فتره مسائيه

جود افتر نون مسس رايق

اهلا ياسى عبده ..اتاخرت كده ليه ياخويا ؟..انا قلقت عليك

قلقتى عليه ليه ياوليه ؟..هو انا اللى كنت سايق ؟..عم محمد العربجى عيان وابنه اللى طلع بينا انهارده والظاهر ان الحصان مش واخد عليه

هو انت لسه بتركب العربيه الكارو ؟؟...ما الاتوبيسات ماليه الدنيا ..عموما ..الاستاذ عادل جارنا سأل عليك اربع مرات فى التليفون وعايزك ضرورى

ايوه ايوه انا قابلته وانا طالع على السلم وقالى انه عايزنى وجاى عندنا حالا

ترررررررررررررررررررررر

الظاهر ان هو ده اللى بيرن الجرس ..ادخلى جوه مسس رايق ...الراجل عنده عيال بدال ما يشوفك يتخض ولا حاجه

ليه هو انا بخض الناس ؟؟؟....حرام عليك يا عبده

مش وقت الكلام فى محاسن سيادتك مسس رايق ..ادخلى جوه وانا رايح افتح الباب للراجل

***********

هاى مستر عادل ..ماى فلات نورت بوجودك اتفضل

السلام عليكم ...يارب ياساتر

اتفضل يا راجل بيتك ومترحك ..اتفضل هنا فى الريسبشن

شقتك حلوه يا استاذ عبده بسم الله ماشاء الله

ابتدينا بالنق ...هههههههه ..انا بضحك معاك ..نق ولا يهمك ...شرفتنا مستر عادل

والله يا استاذ عبده انا ملاحظ ان حضرتك بتشتغل فتره واحده لغايه الساعه 2 ظهرا ..انا قلت لو حضرتك تشرفنا فى الشركه اللى بشتغل فيها ..وتشتغل معانا فتره مسائيه من 6 الى 10 مساء .. يبقى شرف كبير للشركه

اه بس انت عارف ان الامور دى متنفعشى كده على طول ...لازم نسأل عليك وعلى اخلاقك وعلى عيلتك وبعدين ناخد قرار ..يعنى ادينى فرصه 5 سنين افكر

اخلاق ايه وعيله ايه يا استاذ عبده ؟؟...هو انا جاى اتجوز...انا عايز حضرتك تشتغل معايا فى الشركه ...وكلمت المدير والمدير وافق

مدير ؟؟؟؟ هى الشركه فيها مدير ؟؟؟؟؟ امال عايزنى انا ليه ؟؟؟

احنا عايزينك تشتغل فى المخازن ...تظبط الوارد والصادر فى كشف ...فى واحد شغال نهار وانت هتشتغل ليل

هو شركتكم دى عباره عن ايه ؟؟؟

احنا شركه تصدير واستيراد...شركه ايهاب وعاطفكو

والمرتب كام ؟؟؟ والاجازات امتى ؟؟؟

اتفقت مع المدير على 450 جنيه شهريا ..ومتنساش انها فتره واحده ...والاجازات يوم الجمعه

نو نو نو ....شوف مستر عادل ...انا علشان اقبل اشتغل معاكم لازم تقبلوا شروطى

شروووووط ؟؟؟؟ ...شروط ايه يا استاذ عبده ...هو الشغل كمان فيه شروط ؟؟؟

اوف كوورس ...انا ليه شروط ولازم توفقوا عليها فى خلال 48 ساعه والا المقابله تعتبر ملغيه

الصبر يا رب .....ماشى يا عم عبده ايه بقى شروطك ؟؟؟؟؟

اولا - لازم يجى لى طلب رسمى من صاحب الشركه شخصيا يدعونى الى التكرم وقبول الوظيفه فى الشركه

اه .........الله ماطولك ياروح ....كمل يا استاذ عبده ...وبعدين

ثانيا - لازم وحتما ولابد يتغير اسم الشركه البلدى ده ...وتسموها اى اسم تانى ...ولو سميتوها ..شركه الرايقكو تبقى فكره هايله
ايه ساكت ليه مستر عادل ؟؟؟

هه ؟؟؟؟؟
لا ابدا اصلى سرحت شويه معلشى ...وايه كمان يا استاذ عبده ؟؟

ثالثا - المرتب لايقل بحال من الاحوال عن 12 الف جنيه مصرى او ما يعادلها بالعملات الاجنبيه
ايه يا راجل انت بتبص للسقف ليه ؟؟؟

لا ابدا معاك

رابعا - الاجازات يوم الجمعه والاثنين والاربعاء من كل اسبوع
خامسا - وقت العمل من الثامنه الى التاسعه والنصف
سادسا - سياره همر بالسائق للعبد لله وسياره اخرى لتوصيل الرايقين الصغيرين للمدارس
سابعا ....

