الجمعة، 30 يناير 2009

تبرعوا لأم حسين

سقراطه :- السلام عليكم

مسز رايق :- اهلا يانعمه ياختى ازيك .. برضه كده بقالك اسبوعين متجيش ولا تزورينى

سقراطه :- معلشى ياختى انتى عارفه لو عليكى انتى وعيالك انا اكون عندك كل يوم لكن انا طهقانه من وش النحس جوزك اللى ما يتسمى

مسز رايق :- انتى مالك وماله ده علاجه الوحيد تنفضيله انا عاشرته وعارفاه

سقراطه :- بس وانا داخله الحاره شفت لافتات كتيره قوى مكتوب عليها تبرعوا لام حسين .. هى ايه الحكايه ؟؟

مسز رايق :- غلبانه قوى الست دى والله جوزها مات وساب لها خمس اولاد صغيرين وياحبه عينى مالهمشى معاش .. اصل جوزها كان ارزقى ومالهوش تأمين ..والناس فى الحته كتر الف خيرهم بيلموا من بعضهم علشان يعملوا لام حسين مشروع تعيش منه هى وعيالها

سقراطه :- انا عن نفسى معايا 200 جنيه دلوقتى وعايزه اتبرع بيهم لعمل الخير ده

مسز رايق :- طيب استنى لما الرايق يجى واديلى الفلوس

سقراطه :- ميييييييييييييين الرايق !!!!!!!!!!!!

مسز رايق :- اه الرايق اصل هو اللى اقترح يلموا لام حسين والناس عرضوا عليه يمسك هو الفلوس ويفكر فى المشروع

سقراطه :- ده شارع ده ولا جناح فى مستشفى العباسيه ؟ برضه فى حد يمسك الرايق فلوس ؟؟ الناس دول اتهطلوا ولا ايه ؟؟

مسز رايق :- لا يانعمه هو الرايق مش حرامى برضه .. هو يمكن عبيط لكن مش حرامى

سقراطه :- ماهو دفاعك عنه ده هو اللى جايبك لوراء ... اهو المحروس امين الصندوق وصل اهو

الرايق :- هااااااااااى ايفرى بدى ... هى النطره نطرت فى شقتنا احنا بس ولا ايه ؟؟ هيييييييييييه يا نطره رخى رخى على قرعه بنت اختى ...بنت اختى قرعه قرعه مالهاش ولا شعره

سقراطه :- مطره مين يا متعوس مفيش نطره ولا حاجه

الرايق :- اصلى وانا داخل الشقه شفت طينه ووحل قاعده على الانترير قلت يمكن تكون النطره نطرت هنا بس

سقراطه :- قصدك ايه يا رايق ؟؟؟ وحل البرك لما يلفك من راسك لرجلك .. انا برضه وحل وطينه ؟

الرايق :- نو نو نو انا مش اقصد كده .. دونت تفهمينى غلط يا سقاريطو .. لكن انا قصدى ان انتى فيكى شبه كبير من الطينه والوحل

مسز رايق :- يا جماعه صلوا على النبى مش كده هو انتوا ناقر ونقير مع بعض كده على طول .. ها يا رايق ايه اخبار مشروع الست ام حسين

الرايق :- خلاص انا خلصت كل حاجه والحمد لله .. اييييييييييييييه ربنا يقدرنى على فعل الخير . انا اشتريت الحاجه ووديتها بيت الست ام حسين وربنا يكرمها ويوفقها

سقراطه :- انا مش عارفه ازاى اهل الحته دول يمسكوا واحد اهبل وعبيط زى حالاتك حكايه زى دى ... مفروض اللى يمسك حاجه تخص الناس وعمل الخير يكون انسان كفء للعمل ده ويكون انسان نضيف وذكى وملو هدومه

الرايق :- ايه ده هو احنا ساكنين جنب زريبه ولا حاجه ؟؟ اصلى سامع صوت كده زى صوت الجاموسه .. يا ترى جاى منين الصوت ده ؟؟

سقراطه :- احنا اصلا مش هناخد منك غير طول اللسان .. المهم عملت ايه بالفلوس يا عبقرى

الرايق :- يييس ذاتس ذا كويتشن .... شوفى يا متخلفه انا ولله الحمد جمعت 35 الف جند من الحته وحتت الحته والشوارع اللى جنبنا ورحت اشتريت ....

