السبت، 7 يونيو 2008

الرايق فى نهائى رولان جاروس


اصدقائى الاعزاء ادعوكم لزياره مدونتى المشتركه
مع فرنسا هانم وهى

سقراطه :- ازيك يا ختى دلوقتى عامله ايه ؟؟؟؟

مسز رايق :- الحمد لله على كل حال

سقراطه :- فى ايه ياختى هو الرايق متضايق كده ليه ؟؟؟

مسز رايق :- اهو على الحاله دى من امبارح ..وقلتله خد البرشامه بتاعتك مش عايز يسمع كلامى ..واهو عماله ينفخ ويفش من بدرى

سقراطه :- مالك يا ريق فى ايه ؟؟؟؟؟؟؟؟

الرايق :- هششششششششششششششششششششششششش

سقراطه :- ايه يا راجل يا خرفان انتى ...انت بتهشنى هو انا دبانه ؟؟؟؟؟؟؟

الرايق :- هسسسسسسسسسسسسسسسسسسسسسسسس

سقراطه :- هو جوازك ماله يا ختى ...عماله هش وشويه هس هو فى ايه ؟؟؟؟؟؟؟؟

مسز رايق :- مانا بقولك من امبارح وهو مكلضم وكل ما حد يكلمه يشاور بايده وميتكلمشى ومفيش على لسانه الا هس او هش

سقراطه :-لالالالالا احنا مش لازم نسكت عليه ...يمكن جراله حاجه ولا محتاجه.......اشوفه ماله ....رايق ...يا رايق ...انت يا رايق

الرايق :- هششششششششششششششششششششش

سقراطه :-مالك يا رايق ؟؟؟....انت سامعنى ؟؟؟؟.......هما بابا وماما سابوك هنا لوحدك ؟؟؟.....انت تعرف تروح بيتكم يارايق ؟؟؟؟.....

الرايق :- هسسسسسسسسسسسسسسسسسسسسس

سقراطه :- لا حول ولا قوه الا بالله...........فى ايه يا رايق ؟؟؟.....القطه اكلت لسانك ؟؟؟؟.....طيب لو نطقت وقلت مالك هابعت اجيب ساقع واعمل حسابك معانا فى ازازه

الرايق :- هشششششششششششششششششششششششششش

سقراطه :- لا ده باين الموضوع كبير قوى......فى ايه يا رايق ؟

الرايق :- انا هاطق انا هافرقع ....انا خلاص روحى ان ماى نووز

سقراطه :- فضفض يا خويا احنا برضه اهلك

الرايق :- فيفى عملتها معايا ولعبت معايا الدنيئه

سقراطه :- فيفى ؟؟؟؟؟؟؟؟ ..مين فيفى دى ؟؟؟؟؟؟؟

الرايق :- ما هو انا كنت ساكت وكاتم فى نفسى لانى عارف ان انتم اصلا متخلفين مش فاهمين حاجه

سقراطه :- الله يحفظك مش جديد عليك طوله اللسان ...لكن مش وقته ....مين فيفى دى ؟؟؟؟؟؟

الرايق :- فيفى بتاعه الاتحاد الدولى لكره القدم

سقراطه :- هههههههههه ......اسمها فيفى ؟؟؟؟؟؟ .....اسمها فيفا يا عم الرايق ...مالها بقى بيك الفيفا

الرايق :- فيفا بقى وشغل مصاطب ..قلنا اسمها فيفى ...كمان دى هتأوحى فيها

سقراطه :- فيفى فيفى مش مشكله ...مالها بقى فيفى ؟؟؟؟

الرايق :- بطوله الامم الاوروبيه خلاص كلها ساعه وتبدء ومحدش اتصل بيا

سقراطه :- طيب هيتصلوا بيك ليه ؟؟؟؟

الرايق :- طبعا لازم يتصلوا بيا افتتح البطوله ....انا بقالى سنتين بتعلم سويسرى وباخد فيها دروس علشان افتتح البطوله ....كل فلوسى راحت على الدروس وفى الاخر محدش يتصل بيا ؟؟؟.....ليه ده انا اخاصم فيفى ليوم الدين

