الثلاثاء، 11 مايو، 2010

دقيقه حداد

معذره لكل احباء الرايق
فتدوينه اليوم خاليه من الابتسامه
********************
فى بدايه تدوينه اليوم ادعو الجميع الى الوقوف دقيقه حداد على روح المرحوم الفقيد (( التعليم المصرى ))
قام السيد الوزير السابق يسرى الجمل صاحب قرار تأجيل الدراسه بالاشتراك مع الشو مان السيد الوزير احمد زكى بدر الوزير الحالى وصاحب اكبر معارض الشو الاعلامى الدرامى وصاحب الفيلم الهابط ( مدرسه الخلفاء ) بقتل ثنائى وبدم بارد للتعليم المصرى
بالامس كان اول ايام امتحان ابنى فى المرحله الاعداديه وقبل يوم الامتحان وكما عودتنى ستى نفوسه رحمها الله ان توصى الام ابنتها على زوجها وحسن معاملته فى يوم الدخله ( يعنى تسيب سنين عمر البنيه كلها وتفتكر النصيحه يوم الدخله )
وانا علشان مزعلشى ستى نفوسه منى اردت ان اراجع مع ابنى ليله الامتحان
وياريتنى ماتهببت على عينى وراجعت
فى اثناء المراجعه النهائيه اكتشفت ان هناك دروس كامله فى جميع المواد لم يشرحها المدرس نهائيا نظرا لضيق الوقت وتقديم موعد الامتحانات
وطبعا ان مربى ابنى على الصدق
وعلشان كده مصدقتوش
واتصلت بابن اختى وهو فى منطقه مختلفه وفى مدرسه مختلفه وفى نفس العام الدراسى لابنى
وكانت الطامه الكبرى
ابن اختى اكد ان بعض المدرسيين لم يشرحوا الدروس الاخيره من عده مواد دراسيه نظرا للحضور المبكر للامتحانات
وفى مواد كتير يعنى على كل لون يا باطستا
وتذكرت قول الفيلسوف الرومانى حسن باشا الفراش حين قال ( اذا اردت ان تحارب قوما فعليك بعلمائهم .... واذا اردت ان تدق عنقهم فعليك بعلمهم )
وياريتك يا حسن يا زفت ماتكلمت ولا نطقت ... لان الساده محترفى الحرب هيدقوا عنقنا فى التعليم
افرح بقى واتفلسف براحتك يا حسونه
فى البدايه يا ساده اصدر السيد الوزير السابق يسرى الجمل قرار بتأجيل الدراسه بسبب الخوف من انفلوانزا الخنازير ( وده بصراحه كان مطلب للكثير من اولياء الامور )
ولان دولتنا ديمقراطيه ومش بتاكل مهلبيه تم الاستجابه لطلب اولياء الامور وتقرر تأجيل الدراسه على ان تستمر الدراسه المده المؤجله فى الصيف
وتم اقاله الجمل
وتولى زمام الامور الشو مان صاحب العرض القوى وخليفه مذبحه القلعه ( وانا اتحدى ان تجدوا عرضا مماثلا فى اى دوله فى العالم مثله ) عرض الشومان ( مدرسه الخلفاء ) وده العرض الاسبق فى نوعه واتحدى وجوده فى كتب الف ليله وليله او نوادر جحا او كليله ودمنه
عموما
تعلم السيد الوزير من اخطاء سلفه وتخيل له ان سبب اخراج الكارت الاحمر له هو تأجيل الدراسه
وبسبب العشق المصرى والعربى الروحانى للمحبوب الكرسى ..وبسبب عدم مقدره الوزير على معرفه وجوب جمع الاسبوعين المؤجليين للدراسه ام طرحهم من العام الدراسى
قام الوزير بعمل مخالف تماما
فقد قام بتقديم موعد الامتحانات اسبوعين عن موعدها الاساسى
يعنى بالبلدى عكس عكاس
وبالبلدى كده ( اسبوعين مؤجلين + اسبوعين مقدمين عن موعدهم = شهر كامل مفقود )
ويقال فى تقديم موعد الامتحانات عده اقوال منها
اولا :- يقال والعهده على الرواى ان تقديم موعد الامتحانات تم بسبب كأس العالم 2010 المقام فى جنوب افريقيا حيث تشترك مصر لاول مره باربعه منتخبات فى كأس العالم
ثانيا :- يقال ايضا ان تقديم موعد الامتحانات بسبب اعطاء امريكا الوقت الكافى للبحث عن اسامه بن لادن
ثالثا :- يقال ان التقديم تم بسبب التصريحات الاخيره لعصام الحضرى ورغبته فى العوده للاهلى
رابعا :- يقال ايضا ان التقديم بسبب الانتخابات الحره النزيهه التى ستشهدها مصرنا الحبيبه ( انتخابات مجلس الشورى ) وده اصاب التعليم بالشورى
خامسا :- يقال ان التقديم جاء بسبب مشاركه وزاره التربيه والمرحوم التعليم فى الاحتفال بعيد ميلاد التلميذه كارولين بيتر الامريكيه الطالبه بمدرسه سان فرنسيسكو الاعداديه القديمه بنات بولايه سان فرنسيسكو الامريكيه .. وذلك حرصا من الوزاره على المشاركه فى عيد ميلاد ام الفصاد
ان مايحدث من هرج ومرج وعدم احساس بالمسئوليه شىء خطير ومرعب على مستوى مصر كلها
اننى اناشد اتحاد الكره فى مصر ان يختار وزير جديد قوى وخبير كما وفقه الله فى اختيار حكام اجانب اكفاء لادراه مباراه الاهلى والزمالك الاخيره ( طبعا سامع حد بيقول مال اتحاد الكوره ومال الوزير .. اقوله بصراحه شديده .. عجبنى الحكم )
****************************
واخيرا اتقدم انا اخوكم عبده باشا الرايق بخالص التعزيه فى فقيد مصر والعالم العربى والاسلامى المرحوم المغفور له ان شاء الله التعليم المصرى
للفقيد الرحمه ولمصرنا الغاليه الصبر والسلوان