سقراطه :- ااى يا دماغى ايه ده فى حد بيحدف طوب من الشباك ..... الحقوا الحقوا

مسز رايق :- يالهوىىىىىىى الناس بتحدفنا بالطوب .. هيكسروا الشقه

الرايق :- ده اكيد ضريبه الشهره .. لازم كلنا ندفع ضريبه الشهره

سقراطه :- شهره مين وضريبه مين يا متعوس هو انت عملت ايه بالفلوس ؟

الرايق :- نو نو نو... اوعى تفهمى الموضوع غلط انا لايمكن اسرق ابدا . بس الناس دى اكيد مش مقدره الفن مش مقدره المواهب مش مقدره الرقى والجمال والتذوق

سقراطه :- رقى مين وجمال مين وتذوق مين ؟؟؟؟ هو انت عملت ايه يا رايق ؟؟؟ .. الناس هيكسروا البيت بالطوب

الرايق :- الناس دى مش فاهمه حاجه .. انا اخذت ال 35 الف جند .. ورحت اشتريت للست ام حسين اجدع بيانو فى محافظه جمهوريه مصر كلها .. علشان تعزف عليه كام سرفوانيه من سيرفونيات الموسيقار الكبير دارهوفن .. وتهدى اعصابها وتعرف تفكر فى مستبقل عيالها

هناك 24 تعليقًا:

Empress appy يقول...

لا اله الا الله يا ربنا على الصبح
معلش نيتك خير
بس تصدق انت فتحت نقطه حلوه اوي
نقطه يعنى بوينت مش يعنى راقصه وحد بينقط
ان فعلا فيه ناس بتلم للناس فى الخير وتيجى تكحلها تعورها وتعميها لانهم مبيجبوش حاجات اساسيه للناس
غير كده ماله الباينو كويس ممكن تسرح بيه برضه بيانولا عادي واهو رزق

Lobna Ahmed Nour يقول...

فعلا ام حسين محتاجة تهدي اعصابها وتبقى رااااايقة وبعدين تشوف هتعمل فيك ايه
يا ترى ايه نوع الدعوة اللي هتدعيها ليك قصدي عليك هههههه
بيانو ؟؟ بيانوا ؟؟!!

kochia يقول...

هي المدونة دي مش كانت مقفولة ومعروضة للبيع اوللايجار ؟
وانا عرضت اشتري

بقت حلوة دلوقتي واتفتحت تاني
ماشي يا سيدي الله يسهل لك

المهم علاقتك بسقراطة دي ميزة اوي..
اماموضوع البيانو.. ده هو الشئ المتوقع من شخص حساس زيك طبعا

تحياتي

الفراغ يقول...

اول مره اجى هنا
وبجد ضحكت من قلبى
ممكن اسئلك سؤال صغنن
هو ممكن ام حسين تدينى البيانو شويه
وماتزعلش يا سيدى انا هااجره منها
وبرضه اوفر عليك الضرب اللى كنت هاتاخده من اهل الحته
فكره تمام صح ايه رايك ياعم؟
ابقى زورنى بقى

حاجات جوايا يقول...

هههههههههههههههههههههههه
بيانو ؟؟؟؟؟
ههههههههههه
لا فعلا كانت محتاجاه
ربنا يقدرك على عمل الخير دايما
ههههههههههههههه

دمت بخير اخى الفاضل وحمدا لله على سلامة المدونة
سالى

غير معرف يقول...

هههههههههههههه
هههههههههههههه
هههههههههههههههه
ههههههههههههههه
مش قادره امسك نفسى من الضحك
بيانو !!!!!!!!!!!!!!!!!!!!!!!!!

غير معرف يقول...

على فكره ده تعليقى الاول عندك
وانا صاحبه التعليق الاعلى
انا متابعه مدونتك باستمرار
ربنا يجازيك عننا خير
دمت اخى الكريم صاحب بسمه مميزه

ريهام

عاشقه الرومانسيه يقول...

ايه الذكاء الخارق ده

انا على فكره اول مره اعرف ان لك مدونه خصوصى
كنت فاكره مدونه الضاحكون بس
طيب ياسيدى لك عندى تاج ارجوك بليز بليز اقبله
نفسى اشوف ردودك عليه شكلها ايه
اتفضل
واكون شاكره لحضرتك قوى
http://mero200528.blogspot.com/

همس الاحباب يقول...

ههههههههههه
هههههه
بجد بجد ونعم الاختيار
فعلا مسكوا القط مفتاح الكرار
بيانو يا رايق
وب35 الف جند
ليه بيقول بابا وماما وطنط سقراطه
هههههههه

maiosha يقول...

ههههههههههههههههه
يا نهار أبيض

وبيحدفوك بالطوب..
انا لو من أم حسين احدفك بالرصاص
بيانو ب 35 الف جنية.. يا عينى عليك يا ام حسين

ههههههههههههههه

انت تسال والكمبيوتر يجيب يقول...

صديقنا العزيز نتمنى ان تكون فى احسن الأحوال ونفتقد تعليقاتك الساخره ولذلك نوجه لك هذه الدعوه من جديد ويسالنا عنك جمهور المستمعين
دعوه
الأخ العزيز/
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

جنّي يقول...

السلام عليكم

ازيك يا عم رايق ..

دا كلام .. هي الناس الهبلة دي زعلانة ليه هما مش عارفين ان المزيكا غذاء للروح ..

دا ام حسن هي وعيالها ها يشبعوا ويدعولك .

