جود افتر نون مسس رايق
اهلا ياسى عبده ..اتاخرت كده ليه ياخويا ؟..انا قلقت عليك
قلقتى عليه ليه ياوليه ؟..هو انا اللى كنت سايق ؟..عم محمد العربجى عيان وابنه اللى طلع بينا انهارده والظاهر ان الحصان مش واخد عليه
هو انت لسه بتركب العربيه الكارو ؟؟...ما الاتوبيسات ماليه الدنيا ..عموما ..الاستاذ عادل جارنا سأل عليك اربع مرات فى التليفون وعايزك ضرورى
ايوه ايوه انا قابلته وانا طالع على السلم وقالى انه عايزنى وجاى عندنا حالا
ترررررررررررررررررررررر
الظاهر ان هو ده اللى بيرن الجرس ..ادخلى جوه مسس رايق ...الراجل عنده عيال بدال ما يشوفك يتخض ولا حاجه
ليه هو انا بخض الناس ؟؟؟....حرام عليك يا عبده
مش وقت الكلام فى محاسن سيادتك مسس رايق ..ادخلى جوه وانا رايح افتح الباب للراجل
***********
هاى مستر عادل ..ماى فلات نورت بوجودك اتفضل
السلام عليكم ...يارب ياساتر
اتفضل يا راجل بيتك ومترحك ..اتفضل هنا فى الريسبشن
شقتك حلوه يا استاذ عبده بسم الله ماشاء الله
ابتدينا بالنق ...هههههههه ..انا بضحك معاك ..نق ولا يهمك ...شرفتنا مستر عادل
والله يا استاذ عبده انا ملاحظ ان حضرتك بتشتغل فتره واحده لغايه الساعه 2 ظهرا ..انا قلت لو حضرتك تشرفنا فى الشركه اللى بشتغل فيها ..وتشتغل معانا فتره مسائيه من 6 الى 10 مساء .. يبقى شرف كبير للشركه
اه بس انت عارف ان الامور دى متنفعشى كده على طول ...لازم نسأل عليك وعلى اخلاقك وعلى عيلتك وبعدين ناخد قرار ..يعنى ادينى فرصه 5 سنين افكر
اخلاق ايه وعيله ايه يا استاذ عبده ؟؟...هو انا جاى اتجوز...انا عايز حضرتك تشتغل معايا فى الشركه ...وكلمت المدير والمدير وافق
مدير ؟؟؟؟ هى الشركه فيها مدير ؟؟؟؟؟ امال عايزنى انا ليه ؟؟؟
احنا عايزينك تشتغل فى المخازن ...تظبط الوارد والصادر فى كشف ...فى واحد شغال نهار وانت هتشتغل ليل
هو شركتكم دى عباره عن ايه ؟؟؟
احنا شركه تصدير واستيراد...شركه ايهاب وعاطفكو
والمرتب كام ؟؟؟ والاجازات امتى ؟؟؟
اتفقت مع المدير على 450 جنيه شهريا ..ومتنساش انها فتره واحده ...والاجازات يوم الجمعه
نو نو نو ....شوف مستر عادل ...انا علشان اقبل اشتغل معاكم لازم تقبلوا شروطى
شروووووط ؟؟؟؟ ...شروط ايه يا استاذ عبده ...هو الشغل كمان فيه شروط ؟؟؟
اوف كوورس ...انا ليه شروط ولازم توفقوا عليها فى خلال 48 ساعه والا المقابله تعتبر ملغيه
الصبر يا رب .....ماشى يا عم عبده ايه بقى شروطك ؟؟؟؟؟
اولا - لازم يجى لى طلب رسمى من صاحب الشركه شخصيا يدعونى الى التكرم وقبول الوظيفه فى الشركه
اه .........الله ماطولك ياروح ....كمل يا استاذ عبده ...وبعدين
ثانيا - لازم وحتما ولابد يتغير اسم الشركه البلدى ده ...وتسموها اى اسم تانى ...ولو سميتوها ..شركه الرايقكو تبقى فكره هايله
ايه ساكت ليه مستر عادل ؟؟؟
هه ؟؟؟؟؟
لا ابدا اصلى سرحت شويه معلشى ...وايه كمان يا استاذ عبده ؟؟
ثالثا - المرتب لايقل بحال من الاحوال عن 12 الف جنيه مصرى او ما يعادلها بالعملات الاجنبيه
ايه يا راجل انت بتبص للسقف ليه ؟؟؟
لا ابدا معاك
رابعا - الاجازات يوم الجمعه والاثنين والاربعاء من كل اسبوع
خامسا - وقت العمل من الثامنه الى التاسعه والنصف
سادسا - سياره همر بالسائق للعبد لله وسياره اخرى لتوصيل الرايقين الصغيرين للمدارس
سابعا ....