استنى لو سمحت يا استاذ عبده ..ممكن استعمل التليفون

اتفضل ..أأز يور هوم

الو ..ام محمد ..انتى طالق

وات هبن مستر عادل ؟؟؟؟

ولا كلمه ...ولا عايز اسمع صوتك ..انا طلقت مراتى علشان هى السبب ...بقالها شهرين تزن على دماغى وتقولى شوف للرايق شغالانه معاكم اى حاجه انشاله فراش ..مراته كل يوم تكلمنى وتقولى مش لاقيين ناكل
لغايه لما انطصيت فى نظرى واتحايلت على صاحب الشركه يشغلك ..لغايه لما وافق بعد عذاب

خلاص خلاص ..ولا يهمك مستر عادل ..طلقتها ..طلقتها ..ولا تزعل عندى لك عروسه فيرى فيرى بيتيفول

اربعه قهوه مشكله

وعندك واحد شاى سكر بره ..وعندك اتنين حمص

ولد يا حسن فى ايه ؟ ..مالك مطنشنى خالص ولا اكنى هواء قاعد على التيبول ..وير يور ايس ؟

ايوه يا استاذ رايق خير ..اصطبحنا واصطبح الملك لله

خير ايه ياولد ؟...هو انا جاى اتساهر معاك ؟..انا قاعد على القهوه بقالى نص ساعه ..وانت رايح جاى ..مش معبرنى ..هو انا مش باين من الترابيزه ..ولا نظرك مش جايب لغايه عندى ؟

تحت امرك يا استاذ عبده عايز ايه ؟؟

ايوه كده ..ناس تخاف متختشيش صحيح

ياعم متكترشى فى الكلام عايز ايه ؟؟

هاتلى اربعه قهوه .واحده ساده ..وواحده على الريحه ..وواحده مظبوط.. وواحده زياده

ياعم بلاش الحكايه دى ..قديمه ...عملتها معايا قبل كده وجبت لك الاربعه قهوه وشربت من كل فنجان شويه وفى الاخر تقولى اخترت المظبوط ...هو احنا فاتحينها حادى بادى ..خلصنا يا عم تشرب ايه ؟؟

خلاص يا ولد ..هاتلى واحد قهوه مظبوط

ايدك على 25 جنيه الاول

ليه هو انا قاعد فى الشيراتون ..25 عفريت لما ينططوك ..انت ولد فيرى فيرى امبسيبول

ياعم مترطنليش بالاجنبى وحياه والدك ..عليك 24 جنيه حساب قديم وواحد قهوه بجنيه يبقى 25 جنيه ..خلص علشان ورايا زباين ..مش كل مره تطلب وتمشى ..انت فاكرها سبيل ؟؟؟

خلاص ياولد ..بلاش قهوه ..خد الجاوند الطبى ده ..البسه فى ايدك واغسل كوبايه بالرابسو 3 مرات وهاتلى كوبايه ميه ساقعه

طلما انت نزيه كده وحركات ...فى ميه معدنيه ايدك على جوز جنيهات واجيبلك ازازه معدنيه

اه من التخلف ...اه من التخلف ..يا متخلف ان بستعمل الميه المعدنيه فى غسيل وشى الصبح ..مش فى الشرب...انجر يلا هاتلى الميه ..والبس الجاوند ده .

بص انا اصلا مخنوق منك ...وروحى فى مناخيرى ..ابعد عنى الساعه دى الله لا يسيئك ..والحنفيه هناك اهى .روح اشرب منها

ولد انت مرفود ...جوو اوت ...جوو اوت

استغفر الله العظيم ..الصبر يارب
تعالى يا معلم حنفى شوف الرايق ده خنقنى بصراحه

ايه يا استاذ عبده فى ايه ؟؟؟ استهدى بالله كده وصلى على النبى ...هات يا حسن واحد قهوه لعمك عبده على حسابى

سانك يو معلم حنفى ..فى كمان 24 جند ابقى ادفعهم طالما حلفت

يا عم ولا يهمك ..عندى انا ال 24 جنيه ..بس انا ليا عند طلب

خير يا معلم انت تأمر

الجماعه بتوع الحى مزودينها معانا شويه ..وبتوع التنظيم شدين حيلهم علينا حبتين ..وانت عارف القهوه صغيره والحته الوساعايه اللى قدامها نفعانى.. انا عايزك بقى تكلمهم يخفوا عنى شويه