سقراطه :- سويسرى ايه يا خويا انا عمرى ماسمعت ان فى لغه سويسريه ؟؟؟؟

الرايق :- طبعا جاهله ومتخلفه واخت المتخلفه مراتى (لا مؤاخذه مسز رايق ) الولد حسن الفراش جده سويسرى وبيعرف يتكلم سويسرى وبقاله سنتين كل شهر يا خد منى عشرين جند علشان يعلمنى سويسرى

سقراطه :- واتعلمت ايه يا فالح

الرايق :- الواد حسن الفراش قالى ان اللغه السويسريه هى هى اللغه العربيه لا العرب كانوا محتلين سويسرا لمده سبع تلاف سنه لغايه لما سويسرا استقلت من 4 سنين علشان كده تلاقى كل كلامهم عربى بس بالمقلوب ..يعنى قلب بالسويسرى بلق ...وحصان بالسويسرى ناصح ...وولد بالسويسرى دلو ...وبنت بالسويسرى تنب ....وعسكرى بالسويسرى يركسع

سقراطه :- بس بس بس وحياه ابوك ماتكمل ....من حقك ياخويا تضايق اقعد هناك مكانك وانفخ وفش براحتك

الرايق :- خلاص لو مبعتوليش تبقى دى قطيعه مع فيفى وبكره انشاء الله هاروح فرنسا اسلم الكاس بتاعه رولان جاروس للفايز فى نهائى التنس ....مش عايزه حاجه من باريس يا سقراطه ؟؟؟؟
سقراطه ؟؟؟ ....يا سقراطه ؟؟؟؟؟ ؟...انتى يا سقراطه

سقراطه :- هششششششششششششششششششششششششششششش

هناك 76 تعليقًا:

Eldebug يقول...

ههههههههههههههههههههه

انا كل مرة بادخل اقرا البوست واقعد اضحك معرفش اعلق اروح قايم ... بس المرة دى ماقدرتش اقوم ... دى فيها اول تعليق يابا ...

هههههههههههههههههههههه

بعد اذنك اكمل ضحك بقى

آفاق الحرية يقول...

التاني يارايق
ههههههههههههههههههه
يابختك ياعم
بيضالك في القفص
هتشوف نادال بكرة
ههههههههههههههه
بس والله الفيفا عندها حق
هههههههههه

غير معرف يقول...

هههههههههههههههههههههه

لالالالالالا
جامده
مستر رايق

هشششششششششششششششششش

ههههههههههه
بقى حضرتك زعلان من فيفى
لا لا فيفى ملهاش حق

سلامى يا رايق باشا
:)))))))))

المـــفـــــــقــــــــوعـــــة مــرارتـهــا يقول...

ماعلش ياعم الرايق ماتزعلش نفسك انا هااعمل دورة العاب الكرة الشراب جنب بيتنا واجيبك تفتتحها

عبدالله يقول...

هههههههههه
جامده خالص رولان دي يا مستر رايق واللغه السويسري دي مالهاش حل


تحياتي لقلمك المبدع

غير معرف يقول...

ههههههههههههههههههههه
في حد ميعرفش الغه السوسريه
اخص عليها سقراطه
السويسرول طبعا هههههه دي بتبقي حلوه
مع الشاي بلبن هههههههه
رايق متزعلش من فيفي كان عندها افراح يااخويا بالهبل فكانت مشغوله والصيف بيحب الافراح
____________________________
علي الهامش عدل نوع الخط يارايق عشان
فيه مشكله مدخل الكلام علي بعضه

رئـــــيسـة حزب الأحلام يقول...

ايه يارايق وصلت لسويسرا
سيدى ياسيدى اكيد عشان تهرب الكادر على هناك
تحياتى لك وللمدام ولاخت المدام

kochia يقول...

طيب علمنا معاك السويسري ده بقي والسنة الجاية تعمل لجنة وتسافر من نفسك كدة من غير دعوة .. وهم هناك مش هيلاقوا سويسري اكتر منك يفتتح كل حاجة
واهو تاخد اخواتك المدونين معاك وانت رايح يعملوا لك منظر

تحياتي

عاشــــــ النقاب ـقــــة"نونو" يقول...

