على فكره انا عرفت ان انتى اخت رئيسه حزب الاحلام
ونعم العائله

عبده الرايق يقول...

الساحرة
انا كده هاحذر من الواد ده
ده ممكن يأكلنى لما يكبر

عبده الرايق يقول...

wa7ed 2ensan wnsan
يحسب ميييييييييييييين ؟؟؟
ده واد مالوش فى الحساب اصلا
قال ايه جايب لى اله حاسبه يحسب عليها
بالذمه ده كلام ؟؟؟؟؟
انا بقى واخد على ايام العدد بالنوى بتاع البلح
لا حجاره تخلص ولا اله تهنج

عبده الرايق يقول...

Sally
بس اول ما اشتد ساعده ورمى
رمانى

عبده الرايق يقول...

فاتيما
المره الجايه هاكون معاكم
بس بشرط
كل واحد يحضر نصيبه فى التبرع لرحله الرايق الى حفل افتتاح بطوله كاس العالم 2010
لان الظاهر كده انهم هيستدعونى القى كلمه الافتتاح فى الحفله

عبده الرايق يقول...

صبرني يارب
الحمد لله ان انتى قدرتى تقرىء البوست ده
لكن فعلا العيال بقوا نفعيين بدرجه كبيره
بس كلمه فى ودنك
احنا واحنا صغيرين كان اهالينا بيقولوا علينا برضه نفس الكلام

عبده الرايق يقول...

القلم السكندري
بعد اللى حصل ده انا بفكر اجى معاك وناخد دروس خصوصيه عند المعلم الكبير الرايق الصغير

عبده الرايق يقول...

la3lahakhier
سلط عليكم

عبده الرايق يقول...

shayma
بس مش اول ما يطلعله قرون ينطحنى انا

عبده الرايق يقول...

رئـــــيسـة حزب الأحلام
طالما فيها كلمه جنيه تلاقيه بيحسب زى الفريره
لكن لو اى حسبه تانى
تلاقيه اتلخم وضرب اخماس فى اسداس

عبده الرايق يقول...

جيهان علي
الجغرافيا انا عالم من علماء الجغرافيا واقدر اتكلم عن تركيب الذره بسهوله
اما العربى فانا البحر فى احشاءه الدر كامن
بس المشكله ان انا بنسى النحو والتعبير والنصوص والمحفوظات والبلاغه بس شاطر جدا فى الاملاء

عبده الرايق يقول...

جيهان علي
كى جى وان
دى قبل الجامعه ولا بعدها ؟؟؟؟؟؟؟

عبده الرايق يقول...

maiosha
نو نو نو
انا طول عمرى باديه دروس فى الحساب
بس اكتشفت ان الولد بيقول لمامته انه بيسمع شرحى من هنا ويطلعه من هنا
وده حز فى نفسى جاااااااااامد
لكن مش هاسيبه
هاديله دروس غصبا عنه

عبده الرايق يقول...

mayada
انا ممكن اعينك معايا بودى جارد
او مستشاره قانونيه للرايق تيتش
او سفيره للنوايا الحسنه (لم الفلوس )
او تلميذه وتدفعى زيك زيهم

عبده الرايق يقول...

مدحت محمد
ربنا يكرمك يا دوحه
ههههههه
عرفت اسمك من مدونه فرنسا

عبده الرايق يقول...

حنين القلب
طيب يا حنين ياختى لو قلبنى اكتر من كده هيطلع مصارينى
ده الواد نضفنى فى وان مينت
وقال ايه يحلفنى برحمه ابويا

عبده الرايق يقول...

Unique
نعم هكذا يكون الابتزاز
وهكذا يكون الضحك على الدقون

WhItE HeArT يقول...

اصلى متهيئالى انك نسيتى تقصى لسانك وانتى جايه

ههههههههههههههههههههه

حلوة اوي الجمله دي

والواد ابنك ده هوه اللي رايق فعلا

ههههههههه

تحياتي وبوست روعه

قوس قزح يقول...

الواد طالع شاطر لابوه فى الحساب ههههههههههههههههههههههه

بكرة يعمل مدونة هو كمان تحكى عن حركاتك معاه و يقعد على بابها و كل ما تيجى تدخل عليهاعلشان تشوف فضايحك ياخد منك 10 جند و انت خارج ياخد منك 100 جند يا اما يحبسك فيها
ههههههههههههههههههههه

Hossam Nasr يقول...