استنى لو سمحت يا استاذ عبده ..ممكن استعمل التليفون
اتفضل ..أأز يور هوم
الو ..ام محمد ..انتى طالق
وات هبن مستر عادل ؟؟؟؟
ولا كلمه ...ولا عايز اسمع صوتك ..انا طلقت مراتى علشان هى السبب ...بقالها شهرين تزن على دماغى وتقولى شوف للرايق شغالانه معاكم اى حاجه انشاله فراش ..مراته كل يوم تكلمنى وتقولى مش لاقيين ناكل
لغايه لما انطصيت فى نظرى واتحايلت على صاحب الشركه يشغلك ..لغايه لما وافق بعد عذاب
خلاص خلاص ..ولا يهمك مستر عادل ..طلقتها ..طلقتها ..ولا تزعل عندى لك عروسه فيرى فيرى بيتيفول
هناك 83 تعليقًا:
هههههههههههههههههههههه
هههههههههههههههههه
ههههههههههههه
هههههههههه
يا جدع اتقي الله حرام عليك طلق الوليه بسببك
هتموت عيالك من الجوع وكمان الوليه تتطلق علشان خاطرك
روح يا شيخ وتعالى بالكارو
تسلم ايدك مستر عبده
رايق فعلا هيفضل رايق
سلااااااااااااااااااااام
عزيزتى
معلش انا حبيت اوريك حقيقة قطة
واظن انك اكيد هتتصدم من الكلام اللى هتشوفه
بس الحقيقه دايمن بتصدم
خش المدونه وهتعرف
سلام
هههههههههههههههههههههههههه
الاول ليه كارو ؟ ايه وجهة نظرك فيه .. الهوا الطلق و كده و تبص على الناس فى العربيات من فوق ؟؟
تانى حاجة ايه يا عم اللغات الجامدة دى .. ده انت خريج الليسيه ولا ايه ؟؟
و بعدين راجل معندوش دم صحيح ما يروح يطلقها فى بيتهم لازم يعنى بالتليفون و يكلفك تمن مكالمة ههههههههههههههه
رااااايق انت فظيع و تجيب شلل ههههخخخخخ
باى
ههههههههههه
D:
يا نهار مش فايت
مستر عبده
طلقت الراجل من مراته؟
وعايز تاخد 12 ألف جنيه في ساعة ونص
لالالالالالالالالالالالالالالالالالالالالالا
راااااااااااايق فعلن
تصدق بالله أن مابطلتش ضخك من أول كلمة في البوست
أضحك الله سنك
سوري يا مون بيه على الدخلة القفش دي مرة واحدة
بس حضرتك بجد
مشششششششششششششششكلة
أضحك الله سنك
سلام
ههههههههههههههههههههههههههههه
مراتك فضحاك يارايق وانت كركبت الدنيا وراجل جايبلك شغلانة حلوة حد لاقى ياترى انت هتعمل اية مع المدام ايقى احكيلنا والله يكون فى عونها
الناس دى مقدراك مستر رايق انت تستحق تشتغل رئيس جمهورية وتموتنا من الجوع اكتر ما احنا ميتني
الا قولى بقى