السلام عليكم
سويسري هههههههههههههه
ايه سقراطة دي
سكر والله
الف مبرووووك المدونة قريته وفطسنا من الضحك ربنا يوفقكم
تحياتي

قوس قزح يقول...

طيب و النبى بلاش تتعلم الفرنساوى لحسن يقولوا لك الفرنساوى هو العربى بس اغلبها بديل
قلب تبقى قلبوووو
حصان تبقى حوصانوووو
ولد تبقى ولدووو
بنت هششششششششش استنى يا رايق والنبى سيبنى اخترع اللغة

لسع والله لسع .. بالسويسرى ههههههههههههه

Empress appy يقول...

لااااااااا النبى ما تزعل نفسك سا خويا ريشك يقع منك هما الخسرانين اوعى تزعل نفسك خالص اقعد هنا وهما هيجولك معلش منها لله اللى كانت السبب هى الكورة خربت مخ الرجاله هههههههههههههههههههههههههههههههه

Mafrousa يقول...

هههههههههههههههههههه
و الله انت مشكله يا رااايق
فيفى بتسلم عليك و بتقولك ماتزعلش المره الجايه حينادوك علشان تفتتح البطوله...ومعلش مش نادولك المره ديه علشان الفتاحه ضاعت و كانوا بيدوروا عليها
هههههههههههههههههههههه
و لو عاوز دروس فى الفرنساااااوي انا تحت أمرك
ده حته سهل جداااا هوه هوه العربي بس الضم فى الآخر (او) بحنيه
ههههههههههههههههه

همس الاحباب يقول...

هههههههههههه
ههههههههههههه
ايه يا عمنا ده والله شربات وتجنن
بجد انا اخدك معايا ومتسالش احنا رايحيين فين
والنبى لو رحت فرنسا ابقى خد بطيخة معاك لعصام الحضرى احسن ما فيش بطيخ هناك والولد يا عينى قاعد جنب الشبكة وزعلان
بس بجد يا فرحة فرنسا هانم فيك
ههههههههه
وحشتنى مووووووووت
تحياتى وحبى

Unknown يقول...

يا لهوىىىىىىىىىىىى ايه الحلاوة دى دة انت رايق بجد.... يخرب عقلك
تعالى زورنى يللا بسرعة

خالتى بمبة يقول...

ههههههههههههههههههههههههه
فيفي ملهاش حق المفروض كانت تجيب مترجم يفهم السويسري بتاع جد الفراش

الطائر الحزين يقول...

جوران لاروس نماك ينعى بتعلب نتس شم قدة كرم بيط يا خايق يا رويا انت تروح تلعب فى جوران لاروس بس يكون زوجى مختلط

حاهم فاجة
قصدى فاهم حاجة

اخوفك بشير

قصدى اشوفك بخير
اصلى عندى هواية كلب القلام
قصدى قلب الكلام والفشة والطحال كمان

tamer.sala7 يقول...

بصراحة فيفي بتستعبط بس الولد حسن الفراش ده ده طلع استاذ بصراح عبقري
sorry
اللي يلاقي عبيط وميستعبطوش ربنا يحاسبه

همس الاحباب يقول...

انا فرحان انا سعيد انا مبسوط
انا رااااااايق
عارف ليه
من غير ليه
بس بجد بجد فرحان قوى قوى وما نمتش من الفرحة
كفاية كده
ههههههههه

عبده الرايق يقول...

Eldebug
ياسيدى ربنا يبسطك على طول ويقدرنى انى اسعدكم
ومبروك او تعليق
بس المرات الجايه متقراش وتمشى
سيب حتى اثر بسيط يسعدنى

عبده الرايق يقول...

آفاق الحرية
حتى رولان جاروس نسيوا ومشفناش نادال
وبعدين انت جاى مع فيفى وبتقول عندها حق ؟؟؟
ليه هو الرايق شويه فى العالم ولا ايه ؟

عبده الرايق يقول...

shayma
صح ياشيماء كلامك سليم
فيفى معندهاش حق
علشان كده انا مش هتفرج على البطوله الاوروبيه اللى ماليه القنوات
ياحسره

عبده الرايق يقول...