ياسلام يا معلم انت تأمر .. غالى والطلب رخيص ..بس الجماعه بتوع التنظيم دول فين وانا اروح لهم...فى مصر هنا يعنى ولا فين ؟؟؟؟؟

ههههههههههه ...انت مش عارف زمايلك ؟؟ اكيد بتهزر ...عموما انا مستعد ادفع لهم اللى عايزينه ..ويخلصونى من المشاكل كل شويه

انت متأكد يا معلم ان احنا عندنا حاجه اسمها تنظيم ؟؟؟ ..اصلى معرفشى غير تنظيم الاسره

ياعم عندكم تنظيم فى ايه يا رايق انت مش شغال فى الحى ولا ايه ؟؟؟؟؟

شوف يا معلم حنفى ..طالما ناوى تدفع ..كل حاجه هتتحل ...ايدك على ربع مليون يورو وانا اخلص لك المشوار ده فى وان منت ...
ايه يا معلم حنفى قمت ليه ؟؟؟
الله فى ايه ؟؟؟ سبتنى ومشيت ليه ...يامعلم ..يا معلم ..يامعلم

المطرب الجديد ..عبده الرايق

اخوانى الاعزاء واخواتى العزيزات
نداء الى اصحاب القلوب الرحيمه
يمر اخوكم عبده الرايق بظرف طارىء ومحتاج مساعدتكم الماديه ...ساهم اخى العزيز ..ساهمى اختى العزيزه
من قدم شىء بيداه التقاه ...وهنيه لك يا فاعل الخير والثواب ...وحسنه قليله تمنع بلاوى كتيره

ايه رايك مسس رايق فى الداخله المتشحتفه دى ؟؟؟؟

رايئ فى يا خويا انت داخل تشحت ولا ايه ؟؟

اشحت ايه يا متخلفه انتى ...انا فى ورطه ولازم كل المدونين يقفوا معايا ...هو الناس مش لبعضيها ولا ايه ؟؟؟

ورطه ايه يا خويا اللى بتشحت عليها دى ؟؟

تااااااااااانى بتشحت ؟؟؟؟؟؟ ....عموما يا ام التخلف انتى انا همشيها تشحت ...المهم ..فكرك المره دى المدونين هيدفعوا ولا هيلعبوا معايا الدنيئه زى كل مره ويدونى صابونه

مش اعرف طيب الورطه الاول وانا اقدر احكم الناس هتديك فلوس ولا لأ

طبعا مانتى ولا هنا ...فالحه بس تاكلى وتشربى وتتفرجى على توم وجيرى ...وضاربه الدنيا صرمه ..وعلى على بالك انا يور هسبن ..واقع فى ورطه فيرى فيرى بيج

خوفتنى ياخويا ...فى ايه كفالله الشر

انتى مش عارفه ان مرات اخويا ولدت اول امبارح ..وان السبوع بعد اربع ايام

عارفه ياخويا ..لكن فين الورطه ؟؟؟؟؟؟

ربى رحماك ربى .......غلطه عمرى انى اتجوزتك يا ام التخلف ....امرى لله ...هانزل لمستواكى الفكرى وافهمك

قول يا خويا انا سامعه

اخويا ناوى يعمل سبوع بلدى ..بفشار وسودانى وحمص ...شغل بلدى ...انا قلت له نو نو نو ....احنا لازم نعمل سبوع فيرى فيرى لارج ...انا هاحجز مركب نيلى عايم فايف استارز ..وهاعمل بوفيه مفتوح وهاجيب الفنانه الكبيره منسى عجرن تغنى فى البارتى ..ومعاها الفنان الكبير ناصر الساهر ..علشان نسهر للصبح ..وانا عملت الحسبه لقيت انى محتاج ربع مليون جند

طيب يا خويا بلاش البعزقه دى وامشى على قدك ...طيب ده انى نفسى فى الحمص بقالى شهرين واقولك يارايق عايزه ربع كيلو حمص تقولى لما حد يولد ابقى روحى السبوع هيدوكى حمص

الكلام ده مش فى عيله الرايق ... انتى متعرفيش ان اصول جدودنا ملوك ؟؟؟؟

ملوك ؟؟؟؟؟؟ ...ههههههههههه ....ملوك فى ايه فى الشطرنج ؟؟؟؟

بتتريقى يا ام التخلف ؟؟؟ ...انتى مش عارفه ان جدى الكبير احمس باشا بنى الاهرام التلاته فى اسبوع زمن