هو مستر عادل بعد ما طلق مراته جرى له ايه
يعنى متناقلش العباسية ولا اى غرفة عناية مركزة
يارايق...انا كنت فطسانه من الضحك..ودلوقتى مفروسه و زعلانه جداا
كنت حكتبلك تعليق لطيف..وكنت جايه اقولك انى استلفت منك كلمة.جند بس نسبتهالك...بس اتغميت يا رايق...وبكيت...هربت من اللى بيحصل فى الدنيا الى عالم المدونات..لانى لقيت فيه اللى زيك و كنت مبسوطه
بس اللى هربت منه لقيته تانى ..وخايفه الناس اللى جوه ماتشغلشى مخهازى الناس اللى بره
واللى بيحصل بره بيحصل جوه ....والناس اللى جوه..هيه هيه الناس اللى بره ...طيب الواحد يعمل ايه و يروح فييين..نا حروح ارض الاحلام بتاعتى
يارااااااااايق ارحم م ف الارض
حتى عادل جبتله الضغط ياشيخ
ههههههههههههههههههههههههه
ال همر ال
ليه تامر حسنى ف شبابه هههههههه
هيييييييييييييييييييييييييييييييييييييييييه تاسع تعليق اعتبر برضه من العشرة الاوال.
سلام وارجع اقرى البوست
ههههههههههههههههههههههههههههههههههههههههههههههههههههههههههههههههههههههههههههه والله حرام وانت مش غلطان اللى غلطان مراته وتستاهل اكتر من كده هى مالها بتاكلوا ولا لاء اديها هى اللى مش هتلاقى تاكل .وكل دى شروط علشان تشتغل مالهم 450 جنيه مش احسن من السلف والحى بتاعك والله منتا نافع يا رايق وهات بقى ال200 جند اللى استلفتهم منى لما زورتنى اول امبارح وقولت ليه مش تقولى لحد.
سلالالالالالالالالالام
صبرنى يارب
هى الناس لاقية شغل لما انت تتشرط بالشكل ده
مش كفاية الراجل اتخرب بيته بسبك حرام عليك
ال عربية هامر بسواق ال؟
خلاص خلاص ..ولا يهمك مستر عادل ..طلقتها ..طلقتها ..ولا تزعل عندى لك عروسه فيرى فيرى بيتيفول
ههههههههه
كمان يارايق بية
هتشوف للرجل عروسة على مراتة
مش بدل ما تهدى اعصابة
من دشك السخن علية هههههههههههههه
تحياتى
بجد والله انت لو مقبلتش شغالانه زى دى تبقى انت سورى مش قد كده لأنى انا كنت شغال 14 ساعه وب 600 جنيه ويارتنى كنت بشوفهم يلا بس عندى أمل فى بكره عاوزك تيجى ترن جرزنا وتشرفنا
تحيـــاتى
المصـــــــــــرى
السلام عليكم ورحمة الله وبركاته
ياعيني عليكِ يامدام عادل
حرام عليك أنت لسه راجع في كارو وتحط كل الشروط دي في وظيفة بعد اظهر تحسن بيها الحال !