هناك 15 تعليقًا:

واحدة مفروسة يقول...

انا لله و انا اليه راجعون
البقاء لله و حده يا رايق
و بعدين انت مالك زعلان اوي كده ليه يعنى؟؟؟؟
ما كده كده العيال بيطلعوامن المدارس ما يعرفوش يفكوا الخط اليومين دول
واصلا ولا فاهمين حاجة،واصلا ما عندهمشي شخصية
ياعم المشكلة مش فى المنهج ولا التعليم
المشكلة فى المعلم، البيه اللى بيشرح،بيتكلم
ما كلنا اتعلمنا عادل تزرع الفول، و سعاد تأكل الفول
ما كلنا اتعلمنا حساب المثلثات و الجبر و الهندسة
لا كان فيه رياضة حديثة ولا اللعبكة ديه
و هيه ديه المناهج اللى طلعت زويل و نجيب محفوظ
همه قاصدينها
عاوزين العيال مش بس تبقى متخلفة
لأ
يجننوهم كمان و يصيبوهم بالاحباط و تبقى حالتهم النفسية فى الارض

المهم سيبك من ده كله
الدروس اللى مش مشروحة جت فى الامتحان؟؟؟؟

الطائر الحزين يقول...

انا لله وانا اليه راجعون

هما قتيلان مش قتيل واحد

التربية وكمان التعليم

يعنى الواد حصل اخوة

غير معرف يقول...

انا اتفق مع الاستاذ الطائر الحزين
فقد قتلوا التربيه والتعليم
فاصبحنا الان نطالب بدم قتيلين وليس قتيلا واحدا
شكرا على البوست يارايق
ولو ان برضه دمك خفيف وانت بتتكلم جد

مواطن مصرى يقول...