المـــفـــــــقــــــــوعـــــة مــرارتـهــا
ههههههههههههههههههههه
برضه هنلاقى فيفى حماتك

عبده الرايق يقول...

عبدالله
اشكرك اخى عبد الله
وياريت اكون عند حسن ظنك

عبده الرايق يقول...

mayada
هى فيفى بتشتغل رقاصه فى الافراح ؟؟؟
طيب ان كان كده يبقى فعلا عندها حق تهز الشبكه براحتها

عبده الرايق يقول...

رئـــــيسـة حزب الأحلام
ماحنا ماروحناش سويسرا ولا حاجه
وبعدين تحيه لاخت المدام ؟؟؟؟؟؟
بتحيى سقراطه ؟؟؟؟؟؟؟؟؟
نو
نو
نو
الا سقراطه

عبده الرايق يقول...

kochia
نو
نو
نو
عايزين نصحصح كده يا كوشا
السنه الجايه مفيش بطولات اوروبيه
البطوله بتتلعب كل 4 سنين
ومش هتتلعب فى سويسرا
ممكن يلعبوها فى غانا

عبده الرايق يقول...

nonoymm
يارب يوفقنا ونقدر نسعدكم كمان وكمان
تحيه اخويه لكى

عبده الرايق يقول...

قوس قزح
نو
انا اللغه الفرنسيه ضليع فيها
اعرف بنجور وبنسوار وبنى فاتح
لكن السويسرى ده هو اللى تقيل
تفتكرى الواد حسن بيضحك عليا ؟؟؟؟؟

عبده الرايق يقول...

appy
هههههههههههههههههههه
نصيحتك عملت بيها
وقعدت ومحدش جه
يلا
هما اللى خسرانين
يبقوا يورونى هيعرفوا يجيبوا الكوره ازاى لما حد يشوطها بره الاستاد

عبده الرايق يقول...

واحدة مفروسة
الفاتحوا كانتوا معايوا
يعنوا هموا معندهمشيوا حقوا
وانوا مشوا زعلانوا هموا الليوا خسرانينوا
ايه رايك يا مفروسه كده بتكلم فرنساوى كويس ولا لأ

عبده الرايق يقول...

همس الاحباب
ابو همس
خالوووووووووووود حبيب قلبى
انا سعيد جدا انى اتكلمت معاك امبارح ومتعرفشى مدى سعادتى بالمكالمه دى انت وابو خالد
اما عن عصام الحضرى
هسيبه لما البطيخ يرخص ويبقى البطيخه بنص جنيه وبرضه خساره فيه
انا اهلاوى صميم
بس الحضرى ميستاهلشى حتى قشر البطبيخ

عبده الرايق يقول...

enjy
بس ياريت يكون عندكم غدا
حكم انا لسه جاى من الشغل ومتغديتشى الا 3 مرات

عبده الرايق يقول...

خالتى بمبة
برضه المترجم هيفهم احسن من جد الفراش؟

عبده الرايق يقول...

الطائر الحزين
اخى الطائر الحزين طبعا فاهم كل حاجه انتى فاكر الرايق شويه فى الالمانى
طبعا اللغه اللى انت بتتكلم بيها دى المانى
وانا عرفتها علشان انا اكلت فى الغداء كتير وبطنى مألمانى
شفت بقى انا اعرف ازاى المانى ؟؟

عبده الرايق يقول...

tamer.sala7
هو التعليق ده بصراحه زعلنى شويه
لان الرايق مش عبيط
انا بحاول التواصل معكم فى فكاهه وكوميديا ولكن ليس معنى ذلك ان اكون عبيط

عبده الرايق يقول...

همس الاحباب
وانا الاخر سعيد جدا بالمكالمه التليفونيه التى جرت بينى وبينك انت وابو خالد
شفت بقى انا فتشت السر

Mafrousa يقول...