انا يا خويا معايا دبلوم تجاره اى نعم لكن عارفه ان اللى بنى الاهرام التلاته الملك خوفو وخفرع ومنكارع .... وان الملك احمس طرد الهكسوس من مصر

هههههههههههه ....... متخلففففففففففففففففه ....طول عمرى بقول عليكى متخلفه ..شوفى يا ام التخلف ... الهكسوس دول اللى طردهم من مصر الباشا الكبير محمد على ...لما عمل القناطر الخيريه ...وطمع الهكسوس فى قنطره ..وراسهم والف سيف ياخدوا قنطره ...قالهم محمد على باشا ..عايزنها ليه القنطره دى ...قالوله ..عنينا وجعانا .وعايزين نحط فيها قنطره ...قام عملهم بارتى فى القلعه وجاب لهم بيتزا ونسكافيه ودبحهم زى العصافير

دماغك بقى يارايق محمد على عمل مذبحه القلعه للمماليك ...سبينا ياخويا من اجدادك وخلينا فى السبوع بتاع ابن اخوك ..انت معاك فلوس تعمل سبوع ؟؟؟؟

لأ طبعا وهو ده سؤال يا متخلفه ؟؟

طيب يا خويا بلاش نانسى عجرم وبلاش كاظم الساهر وسيب الناس يعملوا سبوعهم بنفسهم ملكشى دعوه بحد

طيب مالازم البارتى يبقى لارج ....خلاص نصيبهم كده مفيش الا حل واحد ... اروح اغنى انا فى البارتى وبالمره نفسى فى الحمص من زمااااااااااااااااااان

فرح فى المنصوره

تحديث

-----------

اخوانى واخواتى الاعزاء

سلام الله عليكم

شكرا جزيلا للاستاذ صلاح حجازى على اذاعه حلقه سقراطه فى برنامجه اليومى انت تسأل والكمبيوتر يجيب

وشكرا لكل الاحباب الاعزاء

-------

الرايق فى عزومه فرح ابن اخت مراته فى المنصوره

ام العريس :- اهلا ياسى عبده خطوه عزيزه شرفتوا المنصوره

ابو العريس :- اهلا يا استاذ عبده والله شرفتونا

مسس رايق :- الف الف مبروك ياختى وربنا يتمم بخير

الرايق :- هاااااااااى افرى بدى .....اوعوا تكونوا اتغديتوا من غيرنا

ام العريس :- متخافشى يا خويا الاكل كتير وخير ربنا كتير ...شرفتونا وانستونا

الرايق :- ها هتعملوا فين البارتى ؟

ابو العريس :- الفرح تحت فى الشارع انت مشفتش الكراسى والنور وانت طالع ولا ايه ؟؟؟

الرايق :- شاااااااارع ؟؟؟؟؟؟ ..نو نو نو .....انا لايمكن اوافق على كده ابدا ....الفرح ده لازم يكون فى اوتيل

محترم ....ولا يهمكم ..انا هكلم ماى فرند المحافظ بتاع القاهره واحجز لكم دار الاوبرا ونعمل الفرح هناك وانشاء الله خلال شهرين تلاته اكون جهزت الحجز

الجميع :- اممممممممممممممممم

الرايق :- ايه مالكم بتبصوا لبعض كده ليه ؟؟؟ فى ايه ؟؟؟

ابو العريس :- لا ولاحاجه يا عبده بس انهارده الحنه وبكره الدخله وخلاص جهزنا كل حاجه

الرايق :- وايه يعنى ؟ مفيش مشكله نأجل الجوازه سنه او اتنين لما نوضب حالنا ....ايه هى الدنيا طارت ؟؟؟

مسس رايق :- بيقولولك انهارده الحنه وبكره الدخله تقولهم سنه او اتنين ...خلاص يا رايق الناس بيشكروك

الرايق :- خلاص مسس رايق انا كنت عايز اخدم ....الا قولى يابو هشام كتبتوا الكتاب ولا لسه

ابو العريس :- اه كتبناه امبارح

الرايق :- وكتبتوا القايمه بكام ؟؟؟؟؟؟

ابو العريس :- كتبناها ب 30 الف جنيه

الرايق :- ايييييييييييييييه ؟؟؟ سمعنى تانى .....30 الف جند بس ....لأ طبعا ..القايمه دى لازم تتغير ..وانا مش موافق على اقل من 100 الف جند ..احنا مش ضمنين شباب اليومين دول ..ولازم نكتف الولد ده ..ونحفظ لبنتنا حقها