ساعات قليلة لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

tamer.sala7 يقول...

يعني الفلوس طلعت يا معلم
قشطة شوفلي بقي قرشين من اللي بتديهم للرايق الصغير احسن العملية بقت ناشفة جدا

Soooo يقول...

طب والله ابنك ده واد رجوله
عمل فيك اللي مش قادرين نعمله

ربنا يحميك يارايق ياصغير
جبتلنا حقنا من الرايق الكبير

-----

انت فاكر انك تشرح للعيال الصغيره دي حاجه سهله
ده انا اتجننت كده وقلت لاخويا اني هشرح لبناته المواد اللي بياخدوها .. واخويا يقوللي بلاش وانا اقوللو ايه ياعم دي حاجه سهله .. وفي الاخر اخويا وافق بشرط اني اخد فلوس رمزيه وانا مافهمتش ليه
اتاريهم بياخدو المناهج بالانجليزي ياخويا وانا تعليم حكومه .. يعني اخري في الانجليزي هاو ار يو .. ماي نيم از فوزي

مين فوزي ده؟؟؟


ربنا يسعدك يارايق ويبسطك دنيا وآخره يارب




سلامووووووووووز

اهو ده عيبه يقول...

يا رايق جالك اللى يطلع القديم والجديد
صحيح تربية ايدك
والواد بيتقاول على الكلام وبيحسبه بالقطارة علشان يلم على اد ما يقدر

يالا ربنا يكون فى عونك ولو انى عارفه ان عمره ما هيشوف العجله

تحياتى ليك

Asmaa mahaba يقول...

سمعتك وصلت امريكا يا رايق وكمان بتجيب منك نسخ منتش راحم
انا حطالب بضروره القضاء على هذا النوع لينتشر كتير وتبقى مشكله
سومه_87

غير معرف يقول...

ياترى عملت اية فى الولد بعد ما مشيوا!!!!
اول زيارة لمدونتك
تحياتى لك

Desert cat يقول...

التكرار بيعلم الشطار
والرايق الصغر من كتر ما شاف الصحاب والقرايب والجيران بيتقلبوا
قالك اقلب انا كمان رزقى واهو مش من حد غريب
ده الغالى بابا عبدو الرايق

(احمد سكر ) يقول...

ههههههههههههههههههههههه

تستاهل

وبعدين الولد هيجيبه منين

سد بئه يامعلم

مهو علامك

تحياتى لاخف دم فى المدونين

اخيك احمد سكر

GOLDEN B0Y يقول...

هههههههههه

لا بجد رايق

بس مين الليفه دى اخخخخخخ
لو اعرفها كنت بلغت احسن بحب اشوف حاجات حمره كدا

تقبل تحياتى :
ROONEY

رئيس جمهوريه نفسى يقول...

السح الدح امبو الواد طالع لابوه
من شابه اباه فما ظلم يا رايق الواد طالع مادى

عبده الرايق يقول...

iuf]hggiWhItE HeArT
لكن روقانه ده هيجى على نافوخى انا

عبده الرايق يقول...

قوس قزح
لأ طبعا
ماهو انا مكتم على موضوع المدونات ده
لحسن يشم خبر

عبده الرايق يقول...

Whispers just for a Night
للاسف قريت التعليق متأخر

عبده الرايق يقول...

tamer.sala7
ياسلام بس كده
عايز كااااام ؟؟
قول متتكسفش
عايز كام ؟؟؟
فلوسى كلها تحت امرك
من جنيه لمليار

عبده الرايق يقول...

Soooo
يا راجل احمد ربنا
هى برضه هاو ار يو دى سهله
يادين النبى
انا عن نفسى بكل عبقريتى فى اللغه الفرنسيه مقدرتش اعرف معناها الا من سنتين بس
وعرفت انها سؤال عن امكانيه حدوث برق فى اوساط اوربا النيليه

عبده الرايق يقول...