هههههههههههه
ميه ميه يا راييق
كده ميت فل و اربعتاشر انت تطلع على فرنسا البلد بالصلاة على النبى كده و تدخل قصر الايليزيه و تطرد مستر جاكوزي....و تقعد و تترستأ
ههههههههههههههههههههههه
حتلاقى هناك واحده ايطاليه طويله و هابله كده ملكش دعوه بيها
دول جايبنها علشان تنضفلهم السقف
أصل سقف القصر عالى عليهم
ههههههههههههههههههههه

عبده الرايق يقول...

واحدة مفروسة
انا عبده باشا الرايق امسك مكان ساركوزى ؟؟؟؟؟؟؟
ليه هو اننا اتجننت ؟؟؟؟
نو
نو
نو
انا لايمكن امسك الوظيفه دى
دى مش من مستوايا
قصر ايه وبتاع ايه
انا بفكر فى مستوى راقى
هاجيب شويه فانلات وشربات وابر بوابير ومشاط وفلايات ونقلب عيشنا هناك
الناس عند قوس النصر هناك بالهبل وابيع لهم الفلايه الواحد ب 500 جنيه استرلينى
هى العمله بتاعتهم الاسترلينى ولا الدينار ؟؟؟؟؟؟؟؟؟؟؟؟؟
دى ولا دى انا مش هيهمنى خااااااااااالص

حنين القلب يقول...

بتتعلم سويسرى يا رايق
الله يكون فى عون مسز رايق وسقراطه كمان
وفيفى مين يا عم الحج
يا رب ارحمنا برحمتك وابعد عننا الرايق
سلام يا رايق

كلاكيت تانى وتانى يقول...

وبعدين ضحكتنى وانا جاية اتخانق عشان البوست مع فرنسا وكلمة الزقازيق
مش نافع خناق معاك اكمل ضحك احسن واوزع اللنك على صاحبتى واختى وجوزها عشان انت وفرنسا وحماتى ملاك بقيتوا البمبونة والضحكة الحلوة لنا فالبيت هنا ولا شهرزاد قبل النوم
مش هتيجى الفيس بوك تشوفى الجروب بتاعى عن المطلقات
http://www.facebook.com/group.php?gid=24205381223
ولنك مدونة نعم مطلقة ولا اخجل ورا على بروفيل كلاكيت
http://motalaka-with-out-fear.blogspot.com/
يمكن يكون لك رأاى يفحمنا ويغير حياتنا خالص

دعاء مواجهات يقول...

ههههههههههههههههههه

مصدقتش نفسى لما لاقيتك بتزورنى

كنت فاكراها تهيؤات

نورت الدنيا كلها

عملنا مدونة حدث لازم تدخل وتعلق فيها


جاااااااااااامدة
http://darbetshamss.blogspot.com/
اللينك اهووة

اللى عاوز يدخل التاريخ يدخلهاا...

بيس

nigro يقول...

مستر عبده
ماتزعلش نفسك يا عمنا
بس أصل انت مش واخد بالك
حفل الإفتتاح ده بيبقى حاجة كده مش على مستوى الحدث و لا تليق بمقامك
لأن فئة قليلة اللي بتتفرج عليه
اللي معندهمش وصلة دش زينا كده " عاااا "
فهما إيه بقى
ناويين يسيبوك للتقيل
النهائي و تسليم الميدليات و الفانلات و الشورتات و المكافئات و كاس البطولة و الميغة دي كلها يا عم
بس ده كله في حالة واحدة
إن الجزيرة الرياضية قلبها يحن و تسيبلنا ماتش النهائي نتفرج عليه

يا رب و النبي يا رب
يا رب و النبي يا رب

يلا سلام

شمس يقول...

لغة مش ليها حل مستر رايق وانا اقول عايز حاجة مثلجة لية هههه

انا مليت ليك الثلاجة كلها مشروبات مثلجة

انا مدونة يومية يعنى كل يوم فى جديد لو حابب تتابع اهم الاخبار تعالة كل يوم

تحياتى

مدحت محمد يقول...