ابو العريس :- يا رايق العريس هو ابننا احنا ....واهل العروسه وافقوا على القايمه ...انت عاوز تزود علينا ؟؟؟

الرايق :- هو انت تعرفه من زمان ؟؟ وعارف اخلاقه كويس ؟؟

مسس رايق :- فى ايه يا عبده حرااام عليك ..ملكشى دعوه بالناس

الرايق :- خلاص مسس رايق انا مليش دعوه انا كنت عايز اخدم بس .......امال فين العريس ؟؟؟

ابو العريس :- بيلبس جوه يا عبده ....يا هشاااااااااااام ...تعالى سلم على خالتك وجوز خالتك

العريس :- اهلا يا خالو عبده ...اهلا يا خالتو

الرايق :- هاى نيو هسبن ....مبرووووك يا بطل والله فرحت لك فرى فرى ماتش

العريس :- شكرا يا خالو عبده

الرايق :- وعلى كده بقى لقيت بنت الحلال ولا لسه بتدور ؟؟؟؟؟؟؟؟

الجميع :- امممممممممممممممممممم

الرايق :- ايه يا بيبول مالكم فى ايه ؟؟؟...هو انا كل ما اتكلم تبصوا لبعض ...فى ايه ؟؟؟؟

مسس رايق :- يا عبده ارحمنى الله يخليك ...الولد حنته انهارده وفرحه بكره يبقى ازاى لسه بيدور على العروسه ؟

الرايق :- عادى يا جماعه وفيها ايه ؟.......عموما يا هشام يا حبيبى انا ماكنتش عامل حسابى على فلوس سايله ...انا هاكتب لك شيك بالنقطه بتاعتك

ابو العريس :- خلاص يا استاذ عبده انت بتعمل ايه ؟؟...ميصحش تكتب حاجه

الرايق :- احنا عندنا كام هشام ؟؟؟ وادى شيك ب 20 الف جند نقطه حايره طايره من جوز خالتك الرايق

العريس :- شكرا يا خالو

الرايق :- انا كان نفسى اعمل فرح اكبر من كده واذود الكراسى والساقع والكهربا والذى منه ..بس كنت محتاج يكون فى ايدى 1000 جند سيوله ..وللاسف البنك قفل

ابو العريس :- يا استاذ عبده احنا قمنا بكل حاجه وجهزنا كل حاجه

الرايق :- لالالالالالالالالالالالالا
فى حاجات ومحتاجات كتيره كنت عايز اعملها

العريس :- عموما يا خالو انا مجهز كل حاجه ولو انت عايز تعمل حاجه نفسك فيها ادى ال 1000 جنيه خليهم معاك واتصرف براحتك

بعد الفرح فى شقه العريس

العريس متغاظ :- هو انت دفعت حاجه تانيه من جيبك فوق ال 1000 جنيه اللى انا اتديهملك يا جوز خالتى ....اصلى انا لاحظت انك نقطت اكتر من عشرين مره وكل مره كنت بتنقط ب 20 جنيه ..انت كنت واخد الفرح نقطه لحسابك
الرايق :- ده اقل واجب يا هش

العريس هيفرقع :- بس الواجب ده من فلوسى يا جوز خالتى

الرايق :- ادى يا سيدى الشيك بتاعك ....شيك ب 20 الف جند

العريس :- بس ده مش عليه امضاء يا جوز خالتى

الرايق :-يا راجل هو فى بينا وبين بعض امضاءات ...عموما الف مبروك
الا قولى يابو هشام انت هتجوز الولد التانى قريب ؟؟؟؟؟؟؟؟
واعى تنسى تعزمنا

اكتشاف الرايق

يا عبده حرام عليك وعلى والديك انا خلاص زهقت بقالك ساعه عماله تكلمنى على المذكرات انا مش فاهم انت عايز ايه بالظبط

اوه ..نو ....ماى فرند ..صابر ...انا اختارتك انت بالذات من بين كل سكان الكره الارضيه علشان تتشرف بكتابه مذكرات عبده الرايق

يا عبده طيب اكتب ايه انا مش عارف ؟؟؟.....قولى انت عايز ايه وانا تحت امرك

عايز اكتب مذكراتى

تاااااااااااانى .......حرام ..حرام ....شوف يا عبده انا هاقوم اعمل لنا كوبيتين شاى مظبوطين علشان نروق الانانى وانت اكتب اللى عايزه براحتك وانا هارجع افصصه