وانا كمان ها ادعيلك واقولك روح يا شيخ منك للي كلت دراع جوزها .. بيانو يا مفتري ..

انت تسال والكمبيوتر يجيب يقول...

لصديق العزيز عبده الرايق
ده من اعمالك التى تعتبر كلاسيكيات ولا تذهب بهجتها ولا يزول رونقها ابدامثل اعمال شكسبير او موليير او شعبان عبد الرحيم ههههههه
والحقيقه لم نسجل جديد هذا السبوع للسفر ومشغوليات اخرى ...والأيام الجايه ان شاء الله تعوض لكن لو اصريت على الغرامه ماينفعش ندفع باليورو؟اصل ممعناش فكه هههههه
http://netonradio.blogspot.com

Doba يقول...

أفكارك ممتااااااااازة
بجد بحييك من قلبى

هبة

حنين القلب يقول...

على فكرةانت مفترى

حد فى الدنيا يعمل كده
اصوت واقطع شعرى وابقى قرعه علشان ترتاح يا رايق

حد ياخد 35 الف جند ويروح يجيب بيهم بيانو علشان الست تهدا
ده احتمال يكون جالها صرع او انهيار من عملتك السوده

ربنا ينتقم من اللى طلب منك انك تمسك فلوس الست دى

روقه
ممكن تلم ليه ونجيب طلبه ورق وعود ونعمل فرقه غنائيه راقصه؟؟؟

Unknown يقول...

ههههههههههههههههه
انت بتفكرني بيوميات حصاوي:D:D:D:D
و علي فكرة يا تقسم معايا بقية الفلوس يا هسيح
انت اصلا جايبلها اورج مستعمل من عند ابو سامية اللي في محمد علي
يا هتقسم يا هنسيح

رندا يقول...

روووووووووووووووقا كل سنة وانت طيب وعقبال مليون سنة
HaPpy BirThday
ههههههههههههههههه
يااجمل روقة فى الدنيا كلها كل سنة وانت فى وسطنا كووووووووولنا

رندا

almasry يقول...

انت واحشنى مووووووووووووووووووووووت



هى سقراطه لسه عايشه
؟؟

بـِصَمتـِـ أميرة ــــى يقول...

هيك هيك هيييييييك
ده انت رايق بجد بئى على قولة الناس
هههههههههههههههههههه
ياشماته أبلة أم حسين فيا
ههههههههههههه
عمة البيانو فى الحلم خير
سيبك انت
انت كنت قاصد المصلحة
بس سيد الرجالة والنبى
داخل عليا بالبيانو
ههههههههههههههه
:)
يالله سلام بئى هجيلك تانى
خليك قاعد ماتمشيش

وتقبل خبطتى على بابك
نيها ها هااااااااا


(ملكة بحجابى )

Pink Dreams يقول...

هههههههههههههههههههههههههههههه

بيانو

يعنى ام حسين بسلامتها هتعزف لبيتهوفن

ههههههههههههههههههههههه

بس يلا الرايق كانت نيته خير بردو

دا كفايه انه بيفكر فى مستقبل عيالها

هههههههههههههههههههههه

بجد بوست تحفه

تحياتى

Asmaa mahaba يقول...

تقصد تبرعوا للرايق انت مش ناوى تبطل الداء دا شكلك حتطلع منوفى من كتر حبك للفلوس

almasry يقول...

وربنا انت عسل


مفتقدك من زمان


كل سنه وانت طيب يا عم الرايق



بس قولى جبت بقيت الحركات يعنى دف ومزمار وحركات من بتاعة الزيطه والزنبليطه ومش هوصيك يا رايق لو حصل وام حسين بقت مشهوره اتوسط ليا تشغلنى معاها


هعتبر ده وعد


رمضان كريم عليك


المصرى

غير معرف يقول...

ياللي عل اكتافكم دبورة
ونفوسكم دايما مغرورة
ماتقولشي عملتوا الاسطورة
اسطورة تحكيها الاجيال

اسمعوا مني

ده الكلمة في زوري محشورة
واهي ممكن تبقى من الأمثال

أغلبكوا كلاب مسعورة
وبنهش لحومنا مسرورة
وبربط القيد والأغلال

بسببكوا بلادنا مقهورة
وعيون أولادنا مكسورة
وكنوز أراضينا مطمورة
وبقينا بشر الأحوال

اصحى ياظالم
وامسح عن عينك الشبورة
عمايلكوا السودة المسحورة
في نحوركم راجعة ومدحورة
والحق ده ناسه منصورة
والأرض هترجع معمورة
ولافيها مكان للأندال

sony2000 يقول...

ههههههههههههههههههههه
بجد خلتني موت من الضحك
حد يعني يعمل كدا طب ماكنت تجبلها حجات تنفعها بجد هي هتعمل ايه بالبيانو يعني
ماشي ياعم الرايق
ربنا معاك بقي المره الجايه وخلي بالك من نفسك
تحياتي