هههههههههههههههه

فقعت سقراطة حرام عليك ههههههههه

الفيفا بقى اسمها فيفى

وكمان الفراش جده كان سويسرى والعرب احتلو سويسرا

عبده هشششششششششششششش

هههههههههههههههه

بالنسبة للبوست بتاع الاسكيمو اعتقد والله اعلم ان فرنسا بتحضر لصواريخ فى البوست الجاى احذر بقى

هههههههههههههههههههه
تحياتى ياباشا

Doba يقول...

دعوة رسمية لحضورة بطولة رولان جاروس
للأستاذ / مستر رايق

يشرفنا قدومك لتسليم كأس نهائى التنس لبطولة رولان جاروووووووووس

لأول مرة فى نهائى رولان جاروس يتم تسليم الكأس ليس لأفضل لاعب ولكن لمسلم الجائزة

لقد سلم مستر رايق الكأس لنفسه وبنفسه
هيييييييييييييييييييييييه

مستر رايق
يا يعيش
يا يعيش

هيييييييييييييييه
هنلم فلوس بالهبل

tamer.sala7 يقول...

حبيب قلبي انا اسف جدااااا

بس اقسم بالله العظيم اني مقصدش اللي انت فهمته خالص

انا كنت اقصد ان الفراش ده نصاب وضحك عليك مش اكتر من كدة

وحضرتك استاذ واخ اكبر ليا وانا بعتذر لحضرتك تاني وفعلا مكنتش اقصد ده خالص اتمني ان تقبل اعتذاري اخيك الاصغر تامر صلاح

Asmaa mahaba يقول...

ههههههههههه انا جيت يا با عبدو ولغيت الاجازه ....والسبب بتوع الفيفا هو محدش قال لحضرتك انى انا اللى حفتتحها بدال منك....ياله متزعلش خيرها فى غيرها
تحياتى ليك سومه_87

غير معرف يقول...

هههههههههههههههههههههه

فيفى

تخيل افتكرتها فيفى عبده


الحمد لله انك صححت المعلومة عندى


وبعدين ايوة فيه لغه سويسرية طبعا

زى اللغه الموزنبقيه تمام



تحياتى

اه صحيح سلملى على سقراطه

Desert cat يقول...

اعزائى المدونين والمدونات
تم اليوم اذاعة بعض من الكومنتات التى جائت فى مدونة البرنامج الإذاعى انت تسال والكمبيوتر يجيب
http://netonradio.blogspot.com/
للاجابة على السؤال المطروح
ومن هذه الكومنتات
بنت مصرية او انجى البوهى
محمد الكومى
سالى
روفى
عبده الرايق
تابعوا المدونة يمكنكم تحميلها من الارشيف
اهلا ومرحبا بكم دائما اصدقاء للبرنامج
واتمنى التواصل
تحياتى للجميع

غير معرف يقول...

مبرووووووووك يارايق فرحتني كتير بالمدونة والله يارب دائماً كده عاملين الجديد كلو وبالتوفيق دائماً

الطائر الحزين يقول...

ترجمة التعليق
جوران لاروس نماك ينعى بتعلب نتس شم قدة كرم بيط يا خايق يا رويا انت تروح تلعب فى جوران لاروس بس يكون زوجى مختلط

رولان جاروس كمان يعنى بنلعب تنس مش كرة قدم بص يا رايق خويا انت تروح تلعب فى رولان جاروس بس يكون زوجى مختلط

مش تقولى فيفا الفيفا دى بتاعة كرة اليد مش القدم

ايه الناس دى

اهو ده عيبه يقول...

حرام عليك يارايق هتجيب داغ العيلة دى
وسويسرى ايه اللى من الشمال لليمين ده دى اكيد شفرة
شوف ولا يهمك من كاس الامم الاوروبية ماله كاس الامم الشبراوية عليك وعلى هناك طوالى
ارحمنا برحمتك يارب

Desert cat يقول...

دى فيفى طلعت معندهاش اصل خالص يا عبده
يعنى تتعب نفسك وتتعلم سويسرى على يد الجهبذ العلامة الكبير حسن الفراش
وفى النهاية يسيبوك تهش وتهس طيب وده ينفع
الا اللغة المقلوبة دى جبتها اخترعتها ازاى
تحياتى

Alkomi يقول...

