ايييييييييييييييييه
يا فتاح يا عليم يا رزاق يا كريم
اصتبحنا واصتبح الملك للمالك
قو مى يا وليه الساعه بقت 7 الصبح كفياكى نوم كتمتى نفس المرتبه حرام عليكى
ايه يا عبده على الصبح عاملك غاغه ليه ؟ ولا هى عادتك صحيح
قومى يا مودام جهزى لى الساونا والفطار
سوانا ؟؟؟؟؟؟؟؟؟؟؟
منجيلكش فى ساونا ياعنتر زمانك .البوتاجاز خلص من 3 ايام
ولعى الوابور ياوليه واصتبحى واقولى يا صبح
بابور ؟؟؟؟؟؟؟؟؟؟؟؟
مفيش جاز يا روحى خلاص نشفت . قلت لك هات سخان وانت ولا انت هنا عملت روحك من كولامبور .خلاص خدلك ساونا من ميه الحنفيه بقى
غلطه عمرى
صحيح غلطه عمرى وهاندم عليها طول حياتى . انى اتجوزتك . وليه معندكيش دريمس . انا بقى عندى احلامى مش سخان لا انا بفكر فى الفيلا وحمام السباحه والساونا وجوه الفيلا بارك . هى دى الدريمس يا وليه مش تقوليلى سخان .
قومى بسرعه هاتى البريكفاست وحضريلى مضرب الجولف
اسم النبى حارسك وصاينك . مضرب ايه ؟ سمعنى
مضرب الجولف يا متخلفه . انا عارف انها غلطه عمرى 14 سنه اشغال شاقه معاكى . فين البراءه ياناس ؟
هههههههههههههههههههه
جولف انت ياروحى اخدت كل عصيان الغليه والزعافه والنشابه وايدين المقشات وكل مره تقولى رايح العب جولف
غلطه عمرى . يا متخلفه انا بتدرب علشان الكادر بتاع الموظفين هينغنغونا ويبشبشونا والفلوس هتجرى معايا زى الرز .
هالعب جولف وبايلياردو واشترى يخت
يختى عليك وعلى جمالك . علينا تلات شهور ايجار
بسيطه
علينا فلوس النور والكهرباء
بسيطه
الناس كلها جابت تليفون واحنا لسه بنتكلم فى الكوز
بسيطه
فلوس اخواتى السلف لسه مردنهاش
بسيطه
اسمعى يا وليه بطلى ازعاج وهبهبه على الفاضى وروحى هاتى البريكفاست
ايه اللى انت قولت عليه ده ؟
غلطه عمرى
بريكفاست يا متخلفه يعنى الفطار
ههههههههههههههههه
بتضحكى ليه ياوليه ؟
احنا بقالنا تلات ايام بنام من غير عشا يبقى هنلاقى منين الفطار
ومصروف الشهر ؟
هههههههههههه
ال250 جنيه شوف الرز بقى بكام وشوف العدس بقى بكام وشوف اللحمه بقيت بكام وشوف الزيت بقى بكام
خلاص
خلاص
غلطه عمرى كل ده هيتحل بعد ماهنزيد فى المرتب وهاعوضك برحله للاسكيمو تشوفى الدب القطبى يمكن نفسه تكون مفتوحه ويخلصنا
اسكيمو ؟؟؟؟؟؟
ههههههههههههه
اروح اصحى العيال احسن علشان يروحوا مدارسهم
بقولك ايه ؟ انتى يا مودام عايز الحق تمارينى الرياضيه قبل الشغل
مفيش اى بريكفاست ؟؟؟؟؟؟؟؟؟؟؟؟
هناك 24 تعليقًا:
مبروك الإفتتاح وان شاء الله إلى الأمام
أسلوبك جمييييل ياعبده باشا يارايق وربنا يروقك ويفوقك على طول كده
وبالنسبة للكادر متقلقش فى ناس شافوه ماشى ف 6 اكتوبر بس ملحقهوووش ربنا يسوقه وييجى بالسلامة قبل خراب مالطه
مستــ ج ــدة
انت بتتفرج على كفر الهنداوة كتير ولا ايه
اصل احمد بدير نفس الحوار كدا
وبعدين بلاش حوار اللحمة ده اصلها بقت ب 34 جنيه
الكادر
ده كان حلم وراح
الكل كان بيحلم زى صاحبك كده
بس فاقوا على غلو الاسعار
ومبروك على المدونه
غلطة عمرك انك مستني الكادر ياروقة
ياسلام يا عبده بيه