لا وكمان السبب في طلاق المدام اللي صعبت عليها مراتك واتوستطلك لشفل
لالالالالالالالالالا
مستر رايق
روقان فاق الحد
أضحك الله سنك
بجد بوست جميل جدًا
وفي ناس فعلا بتكون حالتها صعبة جدًا ولما يتعرض عليها شغل بتأمر بطريقة تفرس بجد
تحياتي
جود نايت مستر رايق
ممكن حضرتك تشرفنا أنت مطلوب حيا
و الأفضل حيا
ياراجل هو أنت كوتش و ها تدرب الأهلى
ده يدوب أمين مخزن يا بنى و افق حرام
الراجل طلق مراته
كده يا رايق
ارحم الناس شويه هيعزلو من البلد ويسبوك لوحدك
ههههههههههه
رايقوا دي تصدر راحه بال
الا يارايق هي الحكايه
فيها رايقين صغيرين
دي هاصت
أنا رجعت تانى....خرجت وجبت ايس كريم و رحت ارض الاحلام ريحت بالى و جيت...البوست بتاعك رائع و اكثر من رائع...انا بعتلك لينك يا ريت ينفعك
********كلشم نسيم و انت طيب و مسز رايق طيبه*******
يا عبدو حرام عليك
يا جدع
أنا ميخلصنيش اللى بيحصل دا
انت بصراحة مستقل نفسك
إيه الشروط المجحفة دى ؟؟
دول بيستغلوك خالص و فاكرينك على نياتك و هتوافق على الكلام الفارغ دا
لا لا لا
انت خليك كدا ثابت على موقفك
و عادل و طليقته و المدام و الرايقين الصغيرين ليهم ربنا
دحنا هنضحك ضوحك ....
كل دي شروط علشان الفترة المسائية
تلاقيك شغال مصاص دماء فامبير يعني
في الفترة الصباحية هههههههههه
ههههههههههههههه يعنى طلقها وكمان عاوز تجوزه حرررررام
بس والله حلوه حل مشكله المواصلات بالكارو تصدق لما امسك الوزراه قول ان شاء الله همسك فرع الكاروو
بس انت طلباتك قليله يا راجل انت تطلب اكتر من كدخ
يا عينى على الشباب اللى خيجلهم فقعه مراره منك
هههههههههههههههههه
هههههههههههههه
معلم والله يارايق
كل بوستاتك تنم عن موهبه كوميديه رائعه
ربنا يوفقك
ابو خليل
ههههههههههههههه
هههههههههه
هههههههه
يافرحه المأذون بيك يا رايق هتطلق البلد كلها
وهتشغل المأذون 24 ساعه
عايز همر بسواق
ليه هو سيادتك مش من انصار الكارو ؟
خليك فى الكاروووو
بس تصدق
مرسوم عليك
زودتها شوية يا عبدة بجد
هو لازم الهمر دى
هى دى القشه اللى قصمت ظهر البعير والحمير و كل الحيوانات
ويا سيدى كل شىء نصيب مش عارف انا ايه دخلك فى موضوع الطلاق ده
ده كان بيتلكك يا باشا بس انتى نقى له حته كويسة وهو هيوافق على طول ويشغلك بد المدير
خالص تحياتى
الشنكوتي الكبير
ايه ده هو طلقها بسببى ؟؟؟؟؟؟؟؟؟
ماكنتش اعرف
بس ايه رأيك انا هارد الجميل واجوزه ست ستها
أنا مش موافق
للاسف يا اخى انا دخلت المدونه لقيت كلاك كتير محذوف مش فاهم الحكايه
Rainbow
العربيه الكارو بتاعه واحد جارنا
يعنى ببلاش
واللغه دول كام كلمه كده بذاكر بيهم للعيال
اما حكايه الراجل اللى طلق مراته من تليفونى
كان مفروض اطالبه بالمكالمه صح ؟؟؟؟
nigro
دونت وورى
ولا يهمك عزيزى نجرو
احييك على تواجدك معى
رئـــــيسـة حزب الأحلام
هو انا سكت لمسس رايق بعد مارجعت
نو
نو
نو
انا غضبت منها واكلت نص بطن بس