انا موش قادر اقرا يا عبده

الخط تحت كبير والسطور متداخلة

اعمل ايه انا دلوقتي

الـجـدة فـصـيـحـة يقول...

السلام عليكم ورحمة الله وبركاته


فيفي ..فيفي يا رايق ؟!!!
لا بجد كل مرة بتثبت قوة معلوماتك العامة عن جدارة

وكله إلا السويسري اللى اصله عربي
والعرب احتلوا سويسرا وكمان 7000 سنة

بس الفراش طلع ناصح - بالعربي مش السويسري -

تحياتي

عبده الرايق يقول...

حنين القلب
اوعى تعملى زى سقراطه وتقولى اسمها فيفا
نو
نو
نو
انا عارفها كويس
ومعلمها كمان اصلها كانت سمراء وقصيره حبتين

عبده الرايق يقول...

كلاكيت تانى وتانى
انا يسعدنى ويشرفنى انى اكون بمبونايه
لكن فرنسا نو
نو
نو
دى متنفعشى تبقى بونبونايه خاااااالص

عبده الرايق يقول...

دعاء مواجهات
هههههههههههههه
تاريخ ؟؟؟؟؟؟؟؟؟؟
انا داخل التاريخ اصلا من اوسع ابوابه
انتى مقرتيش فى التاريخ عنى ولا ايه ؟؟
عبده الرايق مذكور فى كل كتب التاريخ العربيه والعالميه
لكن اسمى مكتوب بالحبر السرى علشان الحسد

عبده الرايق يقول...

nigro
هههههههههههه
الجزيره قلبها يحن ؟؟؟؟
انا اشك
فاكر لما الجزيره شفرت القنوات الرياضيه وعملت قنوات جديده تزيع فيها ماتشات الدورى الاسبانى
كانوا عاملين نفسهم زعلانين وقلبهم على الناس
انا خلاص مش هاتفرج على الجزيره الرياضيه
لكن لو فى شبه جزيره هاتفرج
بجد يا نجرو
العيب مش على الجزيره
العيب على التليفزيون بتاعنا
كان اشترلنا حتى ربع الدوره او تمنها

عبده الرايق يقول...

شمس
عايزه تضحكى عليا
وتنزلى كل يوم بوست علشان اروح هناك كل يوم وادمن
وبعد كده تقوليلى الدخول بفلوس
لا ياختى انا هاروح يوم واقصر يوم
انا ناصح
علشان الادمان

عبده الرايق يقول...

مدحت محمد
فرنسا مين وبتاع مين
احنا ولا احنا ولا حتى هوا القطر يلحلحنا
قال فرنسا قال
مدحت
احنا ولاد بلد واحده اوعى تقولها احسن دى ست شرانيه وربنا يجعل كلامنا خفيف عليها

عبده الرايق يقول...

Doba
بس بجد انا زعلان
زعلان من ايه ؟ زعلان من ايه ؟؟
اهو كده زعلان ؟؟؟
زعلان من ايه ؟ زعلان من ايه ؟؟
زعلان من بتوع رولان جاروس قالولى قدم الكاس لنفسك وانا طاوعتهم واتارى الكاس وقع فى الراس وبقيت اغنى واقول
هات الازازه واقعد لاعبنى

عبده الرايق يقول...

tamer.sala7
ولا يهمك يابو صلاح
توء سفاهم بسيط
بس كان عشمى بدال الاسف ده تبعت لاخوك الرايق 1000 جند كانوا هينسونى اى حاجه
ولا اقولك خليهم 1000 يورو اشمعنى اللعيبه بتوع الكوره دلوقتى بيتباعوا باليورو

عبده الرايق يقول...

سومه...مجنونه فى بلد عاقل
اه
خيااااااااااااااااااااااانه
برضه كده
تيجى الطعنه منك انتى يا سومه
ياللهول
كل حلفاءك خانوك يارايق

عبده الرايق يقول...

همس
لغه موزنبيقيه ؟؟؟؟؟
طيب ماتعلمهانى الله لا يسيئك
يمكن يلعبوا فيها كاس الامم الاروربيه اللى جايه اكون عامل حسابى

عبده الرايق يقول...