البقاء لله
هو لسه التعليم ميت دلوقتى
لالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالا
والف لا
التعليم مات من زمان يارايق

همس الاحباب يقول...

مطلوب مليون دقيقة حداد مش دقيقة واحدة
لان المصاب جلل والفقيد عزيز وغالى
فالتربية ضاعت والتعليم مات
واصبحنا بلا تربية ولا تعليم
فالبقاء لله وحده
والعاقبة عندكم فى الامتحانات الاخرى
ولا اراكم الله مكروه فى منهج محذوف

عبده الرايق يقول...

واحده مفروسه
طبعا الدروس اللى مش مشروحه جت فى الامتحان . وده لانها مش محذوفه من المنهج
يمكن تكون محذوفه من دماغ المدرس
بس انا هنا مش بحمل المدرسين المسئوليه الكامله
لان الشهر اللى ضاع ضيع الدنيا كلها معاه
مع العلم ان فى مدرسين انهوا دروسهم كلها
وبعضهم كروت الدروس
وبعضهم من اصحاب الضمير اخذ بعض الحصص الفاضيه وكمل المنهج بتاعه
لسه فى ضمير عايش فى نفس المدرسين
العيب فى الوزاره ذات نفسها

عبده الرايق يقول...

الطائر الحزين
واحشنى جدا يا طائر والله
المصيبه ان القتيلين اهم زكائز بناء الوطن الصحيح
تحياتى لك

عبده الرايق يقول...

غير معروف
وانا معك انت والطائر
وشكرا على الاطراء ولو انى كنت بكتب وانا متضايق جدا جدا جدا

عبده الرايق يقول...

مواطن مصرى
مش عارف انت مواطن مصرى صاحب مدونه مواطن مصرى
ولا انت مواطن زينا كلنا مواطنين مصريين
عموما
انا بشكر حضورك الكريم ايا كان حضرتك
اما موت التعليم فده حسيت به بجد اول امس
تحياتى لك

عبده الرايق يقول...

همس الاحباب
ياريت يا خالد كانت الدروس المهمله محذوفه
كانت مش هتبقى فى اى مشكله
لكن الدروس مش محذوفه
لكم المحذوف فعلا هو الطالب
وده محذوف وجوبا لعدم امكانيه اعرابه لانه اسم اعجمى

حنين القلب يقول...

انا لله وانا اليه راجعون

والله ما عارفه اقول ايه يا رايق

بس بجد بقى الاهمال وقله الاهتمام بكل شىء فى بلدنا شىء مستفز جدا

وهما بيربوا الاولاد يموتوهم من الضرب

وهما بيعلموا ولا يشرحوا ولا ينيلوا والله وحتى لو شرحوا مش بيشرحوا كويس كلمتين واقلب
يعنى ولا تربيه ولا تعليم

سمعت اخر نكته يا رايق
بيقولك استاذ بيهزر مع تليمذ رماه من الدور الثالث والولد مات

للاسف دى مش نكته دى حقيقه والله

حسبيا الله ونعم الوكيل

سومه...مجنونه فى بلد عاقل يقول...

هو البقاء لله فى كلا من
النيل والتعليم والشعب والديمقراطيه انا مش شايفه حاجه لسه عايشه اصلا

الشـوكة الــنـاعـمـة يقول...

بصراحه حاجه تفرس وتغيظ
بلد بقت نزيهه فجأه فا عايزين
يبقوا نزهه بضمير
ربنا يطمنك على ابنك يارب
وتفرح بيه انشالله
على فكره انا فرحانه جدا عشان انا كنت متخيله انى المدونه الوحيده
اللى من السويس
الحمدلله اخيرا لاقيت حد بلدياتى
تحياتى

Broker Activation يقول...




Pretty! This was an extremely wonderful post. Thanks for supplying these details.

http://prokr.com/pesticides-spraying-anti-insects-company-riyadh/

mekho matrix يقول...

ممتاز على مجهودك





لعبة