اهو ده عيبه
نو
نو
نو
طبعا هاخليه يشوف العجله
انتى مش واثقه فى كلامى ولا ايه ؟
لعلمك
الشارع مليان عجل
ونظره واحده من الشباك هيشوف براحته

عبده الرايق يقول...

سومه...مجنونه فى بلد عاقل
سومه تعلن الحرب على الرايق
يانهار ابيض
ليه ياسوووووووووووووووووووووووومه

عبده الرايق يقول...

غير معرف
طبعا ذاكرتله قوى

عبده الرايق يقول...

Desert cat
بس اموت واعرف اتعلم الخبث ده منين ؟

عبده الرايق يقول...

سكــر
تحياتى لاطيب قلب
ومن اجدع رجاله المدونين
احترمتك من يوم وقفتك الجامده مع فرنسا
تحيه خالصه لك

عبده الرايق يقول...

GOLDEN B0Y
ياريت تبلغ عنها ونخلص
هى سقراطه طبعا
ولو عايز تشوف حاجات حمرا
يبقى شد حيلك واقتلها وخلصنا

عبده الرايق يقول...

رئيس جمهوريه نفسى
وده اللى مجننى
الواد طالع مادى لمين ؟؟؟؟؟؟؟؟؟

شفـقــة و إحســــان يقول...

هههههههههههههه مدونة حلوة اوى ودمها سكر...بس انت اللى جبته لنفسك استحمل بقى

نسر الشرق يقول...

السلام عليكم

هذة المدونة جميلة ودماها شربات وبضحك كمان

يا عم عبده انت بتريش ابنك

ههههههههههههههههههههههههههه
سلااااام

Mafrousa يقول...

بما انك اجمل روح على هذه الجزيرة
قررت انا المفروسه ان اعطيك تاااااج الجزيرة
عندى فى مدونة ارض الاحلام و شد حيلك معايا و حدبسك تجيب انت الناس لحسن البت مفروسه خرج و لم يعد...شكلها يا طفشت ياطفشت...يا تاهت
تعالى خد التج بسرعة

الطائر الحزين يقول...

شوف يا رايق يا اخويا
مش عارف تماين مع الواد بس بصراحة واد لبط صحيح

الرايق الصغير علمك الادب ؟؟ يبقى انت اللى علمته ان فيه حاجة اسمها ادب م الاول

لسه راجع من السفر والبنت مقصوفة الرقبه بنتى راسها وجزم البلد كلها عاوزة تخرج يهديكى يرضيكى مفيش فايدة
ولما خرجنا قالت عاوز العب فى الجنينة اشمعنى انا ما كل العيال بيلعبوا امال يعنى انت رجعت من اسوان ليه مش علشان تفسحنا

اشرب بقى يا سيدى

غير معرف يقول...

الأخ العزيز عبده باشا الرايق
والأخوه زوار المدونه
يمكن الآن سماع عبده الرايق فى حلقه من البرنامج الأذاعى بزيارة موقعنا والضغط على حلقة عبده الرايق فى بوكس الأرشيق الى اليسار من الموقع وموجود تحت الساعه وتخت صور اسرة البرنامج ....ونرجو ان يعجبكم هذا التجديد ....ونفس البوكس اى بوكس الأرشيف اضيف الى مدونتنا والعناوين كالآتى
الموقع
http://dear.to/cairo
المدونه
http://netonradio.blogspot.com
ويهمنا ان نسمع آرائكم ومقترحاتكم
مع تحيه خاصه لصاحب هذه المدونه
اسرة برنامج انت تسال والكمبيوتر يجيب

المـــفـــــــقــــــــوعـــــة مــرارتـهــا يقول...

فينك ياعبدو مابقتش تنزل جديد ليه
مستنيينك

أم أحمد المصرية يقول...

خالص تحياتي و تقديري و اعجابي الشديد جدا جدا جدا بالرايق
ما تفهمنيش غلط انا قصدي الرايق الصغير الف مبروك يا عبده عرفت تربي بجد ربنا يخليه لك و واضح انه فعلا شاطر في الحساب :)))))))))))))

أنفاس الصباح يقول...