Desert cat
لا هو مشى من عندى على رجله
بس
استنى
انا سمعت صوت الاسعاف بعد كده
جات لمييييييييييييييين ؟؟؟
واحدة مفروسة
لا حول ولا قوه الا بالله
مش فاهم ايه اللى مزعلك والله
د/اجدع بنوته
هو انا قليل على الهمر ولا ايه ؟؟؟
وبعدين مين تامر حسنى ده ؟؟؟
كان فى الحمله الفرنسيه برضه ؟؟؟
حنين القلب
التسعه الاوائل بيدفعوا التذكره مضاعفه
حنين القلب
احنا فينا من الفضايح ؟؟؟؟؟؟؟
الورقه ام متين جنيه طلعت صوره من مجله
وانا بسلامه نيه كنت رايه اشترى منها اتنين كيلو كباب
كنت انا اللى هتشوى على الفحم
اهو ده عيبه
وايه يعنى همر بسواق
مش انا امكانيات ولا ايه ؟؟؟؟؟؟؟
Tamer Nabil
ياسيدى يا بخت من وفق راسين فى الحلال
واهو نكسب فيه معروف
almasry
نو
نو
نو
برضه 14 ساعه فى اليوم وب 600 جنيه فى الشهر
طيب مانت الكسبان
ال 14 اصغر من ال 600
هات اى عيل هى الابتدائى وقوله
مين اكبر ال 14 ولا ال 600 وشوف هيقولك ايه
جيهان علي
ده انا كنت افتكر انى جيت على نفسى شويه
أبو خالد
طبعا الرايق غير الكوتش بتاع الاهلى
دول ناس بيلعبوا كوره
ومتعرضين لاى حد يرش عليهم ميه ويقول لهم العبوا بعيد
تــــايه ومش تـــايه
يسبونى لوحدى ؟؟؟؟؟؟؟
واستلف انا من مين بقى ؟؟؟؟؟؟
mady
طبعا اطفال الرايق
منتجات وطنيه مش صينى ولا تايوانى
واحدة مفروسة
مع انى برضه مفهمتش فى ايه لكن انا مبسوط ان اعصابك هديت
فاتيما
مش ده برضه رأيك مدام فاتيما
خلاص
هاصمم على موقفى
ايه رأيك نخليهم 100 الف جنيه فى الشهر
Unique
نو
انا فى الفتره الصباحيه فى الحى
appy
لا وايه
الرايق سواق كارو معتبر عم محمد العربجى كان بيعلمنى
ابو خليل
شكرا لك يا ابراهيم
فرنسا هانم
مرسوم عليا الكارو يا فرنسا ؟؟؟
ماكل ده علشان خاطر حضرتك
قلت اتعلم سواقه الكارو علشان ابقى السواق الخصوصى ليكى
الطائر الحزين
هو فعلا كان بيتلكك
وانا هاجبله حته نص عمر
بس يصبر لغايه العيد الصغير
معاد خروجها من السجن
ربنا يفك ضيقتها
ايه ده انت هتشتغل فى المخازن ياى دول لازم يغيروا الوظيفة دى وبعدين ايه مخازن دى ده اسم ميلقش بمستوى الشركة خالص
صحيح اقرع ونزهى
ده ليه حق يقتل مراته مش يطلقها
إيه ده
إيه اللي زعل مستر عادل ده
مش كفايه إنك هتوافق تشتغل معاهم كمان
ناس غريبه
بجد انت مسخرة
أقرع ونزهي
هههههههههههههههههههههههههه
ههههههههههههههههه
ههههههههههههههههه
ام محمد اطلقت وكمان هتجوزه
ربنا يبسطك ويبسطها عليك وعلينا يارب
ههههههههههههههههههههه
حرام عليك والله
انت ملكش حل
صدق المثل المصرى الاصيييييييييل
" اقرع ونزهى "
ده انت غلبت عبده طناش
ههههههههههههههههههههه
ربنا يصبر مسز رايق
والبشرية جمعاء
دمت بخير اخى الفاضل
سالى
تاج من المصرى لأجمل رايق ياريت توافق عليه على فكره انا بعته لفرنسا وعاوزين نشوف التحدى ولاإثاره فى الاجابات
تخيل أنك أصبحت رئيسا للجمهوريه :
1_أول خمسة قرارات ستأخذها .