هو انا كل ماجى لك بيتك اغرمك كده على طول

ولا يهمك يا عبده

طيب خلاص شوف لنا حاجه ناكلها جنب الشاى
********

اتفضل يا عبده

ايه ده ...نو ...عيش مش مغلف نو نو نو ...انا لا يمكن اغير ابدا ..انا باكل عيش مغلف ...وكمان شاى من غير فتله ...لا انا مش عايز

خلاص يا عبده براحتك ...اشرب انا ...فين اللى كتبته ؟؟؟؟؟

ادى يا سيدى النقاط الاساسيه فى مذكرات ماى لايف

ايه ده يا رايق ؟؟؟انطباعى عن يوم سبوعى ؟؟

ودى فيها ايه ماى فرند ؟؟؟؟؟؟؟؟

المذكرات مفروض حاجه شخصيه انت بتتكلم فيها مع الناس وبتحكى عن قصه حياتك وقصه كفاحك ...لكن تقولى انطباعى يوم سبوعى ؟ هو فى حد بيفتكر يوم سبوعه يا رايق ؟؟

عندك حق ..بلاش دى ...شوف بقى انا شفت زمان فيلم لاف استورى ..وعجبنى فرى فرى ماتش ..وعايز احكيه للناس

تحكى ايه يا رايق حراااااااااااااااااااااااام عليك ...انت مفروض تحكى قصتك انت ..متتعبنيش معاك الله يسترك

خلاص فهمت فهمت ...اكتب يا سيدى

قول يا عبده

اكتب ...نقطه ومن اول السطر...وحسن خطك

يا عم انت هتذلنى ...هو انا تلميذ عندك...قوم روح يا عبده واكتب فى بيتكم

خلاااااااااااااااااص ايام فرى سورى ...انا بجد اسف

يا رب صبرنى........قول يا عبده عايز تكتب ايه

شوف يا سيدى انا عايزك تكتب عن اكتشافى لمنابع نهر النيل العظيم ...وزى ما عمنا هيرودوت قال مصر هبه النيل ..وانا بلا فخر اكتشفت منابع اعظم نهر واطول نهر فى العالم

كويس كده يا عبده .....هو ده الكلام .......ايوه كده ...قولى بقى ازاى اكتشفت منابع نهر النيل ؟؟

بس توعدنى ان ده يفضل سر بينا لغايه لما انشر المذكرات ؟؟؟؟؟؟

اوعدك يا رايق

قبل ما اقولك صح كنت عايز اسألك ...هو انا ممكن اترجم المذكرات دى لكام لغه ؟؟

لو فيها اكتشافات والكلام ده يبقى ممكن تترجم لكذا لغه ...ها يارايق شوقتنى ..ايه حكايه الاكتشاف

شوف يا سيدى ..اكتب ..اثناء مرورى فى طريق الصعيد وانا رايح عند قرايبى فى اسيوط اكتشفت ان نهر النيل جاى من قبلى

رووووووووووووووووووح بيتكم يا رايق
قوم رووح دلوقتى حالا
لم كل كراكيبك وورقك ومع الف سلامه
امشى دلوقتى يا رايق

ماهو انا لازم اكتب المذكرات علشان محتاج فلوس ...عليا ايجار وديون ..ده صاحب البيت ليه لوحده 400 جنيه

ادى 500 جنيه ومع السلامه مش عايز اشوف وشك تانى ..

ماشى يا عم متتعصبشى كده هات ال 500 جند
بقولك ايه يا صابر الورقه ام 100 دى تعبانه ممعكشى واحده غيرها ؟؟

مذكرات الرااااايق

طاااااااااااااخ طااااااااااااااخ طاااااااااااااااخ

ياساتر استر يارب ...مين اللى بيرزع الباب كده ؟؟.....مييييييييييين ؟؟؟؟

افتحى يا مسس راااايق ....بليز كويكلى ....بسرعه لو سمحتى

اهلا ياسى عبده ايه اللى على دماغك ده يا خويا ...وبعدين انت مش معاك مفتاح ؟؟؟؟

نزلى عنى يا متخلفه ...حططينى الاول

اهه يا خويا ...ياساااااااااااااااتر دى تقيله قوى ...ايه ده ياخويا ؟؟؟؟

دول 70 رزمه ورق فولساب ...ابعدى ايدك انتى فاكراهم لب ولا ايه ؟؟؟؟....انتى وليه فرى امبوسيبول

اختى جوه يارايق بلاش فضايح

اوه ..ربى رحماك ربى ....احدى لفراد العائله المالكه عندنا يا مرحبا يا مرحبا ....اختك مين فيهم مسس رايق ؟؟؟