مدونتك دمها زى العسل يا مستر رايق
فطستنى من الضحك مع انى مليش نفس
ولا الرايق الصغير
كل ما أشوف الصورة جنب تعليقاتك عند فرنسا هانم كنت أقول
وده من إيه ده ياربى
أتريه الرايق الصغير
الخالق الناطق ..سبحانك يارب
مسبش منك حاجه
عنيه
شعره
بس ليه ملبسه البيجامه بتاعتك!
علشان يكبر فيها برحته؟
ربنا يخلهولك
أهو هو ده الى هيجبلك الكادر
من ديله
تحياتى لمسز رايق وسقراطة

عاشــــــ النقاب ـقــــة"نونو" يقول...

السلام عليكم
يارب بارك يارب خلي
خليه ياخد بحق الغلابة بقى
هههههههههههههههههههه
تحياتي

wanna b a physician يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ابن الوز عوام
وبعدين يا عبده التعليم مش ناقص ههههههههههههههههههههههههه

عروسة ننوسة يقول...

انت مختفى فين ....منتظرة الجديدة علشان تعرف انى متابعة

الطائر الحزين يقول...

فينك يا رايق؟؟

kochia يقول...

تحياتي ليك يا اخ عبده
وربنا يخلي لك البيه الصغير
بس مش عارفة بصراحة هتعرف تتعامل معاه ازاي بعد سنتين تلاتة
خلي بالك من نفسك بقي

Asmaa mahaba يقول...

رايق هو انت اجزت مع فرنسا
انت فين

Asmaa mahaba يقول...

رايق انا قلت فى حرب بس مش للدرجادى

عبده الرايق يقول...

شفقة و احسان
شكرا على الزياره ولازم الواحد يستحمل

عبده الرايق يقول...

نسر الشرق
اهلا بيك يا نسر الشرق
على فكره انا زرت مدونتك واعجبت بيها جدا

عبده الرايق يقول...

واحدة مفروسة
وانا قررت قبول التاج
بس رجاء ارسال بدله مناسبه
او حواله بتمن البدله
لان التاج محتاج رسمييات

عبده الرايق يقول...

الطائر الحزين
اخى الطائر ساعات الواحد بيحس فعلا ان الاولاد هما اللى بيربوه مش هو اللى بيربيهم
ولما احس بكده
على طول اقول الله يرحمك يابا

عبده الرايق يقول...

الاستاذ \ صلاح حجازى
اشكرك شكرا جزيلا على وضع حلقه لى فى الارشيف
واشكرك واشكر جميع العاملين فى البرنامج على مجهودكم الرائع فى عالم المدونات واخراجها من بوتقها الى العالم الواقعى

عبده الرايق يقول...

المـــفـــــــقــــــــوعـــــة مــرارتـهــا
انهارده فى جديد
معلشى كنت مشغول

عبده الرايق يقول...

أم أحمد المصرية
انا لقيت الواد هيسحب البساط من تحتى
قمت
مديله اجازه انهارده

عبده الرايق يقول...

إيمان العزب
هو انا لاقى حاجه البسها ؟؟
كل هدومى احتلها الرايق واخواته
الا امهم بصراحه
مخادتشى اى حاجه من هدومى
بس بتاخد اللى جواهم

عبده الرايق يقول...

nonoymm
والله عارف ان الكل هيفرح فى الرايق
لكن ده انا اخوكم فى الله عبده الرايق الغلبان
متعرفوش الجيل اللى طالع شكله ايه ؟؟

عبده الرايق يقول...

wanna b a physician
يعنى من رأيك الغى فكره الدروس دى ؟

عبده الرايق يقول...

gannah
طبعا انا اشكر لكى اهتمامك
لكن بجد كنت مشغول

عبده الرايق يقول...

الطائر الحزين
انا بخير والحمد لله
والتدوينه الجديده نزلت

عبده الرايق يقول...

kochia
طبعا هيكون ليا معاه معامله خاصه
يعنى كل شويه هفكره بالايه اللى بتقول
ووصينا الانسان بوالديه

عبده الرايق يقول...

سومه...مجنونه فى بلد عاقل
لأ مأجزتش ولا حاجه
وفرنسا ايه اللى هأجز معاها دى ؟؟

عبده الرايق يقول...

سومه...مجنونه فى بلد عاقل
ربنا ما يجيب حروب ولا حاجه