ان شاء الله الحال يتغير لينا كلنا
والحال من بعضه يا عمنا
يارب يسعد الكل ويهنيهم
انت مش رايق واخر روقاااااااان بس
لالالا دا انت طلعت دماغ يعني شكلك ضارب
كابتشينو ع الصبح
وبالنسبه للكادر دا مليون في الميه
دريمس
تقبل تحياتي ... سلاموز يابودي
وزة
مستــ ج ــدة
الاخت مستجده بما ان فى ناس شافوه يبقى المذكور حى يرزق
والاشاعات بتاعه انه غرق على سواحل ايطاليا اشاعات مضروبه وكلها شفافيه
وسلامى للشفافيه
Desert cat
القطه العزيزه اللحمه هتفضل منايا واملى حتى اخر العمر
انا مصورها ومعلقها فى ذاكرتى علشان منساهاش
اما كفر الهناوده
فانا بحبه جدا
ويمكن اتاثرت بيه زى ما حضرتك اشارتى
دنيتى الجميله
الله يبارك فى حضرتك
اما حلم الكادر
هيفضل موجود فى ال دريمس
هو احنا لينا غيرها
خليها احلام فى احلام
المفقوعة مرارتها
اعمل ايه مطحون من يومى
والكادر شق هدومى
صاحب المضيفة
اخى فى الكوادر
يعنى انت مستنى زى حالاتى
طيب فسح لى شويه اقعد استنى جنبك يمكن يجى يوم وناكل اللحمه
انين الحزن
سلامووووووووووز
واحلى سلاموز
وانشاء الله
وادعى معايا
لو عمنا الكادر وصل
لاشرب كل زوارى كابتشينو
بس سؤال
يعنى ايه كابتشينو ؟؟؟؟؟؟؟
اصل المرتب بتاعى
اخره حلبه حصى مغليه تلات مرات
يختى عليك وعلى جمالك
لا صحيح روقان
هههههههههههههه
ربنا يفكها يافندم
وبعدين هوه الكادر كان حد لقاه عشان يتوه
ربنا يستر بقى
تحياتى
ايه ياعم عبده الروقان ده اسلوب ممتع وجميل بيعبر عن كثير من ولاد البلد الجدعان الشقيانين وبالنسبة للكادر انته ماتعرفش انه لما الناس كانت بتجرى وراه رمى نفسه من فوق كوبرى 6 اكتوبر وكان مشهد درامى جميل بيقولوا انهم حيعملوه فى فيلم!!
ههههههههههههههههه
حلوة قوى
تصدق خلتنىاضحك وانا اصلا مليش نفس اضحك
جزاك الله خيرا على الضحك ده
ازيك يا عبده يا رايق
مبروك المدونة يا مان وان شاء الله هتملاها روقان
بس
كفاية
سلملى على الكادر
ايه يا راااايق عامل غاغه ليه على الصبح انت ومراتك ؟
حرام عليك عايزين ننام
بطلوا قلق بقى وروحوا العبوا بعيد لحسن ارش عليكم ميه
آخر العنقود
انا لسه سامع مستجده فوق بتقول ان ناس شافوه ماشى فى 6 اكتوبر
يمكن قصدها على الشهر؟
دكتور بيطرى
بما انه رمى نفسه
يبقى فى امل فى التعويضات
مدونه من اجل الحب
ياعم اضحك بقى وفكها
هو احنا هناخد ايه من التكشير
الا وجع الضروس
3abdo me7tas
انشاء الله
والروقااااااااااااااان
احسن من الجنان
فرنسا هانم
طيب اعمليها يا فرنسا وانا اولع لك فى المدونه بتاعتك
لتر بنزين على الكومبيوتر بتاعى
واولع فى مدونتك ولا من شاف ولا من درى
مدونة دمها شربات ضحكتني من كتر الهم اللي الواحد بقى فيه كيلو الرز ب4 جنيه يا لهووووووووي
بس الحمد لله العلاوة السنوية للعاملين بالحكومة بقت 25في المية اي خدمة بقى
اول زيارة ومتابعة باذن الله
دمت بخير
وكادر الدكاتره
بيقولوا هنتعين ب 1200 جنيه ف الشهر ياعمو
وسلميلى يامه ع اللى بالى بالك
وتحياتى للمدام
وبالتوفيق ليور دريمز
إرسال تعليق