اختى نعمه مدرسه الثانوى

اه سقرااااااااااطه ...حصل لنا الرعب والتهديد ..تعالى نقدم لها فروض الطاعه

والنبى علشان خاطرى بلاش مناكفه معاها انا مش ناقصه كل شويه تتخانقوا مع بعض ....تعالى يا خويا سلم عليها

اهلا وسهلا سقراطه هانم ...نص الاوده ...لا ربع الاوده ...لا عشر الاوده نور بوجودك

اهلا سبع البرمبه مفلس افندى ...قبل ماتدخل بثوانى كنت هامشى ....ياريتنى كنت نزلت

ومنزلتيش ليه السلم مرضيش ينزلك ....ولا هتستنى لما يركبوا الاسانسير بعد ربع قرن

ايه ياجماعه صلوا على النبى ....الا قولى ياسى عبده الورق الكتير ده كله ليه ؟؟؟؟؟ ....انتى هتبيع ترمس ولا ايه ؟؟؟؟

ههههههههه ظريفه مسس رايق ....انا ناوى اكتب مذكراتى

تكتب مذكراتك ؟؟؟؟مذكرات ايه ياحسره

انتى مش عارفه ان امبارح اتذاع ليا حلقه فى الراديو ..وفى البرنامج العام كمان ....انا قلت انتهزها فرصه واكتب مذكراتى

جميله يا جوز اختى ...هو انت بتعرف تقراء وتكتب ؟؟؟؟؟

لا بتعلم.....ههههههه ...ضحكتينى .....زغزغينى يا فانله ...هههههههههه ...مش الاخت ظريفه برضه ؟؟؟

خليك معايا يارايق ...جبت الفلوس منين يا عبده ؟؟؟؟

هه ؟؟؟؟

من غير هه جبت الفلوس منين يا عبده ؟؟؟؟

ماى فرندس فى الشغل سلفونى 500 جند

ازاى ده محدش بيرضى يسلفك ربع جنيه .؟؟؟..فهمنى يا عبده

اصلى اصلى ..سورى مسس رايق ...انا قولتلهم انك مريضه وفى الانعاش

يالهووووووووووووووووووووى

ياراجل حرام عليك وعلى عيالك ...تعييى مراتك وتوديها الانعاش علشان تلهف من الناس فلوس سلف ...انت بعت نافوخك لبتاع الروبابيكيا ولا ايه ؟؟؟؟ وبعدين مذكرات ايه وزفت ايه ؟؟؟ انت فى حد يعرفك اصلا ؟؟؟؟ ومين هينشر لك المذكرات دى ؟؟؟ومين هيشتريها اصلا ؟؟؟؟

سانك يو مسس سقراطه ...انا رجل جنتلمان ومش هارد عليكى بالبلدى بتاعك البيئه ده ..كلها كام يوم ودور النشر كلها تجرى ورايا وتحدف عليا الملايين علشان احن عليهم واديهم مذكراتى ...انا مش اقل من العالم الكبير احمد عادل ..المصرى اللى فاز بجايزه نوبل فى الفينو

اسمه احمد زويل ...وفاز بجايزه نوبل فى اكتشاف الفينتو ثانيه ..مش الفينو

ايه الاسماء المكلكعه دى ؟؟؟؟بلاها فينتو ....انا هاكتب مذكراتى التاريخيه عن الحمله الفرنسيه وحفر القنال

حمله ايه يا فرحه اخواتك ؟؟؟؟ هو انتى كنت عايش ايام الحمله الفرنسيه ؟؟؟؟؟؟؟

هوانتى تعرفينى من امتى ؟؟؟؟؟؟؟؟؟

من يوم الجوازه الهباب بتاعتك

عندك اثبات او دليل مادى او شهاده وفاه تثبت بالدلائل والقرائن انى كنت ميت ايام الحمله الفرنسيه ؟؟؟؟

طيب مين كان قائد الحمله ؟؟؟ ومين اللى قاوم الحمله فى الاسكندريه ؟؟؟؟ وقعدت الحمله كام سنه ؟؟؟

امممممممممممممممممممممممم

ماترد يامفلس افندى ..قصدى يا رااااااايق افندى

بصى يا سقراطه ؟؟؟؟المعلومات اللى عندك كلها تايوانى ..يعنى من الاخر مضروبه ...اسمعى بقى الحقيقه المره والجديده من العبد لله ....قائد الحمله واحد فرنساوى ....واللى قاومها واحد مصرى ...وقعدت شويه ...ها عندك اعتراض ؟؟؟؟؟؟؟