Desert cat
كلام فى سرك يا قطه
اوعى اخونا صلاح يسمع ولا حاجه
انا
انا
انا سجلت الحلقه من الارشيف وسمعتها فى الراديو الصبح
يارب ما حد منهم ياخد باله ان فى حاجه فى الحلقه نقصت

عبده الرايق يقول...

نوره الخشن
هى المدونه لسه بيبى صغير
ندعوا لها بالتوفيق
عودا احمدا يا نورا

عبده الرايق يقول...

الطائر الحزين
الله اكبر
الله اكبر
ظهر الحق
ومن مين من اخونا العظيم الطائر الحزين
قال ان الفيفا بتاعه كره اليد
يبقى انا بقى صح وفيفى بتاعه كره القدم
اما بقى اللغه السويسريه اللى انت كاتبها فيها غلطات كتير
انت فاكرنى مش هاقفشك ؟؟
نو
نو
نو
الرايق مفتح وواعى قوى
انت كاتب
يا خايق يا رويا
هنا بقى الغلط
مينفعشى فعلين يجوا وراء بعض لازم نحبس بينهم باسم اشاره
ممكن نقول
يا خايق عن يارويا
طبعا خبره
الرايق خبره اربع كسور من نط السور بتاع المدرسه

عبده الرايق يقول...

اهو ده عيبه
الامم الشبراويه ؟؟؟
ليه هفتتح كاس الروائح
كاس الشبراويشى
اما لو مزنوقين فى الرايق
خلاص
ممكن يجبوا شبرا هنا فى السويس افتتح لهم الدوره
ويرجعوا فى قطر الساعه 3 العصر

عبده الرايق يقول...

Desert cat
اوعى وشك
حسن الفراش ده واد خلاصه مقطع السمكه وديلها فى الثقافه
ده بيعرف كل حاجه
وحتى لما بسأله هو المطره هتمطر امتى يا استاذ حسن يقولى علينا وعليك لما تيجى الصقعه
وفعلا كلامه بيتحقق والمطره بمتطر فى السقعه
ابو على ماركه مسجله

عبده الرايق يقول...

محمد الكومي
يامحمد ده انتى عمله نادره
من بين 52 ورقه كوتشينه مفيش الا كومى واحد
وفى الاخر تقولى الخط داخل فى بعضه
كل الناس قبلك قروا الكلام اشمعنى انتى ؟
ولا عايز تهرب من الحساب ؟؟؟؟؟
عموما لو الخط بايظ عندك
ادخل صفحه التعليقات واضغط فى اعلى الصفحه على كلمه اظهار الرساله الاصليه
وهتظهر لك الصفحه
اما لو لقيت الخط بايظ تانى
ارمى الخط واشترى كرت
واتكلم براحتك

عبده الرايق يقول...

الجدة فصيحة
طبعا يا جده معلومات قويه وقيمه
نفسى زميلى فى الشغل يقروا التعليق بتاعك وشهادتك دى يا جده
علشان فاكرين نفسهم هما بس اللى مثقفين وكل ما امسك الجرنال يقولولى اعدل الجرنال يا رايق

(احمد سكر ) يقول...

مقلتش ليه يارايق انك فى سويسرا

كنت حودت عليك وانا راجع من بلجيكااا

ع الااقل نشيل سوى

ههههههههههه

تحياتى اخى الكريم

اخيك احمد سكر

بنت الصالحين يقول...

ياربي

مش هنبطل فششششششششششششششششششششر



هشششششششششششششششششش ولا كلمه

عبده الرايق يقول...

(احمد سكر )
سويسرا مين بقى يا عم احمد ماهوانا مرحتش اصلا
مش مهم حمدلله على سلامتك انت اهم حاجه
زاللى انت جابته برضه يسد

عبده الرايق يقول...

عاشقه الفردوس
نو
نو
نو
انتى مش مصدقانى ولا ايه ؟؟؟؟؟
غايبه بقالك مده
وفى الاهر جايه مش مصدقانى