2-من هم أول خمسة وزراء ستعزلهم فور توليك مقاليد الحكم.
3_ما هى أول خمسة أماكن ستزورها عندما تصبح رئيسا للجمهوريه.
4_كون جمهوريه لنفسك ومن وزير الداخليه ومن وزير الخارجيه ومن وزير العدل ومن وزير التربيه والتعليم ومن وزير التعليم العالى (سواء من أصدقائك أو أقاربك).
5_من هم أول خمسة رؤساء ستقطع معهم العلاقات الدبلماسيه.
6_من هم أول خمسة دول ستنول عطفك واهتمامك ومساعدتك "باعتبارك دوله غنيه"
ازيك ياعم رايق
فينك
جيت عندى مرة واختفيت
خايف لااخطفك ولا اية ههههه
تحياتى
ههههههههههههههههههههههه
لأ بجد البوست ده مسخرة
إيه يا عم الرايق حرام عليك اللى بتعمله فى الناس ده
خليت الراجل يطلق مراته
طيب ومراتك مستحملاك اصلا إزاى؟؟
طيب سؤال الله يخليك .. منين بتركب كارو ..ومنين عايز عربية هامر؟؟ هامر مرة واحدة
لأ وشوف الجبروت عايز تغير إسم الشركة نفسه
بجد أنا مش عارفة أبطل ضحك
حرااااااااااااااااااااااااااااام
بصراحة حرام
بكل لغات العالم بقولهالك يارايق
ارحم خلق الله يا اخي
كفاية
ههههههههههههههههه
خليت الراجل يطلق مراته بسببك
لا كفاية كده بقي
هههههههههههههههه
hend...hanady
طيب اديكى قولتى ليه حق يقتلها مش يطلقها
يعنى انا برىء
الحمد لله
Salwa
ناس فعلا غريبه
بس سيبك انتى انا عارف انهم هيجوا يتحايلوا عليا تانى
لكن انا المره الجايه هشدد عليهم فى الطلبات شويه
هما فاكرينها فوضى
مفقوعة مرارتي من حماتــــــــــــي
هى اخبار القرع دى وصلت لكم
مين نقل الاخبار ؟؟؟؟؟؟؟؟
nonoymm
انا قلت اعمل فيه معروف رغم انه طول فى المكالمه وذود الفاتوره قرشين
Sally
بس انا حاسس انى معنديش ذنب فى موضوع الطلاق ده
كل ده علشان الهمر؟
almasry
انا موافق على التاج
بس اتكتك فيه الاول
اشكرك على التاج
بس فى مشكله
فرنسا دى طالعالى فى كل نخر
Tamer Nabil
ياريت تخطفنى
بس يكون الاختطاف فى فيلا ويكون فيها حمام سباحه وطقم خدم لا يقل عن 30 فرد
ده غير السيكيورتى
maiosha
مش هيشغلونى ؟
يبقى لازم اطلب همر
دول عايزين يشغلوا الرااااااااايق
هو الرايق شويه ؟؟؟؟؟
آفاق الحرية
طيب مانا حليتها فى لحظه
هجيب له عروسه
اكيد اشكر
واشكر جدا كمان
ولا مش صح ؟؟؟؟؟؟
ههههههههههههه
فير فيرى بيتفول .بص انا هقولك كلمه وما تزعلش احنا اخوات الاول لو انت شاب عادى لو حضرتك راجل كبير اعتبرنى عيل وغلط
ههههههههههههه
انت راجل مسخره
ههههههههههههههههههههههههههه
يخرب عقل خفة دمك دى بجد
انت مشكلة
برغم انك مش عاوز تزورنىف مدونتى بس مش قادرة ما ازوركشى
ع فكرة كتبت عنك مقال ف مجلة مصرى انت وفرنسا
اللينك اهووة عنوان المقال عالم التدوين فرصتك لتحيا اكثر من حياة