سيبهالك مخضره يا رايق ...سلام عليكم

مش هتيجى معانا فى الصيف الجاى قبرص ؟؟؟؟؟؟؟؟؟؟؟

عايز حقى ..من الحكومه

تحديث

--------

اتقدم بالشكر للاستاذ :- صلاح حجازى على ادراج تدوينه بلاها فول هالعب جولف ضمن برنامجه اليومى انت تسأل والكمبيوتر يجيب على موجه البرنامج العام يوم الاحد الموافق 6 ابريل فى التاسعه وعشر دقائق صباحا

سانك يو مستر حجازى

---------
هاى افرى بدى ..هاى مسس رايق

وعليكم السلام ورحمه الله وبركاته ازيك يا عبده ..جاى بدرى يعنى انهارده ؟؟؟؟ ...وايه الشنطه اللى فى ايدك دى ؟؟؟

الشنطه دى فيها كلكوليترس

اممممممممممممممممم

طبعا مش هتعرفى حاجه مانتى متخلفه ...دى فيها 30 اله حاسبه ..اتفرجى وشوفى

ايه كل ده ياخويا انت هتفتح مكتبه ؟؟؟؟؟؟

نو نو مسس رايق ...انا اشتريتهم لنفسى ..وعارف هتسألينى جبت منين المانى ...استلفت من جوز اختى 350 جند واشتريت الاله ب 10 جند وجبت 30 اله

طيب وهتعمل بيهم ايه كل دول يا عبده ؟؟؟

هاخد حقى من الدوله ....شفتى فيلم عايز حقى بتاع هانى رمزى ..

ايوه يا خويا شفته

اهو انا بقى هاخد حقى تالت ومتلت من الحكومه

ازاى يا خويا؟؟؟

شوفى مسس رايق ....انا هاعزم ماى فرند احمد نظيف ....وماى فرندس الوزراء وهنعمل قعده عرب ..وهيدونى حقى فى الحاجات اللى باعوها من البلد

وهتعزمهم فين ؟؟؟؟ فى الاستاد برضه ؟؟؟؟؟؟؟؟

نو نو نو مسس رايق انا هاعزمهم على الكورنيش فى الهواء الطلق
فاضل معايا من الفلوس 50 جند هاجيب بيهم خمسه كيلو فول حيراتى ولب وترمس وورقتين شاى وباكو سكر وكيلو فحم وباكو معسل قص ...وهاخد ازازتين ميه من التلاجه وهنعمل القعده ..وكل واحد يا خد نصيبه

والعزومه دى امتى بالصلاه على النبى ؟؟؟؟

اوه ..لسه محددناش ..انا بعت لهم جوابات ولسه محدش رد

ومين قالك انهم هيردوا عليك ؟؟؟

يا متخلف دول ماى فرندس وعمرهم ما قصروا معايا ابدا ابدا ..نيفر نيفر نيفر

بس انا عمرى ما سمعت حد فيهم بيكلمك ولا بيبعتلك جواب ولا بيعبرك اساسا

اسحبى الاهانه دى مسس رايق ...انا انجرى...فيرى فيرى انجرى .وهافعد غضبان كده خمس دقايق لو مسحبتيش الاهانه ..انا ببعت لماى فرندس الجوابات وعارف انهم بيقروها لكن عندهم مشاغل ..وانا بعذرهم جدا جدا ...وعلى طول بيجيبوا سيرتى فى التليفزيون والاذاعه والجرايد ..وعلى طول بيوجهولى الكلام ...طول الليل والنهار بيقولوا المواطن المطحون ...ههههههههههههه .......اصلهم بيدلعونى مسس رايق ومسمينى المواطن المطحون

طيب وكل الالات دى هتحسب عليها ايه ؟؟؟؟؟؟؟؟؟؟؟؟؟

هو اللى اتباع شويه يا متخلفه ؟؟؟؟؟؟؟؟؟؟....انا داخل اعمل معسكر مغلق واقعد احسب على راحتى مش عايز اى ازعاج ..واقفلى الزفت المحمول ده علشان محدش يطلبنى ...وحاجه كمان كنت هانساها ...انا سمعت ان الناس فى دوله قطر بيشتكوا من ارتفاع الاسعار وقله مرتباتهم ..اتصلى باختك وجوزها هناك وشوفيهم عايزين اى مساعده كده ولا حاجه وقولى لهم الرايق ممكن يجى عندكم يحل الازمه دى مع الحكومه القطريه
هه
استعنا على الشقا بالله