http://www.masryshow.net/main.htm
ههههههههههههه
ههههههههههههه
يا عمى انتى اتخلينى ادخل مستشفى المجانين بسببك الناس بتقول عليه انى اتجننت من كتر الضحك وانا قاعد لوحدى
حرام عليك الست اتطلقت بسببك
فعلا اخر خدمة الغز علقة هههههه
وعربية همر بسواق و12 الف جنيه انت فاكر نفسك احمد نظيف
مالها الكارو فلة عليك
بس بجد فكرنى لما اشوفك اقولك على حاجة سر
وحشتنى يا رايق باشا
تحياتى خالد
http\\forums.arab-
ewriters.net/viewforum.php
عبده بااااااااااشا
واحشني اخبارك ايه
سمعت كدا انك بقيت مشهوور وبتاع
علي كده الواحد ممكن يسلفك وهو مطمن
بس انت جامد بجد وتستاهل يعني
بس بجد الحمد لله ان عادل طلق مراته بس ومحصلش اكتر من كدا
سلاموووووووووووز
وزة
هههههههههههه
بوست جميل بس ليه كدا يا رايق
انتا قلبك حجر
ROONEY
عبده اللينك ده ممكن ينفعك
http://forums.arab-ewriters.net/viewforum.php?f=21&sid=2f75b8d95aa270378b8dca79467ebe52
يخرب عقلك مسس رايق
بقي ده كله يطع منك
بس والله جادعه
بتدوري ع راحتك
تشغلي الرايق الصبح وبليل
ويرجع بليل مهدود
ايه النصاحه دي بس
وانت طبعا موافق يارايق
ع مبدا الشغل
فتره تانيه ومش عارف
الي مستخبيلك يا حبه عيني
بس كويس اني نصحتك اهو ووعيتك
اي خدعه يا باشا
انا بهدي النفوس(بست وشز فور يو)0
sasatifa
انا سعيد جدا بالزياره
وسعيد بكلامك الا كلمه مسخره
لى تحفظ على الكلمه
فانا اكتب كتابه ساخره لا مسخره
ولا يهمك برضه عادى
دعاء مواجهات
رحت شفت المجله
ومش عارف اشكرك ازاى بجد والله متشكر جدا
على كلامك الجميل عنى وكمان حاطه اللينك بتاع المدونه
بس جيت بعد النمره الشرسه فرنسا
انتى مش عارفه انى اعلنت عليها الحرب
همس الاحباب
خالد حبيب قلبى
شفت الراجل زهقان من مراته وعايز يلزقها فيا انا
بذمتك انا عملت معاه حاجه تنرفز
اديك انت صاحبى اهه وعارفنى
انا بنرفز حد ؟؟؟؟؟؟؟؟؟
سلام يا صديقى العزيز
واحدة مفروسة
والله مش عارف اشكرك ازاى انا دخلت الموقع ده ولقيته منتدى
وباذن الله هابعت لهم كتاباتى
بجد اشكرك
انين الحزن
وزه ابنتى العزيزه
اهلا بكى
وحشااااااااااااااااااانى لبعد بكره
طبعا انتى عرفتى انى اتشهرت
جيتى تجرى علشان اسلفك
عموما انا اعلنت الحرب على فرنسا وبما ان انتى من اشد المؤيدين لفرنسا
فانا علشان انتى لسه جايه هسيبك دلوقتى
وبعد كده هاعلن عليكى الحرب لو جيتى مع الشريره فرنسا
رونى المصرى
لا ده هو اللى بيتلزق
واحدة مفروسة
فعلا اخت كريمه
شكرا لكى
نوري
يعنى انا كان عندى حق
الحمد لله
ظهر الحق
وزهق الباطل
تحيه من القلب لكى
وبلاش بست
علشان بقى بجنيه
إرسال تعليق